Read tshiluba Ekesode 39 Bible Online

Ekesode 39 - tshiluba bible

Ekesode 39

¹Bakenza bilulu bia bleu ne bikunzubile ne bikunze-kunzu bia kuenza nʼabi mudimu mu muaba wa tshima, bakenzela Alona bilulu bia tshijila bu muakambila Yehowa Mose.

²Wakenza efoda ne or ne bilulu bia bleu ne bikunzubile ne bikunze-kunzu ne bia lin muimpe.

³Bakatula tshiamu tshia or to ku muhimbu mukese, bakenza nshinga ya or, bakatshikuma ne buanda bua bleu ne bukunzubile ne bukunze-kunzu ne bua lin kudi bantu ba lungenyi lule.

⁴Bakenza bintu bia kuteka ha maha bua kutuishangana bituha bia efoda bibidi.

⁵Bakenza mukaba wa efoda bu muakadibo benza efoda ne bintu bia or ne bilulu bia bleu ne bikunzubile ne bikunze-kunzû ne bia lin, bu muakambila Yehowa Mose.

⁶Bakenza mabue a onyx, bakabuesha mu masoso a or, bakafundahu mena a bisamba bia bana ba balume ba Isalele.

⁷Wakâteka ha bilulu bia ha maha bia efoda, mabue â akadi bu tshivulukidi kudi bana ba balume ba Isalele bu muakambila Yehowa Mose.

⁸Wakenza tshilulu tshia ha tshiadi kudi bantu ba lungenyi lule, bu muakenzabo efoda ne bintu bia or ne bilulu bia bleu ne bikunzubile ne bikunze-kunzu ne bia lin muimpe.

⁹Bakidikisha nseke yonso ne luidi lumue, bakatshibula tshilulu, buludi buatshi buakadi bunene bua ntanta wa tshianza ne butshiama buatshi buakadi bunene bua ntanta wa tshianza.

¹⁰Bakatshitekahu milongo ya masoso a mabue mai mu mulongo wa kumudilu bakateka mabue a sardoine ne topaze ne émeraude,

¹¹mu mulongo muibidi mabue a rubis ne saphir ne calcédoine,

¹²mu mulongo muisatu mabue a opale ne agate ne améthyste,

¹³mu mulongo muinai mabue a chrysohthe ne onyx ne jaspe. Bakabuesha mabue au mu masoso a tshiamu tshia or.

¹⁴Mabue akadi bungi bua mena a bisamba bia Bena Isalele, dikumi ne bibidi, bakafundahu mena a bisamba bia Bena Isalele dikumi ne bibidi ku mulongo wa tshisamba ne tshisamba.

¹⁵Bakenza tukanu tua or tuakadi tuhindakana bu muonshi.

¹⁶Bakenza masoso a or abidi ne nkanu ibidi, bakateka nkanu ei ibidi ku nseke ibidi ya tshilulu tshia ha tshiadi.

¹⁷Bakabuesha tukanu tua or tuhindakana mu nkanu ibidi yakadi ku nseke ya tshilulu tshia ha tshiadi.

¹⁸Baketeka nsonga ibidi mikuabo ya tukanu tuhindakana mu masoso abidi, nunku bakatuteka ha bilulu bia efoda bia ha maha ku mpala kua tshilulu.

¹⁹Bakenza nkanu ya or ibidi bakayiteka ku luseke lua tshilulu tshia ha tshiadi luakadi lutuangane ne efoda.

²⁰Bakenza nkanu ya or ibidi, bakayiteka muinshi mua bilulu bia ha maha, ku mpala kuabi ne ku mutu kua mukaba muimpe wa efoda

²¹Bakasanka tshilulu tshia ha tshiadi ne nkanu yatshi ku nkanu ya efoda ne muonshi wa bleu muhindakana tshilulu etshi tshiakashala hehi ne mukaba wa efoda, kabakatshisulula, bu muakambila Yehowa Mose.

