Read tshiluba Ekesode 21 Bible Online

Ekesode 21 - tshiluba bible

Ekesode 21

¹Ei idi mikenji ludi mua kuteka ku mpala kuabo.

²Biwasumba muhika, Muena Ebelu, yeye neakukuatshile mudimu bidimu bisambombo, ne tshidimu tshia muanda mutekete yeye neahete budishikaminyi hatuhu.

³Bialueye nkayandi, neaye biandi nkayandi, bikaleye mubake, nunku mukashi wandi neaye nʼandi.

⁴Biamuha mukelenge wandi mukashi ne biamulelela mukashi nansha bana ba balume nansha bana ba bakashi, mukashi ne bana bandi nebikale ba mukelenge wandi, yeye muhika neaye nkayandi.

⁵Biamba muhika ne, Ndi musue mukelenge wanyi ne mukashi wanyi ne bana banyi, tshiena musue kuheta budishikaminyi,

⁶nunku mukelenge wandi nealue handi kudi balumbuluishi, nealue handi ku tshibi anyi ku tshibanda tshia tshibi ne mukelenge wandi neatubuishe ditshu diandi ne tshiamu ne yeye neamukuatshile mudimu tshiendelele.

⁷Biahana muntu muahandi mukashi bu muhika, yeye kena uluhuka bu bahika balume.

⁸Bikaleye kayi musankishe mukelenge wakamubaka, nunku yeye neitabushe ne bamuhikule, kadi yeye kena mua kumuhana kudi ba bende bualu bua yeye wakamudinga.

⁹Biamubakisheye kudi muanʼandi wa balume, yeye neamuenzele bu mu tshilele tshia bana ba bakashi.

¹⁰Biangateye mukashi mukuabo, yeye kena mua kuhuekesha bidia biandi ne bilulu biandi ne bilele bia bantu bia kubakangana.

¹¹Bikaleye kayi mumuenzele malu â asatu, nunku mukashi udi mua kuya tshianana, kakuyi bua argent.

¹²Muntu udi ukuma mukuabo, udi umushiha, nebamushihe yeye bulelela.

¹³Bikala muntu kayi mumualamme mu musokoka, kadi Nzambi wakamuha mu tshianza tshiandi (wakamushiha ku mpukahuka), nunku nenkulongoluele muaba wa yeye kunyemenamu.

¹⁴Bialua muntu ne luonji lua kushiha mukuandi mu budimu, wewe neumumushe ku tshioshelu tshianyi, bua kumushiha.

¹⁵Muntu udi ukuma tatuʼandi anyi mamuʼandi, nebamushihe bulelela.

¹⁶Muntu udi wiba muntu mukuabo, udi umuhana anyi bamusangana mu bianza biandi, nebamushihe bulelela.

¹⁷Muntu udi uhenda tatuʼandi anyi mamuʼandi, nebamushihe bulelela.

¹⁸Bialuangana balume ne biakuma umue mukuabo ne dibue anyi biamututeye tshisusu, kena umushiha kadi yeye udi ulala ha bulalu,

¹⁹biabikeye kabidi ne udi wenda ne mulangala wandi, muntu wakamukuma neabinge, kadi yeye neamufute bua matuku akalaleye hanshi, ne mushinga wa kuondahibua kua ndi.

²⁰Biakuma muntu muhika wandi mulume anyi muhika wandi mukashi ne mulangala, ne biafueye mu tshianza tshiandi, nebamukengeshe bulelela.

²¹Kadi biashaleye ne muoyo nansha dituku dimue nansha matuku abidi, kabena bamukengesha bualu bua yeye udi biuma biandi.

²²Bialuangana balume ne badi bakulua mukashi udi ne difu, ne yeye udi utula difu, kadi dikenga dikuabo kadiena dilonda ku nyima, yeye wakamukuma neafutie mulume wandi bintu bidiye musue, yeye neamufute bintu bidi balumbuluishi bamba.

²³Kadi bikala dikenga dikuabo dilonda ku nyima, wewe neufue muoyo ku muoyo,

²⁴disu ku disu, dinu ku dinu, tshianza ku tshianza, dikasa ku dikasa,

²⁵udi muoshe mukuabo kahia nebamuoshe kabidi, udi utaha mukuabo mputa nebamutahe biandi, udi ukuma mukuabo mibundabunda nebamukume biandi.

²⁶Biatuta muntu muhika wandi mulume anyi muhika wandi mukashi ku disu, ne biafuadi, yeye neamumushe ku butaka buandi bualu bua disu diandi.

²⁷Biahuoleye dinu dia muhika wandi mulume anyi muhika wandi mukashi, yeye neamumushe ku buhika buandi bualu bua dinu diandi.

²⁸Biakuma ngombe mulume anyi mukashi ne nsengu yandi ne biafueye, nebakume ngombe mabue, kabadi munyinyi wandi nansha, kadi muena ngombe neabinge.

²⁹Kadi bikala ngombe muikale ne tshilele tshia kukuma bantu nsengu, ne bakamanyisha mukelenge wandi, ne yeye wakahidia kumukanda, biashiheye nansha mulume nansha mukashi, nebakume ngombe ne mabue, nebashihe mukelenge wandi kabidi.

³⁰Kadi biatekabo biuma bia kudihikula kudiye, yeye neafile biuma bionso bidibo balomba bua kuhikula muoyo wandi.

³¹Bikaleye mushihe nansha muana wa balume nansha muana wa bakashi, nebamuenzele nunku bu mudi dilumbulula edi.

³²Biakuma ngombe muhika mulume anyi muhika mukashi ne nsengu, nebafute mukelenge wabo nshekele[4] makumi asatu ya argent, nebakume ngombe ne mabue.

³³Biumusha muntu tshibuikidi tshia ha mutu ha dina, anyi biumbuleye dina kayi uteka tshibuikidi ha mutu, ne biahonamu ngombe anyi kabalu,

³⁴muena dina neashikishe bualu bimpe, neahe muenʼabi biuma, ne nyama mufue neikale wandi.

³⁵Biakuma ngombe wa muntu ngombe wa muntu mukuabo, biamushiheye, bobo nebahane ngombe udi ne muoyo, nebabanyangane mushinga wandi, nebabanyangane ngombe mufue, kabidi.

³⁶Anyi bikala ngombe muikale ne tshilele tshia kukuma ne nsengu diambedi, ne bikala mukelenge wandi kayi mumulame, yeye neafute ngombe ku ngombe, ne ngombe mufue neikale wandi.