Read tshiluba Yobo 15 Bible Online

Yobo 15 - tshiluba bible

Yobo 15

¹Hashishe, Elifaza, Muena Temana, wakakudimuna Yobo ne,

²Bidi bimpe bua muena meji itabe ne lungenyi lua hatuhu, anyi? Bidi bimpe bua yeye adiûshe tente ne luhehele lua ku esete, anyi?

³Bidi bimpe bua yeye kuelangana mpata ne muaku udi kauyi mua kukuatshisha mukuabo, ne mei adiye kayi mumanye mua kuenza nʼau bimpe, anyi?

⁴Wewe mene udi uvuisha ditshina dietu dia Nzambi bu muanda wa hatuhu, ne udi ukanda muntu bua kutendelela Nzambi mu mutshima wandi.

⁵Bualu bua bubi buebe budi buyisha mukana muebe, ne wewe udi udisunguila ludimi lua muena budimu.

⁶Mukana muebe mudi mukuhisha, kemmeme; ne mishiku yebe idi ikubanda.

⁷Wewe mene wakadi muntu wa kumudilu wakalelabo, anyi? Bakakulela diambedi mikuna kayiyi mianze kufukibua, anyi?

⁸Wewe udi uteleja matshu ebe ku tshifufu tshidi Nzambi wela, anyi? Wewe udi ubala bakuabo meji bua kuikala nʼau nkayebe, anyi?

⁹Wewe udi mumanye bualu kai butudi katuyi bamanye? Udi ujingulula bualu kai budi kabuyi bumanyibue kutudi?

¹⁰Munkatshi muetu mudi badi ne nvî mitoke tô ne banunu bahite tatu webe bununu ku bungi bua matuku abo.

¹¹Busambi bua Nzambi budi buta mba bukese kûdi, anyi? Dî dituakuakulangana nʼebe dia luse didi bualu bukese kûdi, anyi?

¹²Bualu kai tshiji tshia mutshima webe tshidi tshikuata bukole? Mesu ebe adi abajakana ne tshiji munyi,

¹³bua wewe udi utekela Nzambi tshiji tshiebe ne udi uhatula mei a nunku mukana muebe?

¹⁴Muntu udi tshinyi bua yeye ikale ne mutshima mutoke, ne bua muntu muledibue kudi mukashi ikale muakane?

¹⁵Tangila mudi Nzambi kayi weyemena bandi ba tshijila, ne diulu kadiena ditoke tô ku mesu kuandi;

¹⁶ke mudi muntu udi umutondesha udi munyanguke, udi unua malu mabi bu mai, utamba kuhanga buakane.

¹⁷Nenkuleshe malu, unvua dî dianyi; nenkuambile malu anakutangila bianyi;

¹⁸malu mene adi bena meji bamba, akunvuabo kudi batatu babo, kabakuasokoka;

¹⁹buloba buakafidibua kudibo nkayabo, ne kakuakadi muntu wa bende wakahita munkatshi muabo.

²⁰Muntu mubi udi ukenga ne didinyenga matuku andi onso, ne badi batekela mukengeshi wa bantu anu bidimu bidibo bamubadila.

²¹Tshiona tshia malu adi amukuatshisha buowa tshidi mu matshu andi; hadiye mushikame talalâ, mushihianganyi udi ulua kumubunda.

²²Yeye kena witabusha ne, Nempanduke kabidi mu mîdima; badi bamuindila bua kufueye ku muele wa nvita.

²³Udi wendakana ukeba bia kudia, ukonka ne, Bidi kudi kunyi? Udi mumanye ne dituku dia midima didi dimuindila.

²⁴Dikenga ne kanyinganyinga bidi bimutshinyisha; bidi bimuhita bukole bu mukelenge mudilongolole bua kuluangana nvita.

²⁵Bualu bua wakuolola tshianza tshiandi bua kutombokela Nzambi, ne udi udifunyisha kudi Wa Bukole Buonso.

²⁶Udi uya kuluangana nʼandi muinyike mutu, mutekemene ngabu yandi ya bukole.

²⁷Bualu bua matama andi akulua mafuta, ne milemba yandi yakudiunda ne mafuta hamʼbidi hai.

²⁸Wakushikama mu misoko yakubutulabo, mu nsubu idi kayiyi mimpe bua muntu kushikama, yakadi yamba kulua mishiki ya mabue.

²⁹Yeye kena wikala mubanji, ne biuma biandi kabiena bishala kudiye; ne miehu ya bia kudia biandi kayena inama mu buloba.

³⁰Yeye kena wehuka midima; ludimi lua kahia nelufubishe ntonga yandi; ku muhuya wa mukana mua Nzambi yeye neahehuke.

³¹Keyemenyi biandi malu a hatuhu, kadidingi biandi, bualu bua malu a hatuhu neikale difutu diandi.

³²Nebamufute difutu diandi dionso diambedi dituku diandi kadiyi dianze kufika, ne dilala diandi dia dibue kadiena dishala dibishi kabidi.

³³Neanyange tumuma tuandi tua nvinyo tubishi, bu mudi muonshi watu wenza, neamatshishe tshilongo tshiandi hanshi bu mudi mutshi wa olive wenza.

³⁴Bualu bua tshisumbu tshia babengi ba Nzambi katshiena tshitanta, ne kahia nekashidishe ntenta ya bena mbueshilu.

³⁵Badi bimita ntatu, badi balela makenga, ne mitshima yabo idi ibalongoluela kudinga.