Read tshiluba Yobo 10 Bible Online

Yobo 10 - tshiluba bible

Yobo 10

¹Mutshima wanyi wakutondeshibua bua muoyo wanyi; nengambe meji adi annyingalasha hatoke tô, nengambe dî mu kanyinganyinga ka mutshima wanyi.

²Nengambile Nzambi ne, Kumpishi nansha; undeshe bualu butudi tufuila nʼebe.

³Bidi bimpe ku mesu kuebe bua wewe kunkengesha, bua wewe kubenga mudimu wa bianza biebe, ne bua wewe kutemesha munya webe ku meji a bantu babi, anyi?

⁴Wewe udi ne mesu bu a muntu wa ha buloba, anyi? Udi umona bu mudi bantu bamona, anyi?

⁵Matuku ebe adi bu matuku a muntu, anyi? Bidimu biebe bidi bu matuku a muntu, anyi?

⁶Bua wewe udi ukeba kumanya malu adi ampisha, ne udi ukeba kumanya bubi buanyi,

⁷kadi wewe udi mumanye ne, Tshiena muntu mubi; ne kakuena muntu udi mumanye mua kunsungila mu tshianza tshiebe.

⁸Bianza biebe biakanfuka ne biakangenza mundi emu, ne wewe udi musue kunshiha.

⁹Ndi nkutendekena ne, Uvuluke ne, Wewe wakasumba bu dima; neampingishe mu dinfuenkenya dia buloba kabidi, anyi?

¹⁰Kuakampongolola bu mabele, anyi? Kuakankuatakasha bu fromage, anyi?

¹¹Wakangasa dikoba ne munyinyi, wakansuikakasha ne mifuba ne mifungu.[15]

¹²Wewe wakumpa muoyo ne wakundesha luse lujalame, ne bulami buebe buakulama muoyo wanyi;

¹³kadi wewe wakadi usokoka malu â mu mutshima webe. Ndi mumanye ne, Bualu buanyi ebu buakadi mu mutshima webe ne,

¹⁴Bingenza bualu bubi, wewe neuntangile talalâ, ne kuena umbingisha ku bubi buanyi.

¹⁵Bingikala ne bubi, ndi ne mulau; nansha bingikala muakane, tshiena mbisha mutu wanyi, bualu bua nakûshibua tente ne bundu handi ntangila makenga anyi.

¹⁶Bingikala ne bukitu bua kubisha mutu wanyi, wewe neunkebe bu mudi nyama wa ntambue wenza; neangenzele malu manene a kukema kabidi.

¹⁷Udi ubisha bamonyi bahia-bahia bua bobo kumbanda, udi ukumbasha tshiji tshiebe kundi, udi uvuisha bisumbu bihia-bihia bia makenga hamʼbidi hanyi.

¹⁸Wakampatula munda mua mamu wanyi bua tshinyi? Nakadi kuhuola muoyo, ne disu dia muntu kadiakadi kuntangila.

¹⁹Nakadi kuikala bu munakadi tshidiku; bakadi kungangata munda mua mamu wanyi bantuale tô ne ku lukita.

²⁰Matuku a muoyo wanyi kaena manya-manya, anyi? Yeye anji kundekela tshituha, yeye anji kumuka kundi, bua meme ngikale ne busambi bukese,

²¹diambedi tshiyi muanji kuya kundi tshiyi mua kuhingana kabidi, ku buloba bua mîdima ne bua mundidimbi wa lufu.

²²Budi buloba budi ne mufitu bu midima mikole, bua mundidimbi wa lufu ne bua kutompakasha kua malu, kudi munya bu midima mikole.