²²Wakenza tshikowelu tshia efoda ne buanda bua bleu,

²³bakashiya disoso bua kubueshamu mutu, bakanyunguluka disoso ne muonshi muhindakana bu mudibo benza tshikowelu tshia nvita, bua tshikowelu katshihandiki nansha.

²⁴Bakafunda bifuanyikishi bia tumuma tukese tua grenade ne buanda bua bleu ne bukunzubile ne bukunze-kunzû kuinshi kua tshikowelu tshionso.

²⁵Bakenza ndibu ya or nkayandi, bakateka ndibu hankatshi ha tumuma tuakadi kuinshi kua tshikowelu,

²⁶kadibu ne kamuma kadibu ne kamuma kuinshi kua tshikowelu tshia kuenza nʼatshi mudimu, bu muakambila Yehowa Mose.

²⁷Bakenzela Alona ne bana bandi balume bikowelu bia lin,

²⁸ne bifulu bia lin, ne bilulu bikuabo bia ha mutu, ne mihanu ya lin,

²⁹ne mukaba wa lin ne bilulu bia bleu ne bikunzubile ne bikunze-kunzû, mudimu wa bantu ba lungenyi lule, bu muakambila Yehowa Mose.

³⁰Bakenza tshitotolo tshia tshijila tshia tshiamu tshia or, bakafundahu bu muakafundabo ha mabue ne, TSHINTU TSHIJIDILA KUDI YEHOWA.

³¹Bakatekahu muonshi wa bleu muhindakana, bakatshisuika ha tshilulu, bu muakambila Yehowa Mose.

³²Nunku bakashikisha mudimu wonso wa tshitendelelu, ntenta wa kusangakena, Bena Isalele bakenza malu onso akambila Yehowa Mose.

³³Bakatuala nsubu wa tshitendelelu, Ntenta mene, kudi Mose, ne bintu bionso biakenzabo, ne nkanu ne mabaya, ne mitshi ne makunshi ne masoso a tshiamu,

³⁴ne tshintu tshia biseba bia bimpanga tshima mu mai makunze-kunzû tshia kuteka ha mutu ha nsubu, ne tshintu tshia biseba bia nkonge tshia kuteka ha mutu hatshi, ne tshilulu tshia hankatshi ha nsubu,

³⁵ne mushete wa tshihungidi tshia mei a Nzambi, ne mitshi ya mushete, ne tshibuikilu tshia mushete,

³⁶ne mesa, ne malonga onso a mesa, ne bidia bilesha,

³⁷ne bitekelu bia minda, ne minda ne malonga au onso, ne manyi a minda,

³⁸ne tshioshelu tshia tshiamu tshia or, ne manyi adibo bela ha mutu, ne musenga wa manananshi, ne tshilulu tshia kuteka ku mbelu kua nsubu,

³⁹ne tshioshelu tshia tshiamu tshia mitaku, ne biamu bitshiamakane, ne mitshi yatshi, ne malonga atshi onso, ne tshiowelu ne mesa atshi,

⁴⁰ne bilulu bia luhangu lua muaba wa kutendelela, ne makunshi a luhangu ne nkanu, ne tshilulu tshia tshibi tshia luhangu, ne mionshi yonso ne milonda ne bintu bionso bia kuenza nʼabi mudimu mu nsubu wa tshitendelelu, mbia ntenta wa kusangakena,

⁴¹ne bilulu bitedibue bimpe bia kuenza nʼabi mudimu wa mu nsubu wa tshijila, ne bilulu bia tshijila bia Alona muakuidi, ne bilulu bia bana bandi balume bia kuenza nʼabi mudimu wa buakuidi.

⁴²Bena Isalele bakenza mudimu wonso wakambila Yehowa Mose.

⁴³Mose wakamona mudimu wonso wakenzabo, ne mona, baka wenza bu muakamba Yehowa Mose wakabandisha disanka.