Read tshiluba Ekesode 31 Bible Online

Ekesode 31 - tshiluba bible

Ekesode 31

¹Yehowa wakambila Mose ne,

²Nakubikila Besalele, muana mulume wa Uli, muana mulume wa Hu wa mu tshisamba tshia Yuda.

³Nakumûsha tente ne Nyuma wa Nzambi ne lungenyi ne dijingulula ne meji mu kuenza kua midimu yonso ya bianza,

⁴bua kulongololeye bintu bia or ne bia argent ne bia tshiamu tshia mitaku,

⁵ne bintu bidibo basonga nʼabi mabue, ne bidibo basonga nʼabi mitshi, ne midimu yonso ya bantu badi ne lungenyi lule.

⁶Mona, meme nakusungula Oholiaba, muana mulume wa Ahisamaka, wa mu tshisamba tshia Dana bua kumumatshisha, nakabuesha lungenyi lule mu mitshima ya bantu bonso badi ne meji bua bobo benze bintu bionso binakukuambila.

⁷Nebenze ntenta wa kusangakena, ne mushete wa tshihungidi tshia mei a Nzambi, ne tshibuikilu tshia ha mutu ha mushete, ne bintu bionso bidi mu ntenta wa kusambakena,

⁸ne mesa ne malonga a mesa, ne muinda muimpe ne malonga a muinda, ne tshioshelu tshia musenga wa manananshi,

⁹ne tshioshelu tshia kahia ne malonga a tshioshelu, ne tshiowelu ne tshitaku tshia tshiowelu.

¹⁰Nebenze bilulu bitambe buimpe, ne bilulu bia tshijila bia Alona muakuidi, ne bilulu bia bana bandi balume, bua kunkuatshilabo mudimu wa buakuidi,

¹¹ne manyi adibo bela ha mutu, ne bintu bia manananshi bidi bidia dihembu bia mu muaba wa tshijila bobo nebenze malu onso anakukuambila.

¹²Yehowa wakambila Mose ne,

¹³Wambile Bena Isalele kabidi ne, Nuenu nuvuluke matuku anyi a Lumingu dituku edi didi bu tshivulukidi hankatshi hetu ku bikondo bienu bionso bualu bua kunumanyisha ne, Meme ndi Yehowa wakunujidila.

¹⁴Nuvuluke dituku dia Lumingu, didi dituku dia tshijila kunudi, mundi yonso udi wona dituku adi nebamushihe, mundi yonso udi wenza mudimu dituku adi, nebamumushe munkatshi mua bana babo.

¹⁵Enzai mudimu wenu matuku asambombo; kadi dituku dia muanda mutekete ndituku dia dikisha dia kuela meji, dituku dia kujidila Yehowa, mundi yonso udi wenza mudimu dituku dia Lumingu nebamushihe bulelela.

¹⁶Nunku Bena Isalele nebajidile dituku dia Lumingu ku bikondo biabo bionso bu tshihungidi tshia tshiendelele.

¹⁷Etshi ntshimanyinu tshia tshiendelele hankatshi hanyi ne Bena Isalele, bualu bua Yehowa wakafuka diulu ne buloba matuku asambombo, wakikisha dituku dia muanda mutekete, wakadikankamika.

¹⁸Hakashikisha Yehowa kusomba ne Mose ha mukuna wa Sinai, yeye wakamuha mabue abidi akadi ne mikenji mifundahu ne munu wa Nzambi.