Read tshiluba Ekesode 37 Bible Online

Ekesode 37 - tshiluba bible

Ekesode 37

¹Besalele Wakenza mushete wa acacia Buludi bua mushete buakadi coudées ibidi ne tshituha, ne butshiama buau buakadi coudée umue ne tshituha, ne bule buau bua mulu coudée[15] umue ne tshituha.

²Wakalamika tshiamu tshia or ku nyima ne munda mua mushete, wakateka tshiamu tshia or ku mibangu ya mushete.

³Wakenza nkanu ya or mai ya kuteka ku matumba anai, ibidi ku luseke lumue, ibidi ku luseke lukuabo.

⁴Wakenza mitshi ya acacia mai, wakalamika tshiamu tshia or ku nseke yonso.

⁵Wakabuesha mitshi mu nkanu ya ku nseke ya mushete bua kutuala nʼai mushete.

⁶Wakenza tshibuikilu tshia tshiamu tshia or nkayandi, buludi buatshi buakadi coudées ibidi ne tshituha, ne butshiama buatshi buakadi coudée umue ne tshituha.

⁷Wakenza bakeluba babidi ne tshiamu tshia or tshituha tshimue tshijima, ku matengu abidi a tshibuikilu,

⁸mukeluba umue ku ditengu dimue, ne mukeluba mukuabo ku ditengu dikuabo, wakenza bakeluba ne tshibuikilu tshia mushete ne tshituha tshijima tshia or.

⁹Bakeluba bakolola mahuahua abo kulu, bakabuikila tshibuikilu tshia mushete ne mahuahua abo, bakadi belangana mpala, mpala yabo yakadi ku tshibuikilu tshia mushete.

¹⁰Wakenza mesa a acacia, buludi buau buakadi coudées ibidi, ne butshiama buau buakadi coudée umue, ne bule buau bua mulu coudée umue ne tshituha.

¹¹Wakaladika tshiamu tshia or ha mutu ha mesa ne ku matengu onso kabidi.

¹²Wakenza tshintu tshia or bunene bua butshiama bua tshianza ku matengu onso.

¹³Wakenza nkanu ya or mai, wakateka nkanu ei ku matumba anai ku mikolo ya mesa mai.

¹⁴Bakateka nkanu ku nseke ya mesa bua kutuala nʼai mesa.

¹⁵Wakenza mitshi ya acacia, wakaladika tshiamu tshia or ku nseke yonso bua kutuala nʼai mesa.

¹⁶Wakenza malonga a mesa, ne nkuta ne bihanza ne bibuikilu bia bintu ebi ne tshiamu tshia or nkayandi.

¹⁷Wakenza tshitekelu tshia minda ne or nkayandi, bakahita tshitaku tshia kahanza, ne tshintu tshia tshiamu tshiakadi hankatshi, ne luhanza tukese, ne bihunga, ne bilongo ne tshituha tshia tshiamu tshia or tshijima.

¹⁸Wakenza mahu asambombo, mahu asatu ku luseke lumue lua tshitekelu ne mahu asatu ku luseke lukuabo.

¹⁹Wakazola bilongo bia amande ne tuhanza tusatu tuakadi ku mutu kua mahu a tshitekelu, ne tshihunga tshia or ne tshilongo, wakazola bilongo bia amande ha tuhanza tuakadi ku luseke lukuabo, ne tshihunga ne tshilongo, wakenza matu asambombo nunku.

²⁰Tuhanza tunai tuakadi tuzola ne bilongo bia amande ne tshihunga tshia or ne tshilongo,

²¹tshihunga tshia or tshiakadi hankatshi ha mahu abidi, hankatshi ha mahu abidi, hankatshi ha mahu abidi, ku mahu asambombo.

²²Bihanga ne mahu a tshitekelu biakadi bia tshituha tshia or tshimue, bakatula bintu bionso ne tshiamu tshia or nkayandi.

²³Wakenza minda muanda mutekete ne biamu bia kujimisha nʼabi minda ne malonga ai ne or nkayandi.

²⁴Bakenza bintu ebi bionso ne ntalanta wa or nkayandi.

²⁵Wakenza tshioshelu tshia musonga wa manananshi ne mabaya a acacia, buludi bua tshi buakadi coudée[16] umue, ne butshiama buatshi buakadi coudée umue, bakidikisha nseke yonso ne luidi lumue, bule buatshi bua mulu buakadi coudées ibidi, wakenza nsengu yatshi ne tshituha tshijima.

²⁶Wakalamika tshiamu tshia or ha mutu hatshi ne ku nseke yatshi ne ku nsengu yatshi, wakenza tshintu tshia or ku matengu onso.

²⁷Wakenza nkanu ya or ibidi kuinshi kua mutu watshi, ku matumba abidi adi ku nseke yatshi, bualu bua kutshituala.

²⁸Wakenza mitshi ya acacia ibidi, wakalamina or ku nseke yai yonso.

²⁹Wakenza manyi adibo bela ha mutu ne musenga wa manananshi kudi bantu bakadi ne lungenyi lule.