Read tshiluba Ekesode 17 Bible Online

Ekesode 17 - tshiluba bible

Ekesode 17

¹Bena Isalele bakabisha luendu luabo mu tshihela tshia Sinai, bakashikama mu Lefidima bu muakamba Yehowa, kabakasanganamu mai a kunua.

²Nunku bantu bakatandangana ne Mose, bakamba ne, Utuhe mai a kunua Mose wakabambila ne, Nudi nutandangana nʼanyi bualu kai? Nudi nuteta Yehowa munyi?

³Bantu bakadi ne nyota, bakatontolola Mose, bakamba ne, Wakuluila nʼetu ku Ejipitu bua kutushiha ne bana betu ne bimuna bietu ne nyota munyi?

⁴Mose wakadila kudi Yehowa, wakamba ne, Nengenzele bantu aba tshinyi? Bobo badi bamba kunkuma ne mabue.

⁵Yehowa wakambila Mose ne, Uye biebe ku mpala kua bantu, ne bakulu ba Bena Isalele baye nʼebe, angata mulangala webe mu tshianza, uwakakuma nʼau musulu, ya biebe.

⁶Mona, meme nengimane ku mpala kuebe ha mutu ha dibue dia Holeba, wewe neukume dibue ne mai neahatuke, bantu banue mai Mose wakenza nunku ku mesu kua bakulu ba Bena Isalele.

⁷Bakidika dina dia muaba au ne, Masa ne Meliba, bualu bua kutontolola kua Bena Isalele ne bualu bua bakatela Yehowa ne, Yehowa udi munkatshi muetu, anyi?

⁸Amaleka wakalua, wakaluangana ne Bena Isalele mu Lefidima.

⁹Mose wakambila Yoshua ne, Utusunguile bantu baye kuluangana ne Bena Amaleka. Makelela nengimane ha mutu ha mukuna ne mulangala wa Nzambi mu tshianza tshianyi.

¹⁰Yoshua Wakenza bu muakamuambila Mose, wakasangana ne Bena Amaleka Mose ne Alona ne Hû bakaya ha mutu ha mukuna.

¹¹Hakabandisha Mose tshianza tshiandi Bena Isalele bakatamba bukole, ne hakahuekesheye tshianza tshiandi, Bena Amaleka bakatamba.

¹²Kadi bianza bia Mose biakanema bujitu; bakangata dibue, bakaditeka ku nyima ne yeye wakashikama ha mutu hadi, ne Alona ne Hû bakabandisha bianza biandi, umue ku luseke lukuabo, umue ku luseke lukuabo, ne bianza biandi biakakoleshibua to ne hakabuela diba.

¹³Yoshua wakahita Amaleka ne bantu bandi bukole ne muele wa nvita.

¹⁴Yehowa wakambila Mose ne, Ufunde bualu ebu mu mukauda bu tshivulukidi, ububadile mu matshu a Yoshua ne, Meme nenjimishe tshivulukidi tshia Amaleka muinshi mua diulu.

¹⁵Mose wakashila tshioshelu, wakidika dina dia tshi ne, Yehowa-nisi,

¹⁶wakamba ne, Yehowa wakaditshiha, Yehowa neuhingane ne Bena Amaleka nvita ku tshikondo ku tshikondo.