Read tshiluba Yobo 18 Bible Online

Yobo 18 - tshiluba bible

Yobo 18

¹Hashishe, Biledada, Muena Shuhi, wakakudimuna Yobo ne,

²Neukebe mei a kuamba musangu bule bishi? Wele meji, hashishe nenyikile.

³Bualu kai wewe udi utubala bu nyama? Bualu kai ludi bu batshimbakanyi ku mesu kuebe?

⁴Wewe udi udituanya mu tshiji tshiebe, buloba nebushale tshianana kabuyi ne bantu bua bualu buebe, anyi? Anyi dibue nediumushibue mu muaba wadi, anyi?

⁵Bulelela, muinda wa bantu babi neujime, ne ludimi lua kahia kandi kaluena lukenka.

⁶Munya neulue mîdima mu ntenta wandi, ne muinda wa mulu mua nsubu wandi neujime.

⁷Biendedi bia bukole buandi nebibumbakane, ne meji adiye uhangidisha neamulenduishe.

⁸Bualu bua makasa andi mene neamubueshe mu bukuondo, nênde ha mutu ha dijimba.

⁹Buteyi nebumukuate ku tshikankanyi; neahie ku disoka.

¹⁰Badi bamusokokela disoka mu buloba bua kumukuata nʼadi, badi bamuteya ne buteyi bua tshilamba mu nshila wandi.

¹¹Malu a buowa adi amutshinyisha ku nseke yonso, adi amulonda ku nyima, adi amuihata.

¹²Nzala neidie bukole buandi buonso, dibutuka nedimuindile mu nshila.

¹³Disama nedidie dikoba diandi; muanʼa bute wa lufu neadie hidimba biandi.

¹⁴Nebamuhatule mu ntenta wandi wakadiye weyemena, nebalue nʼandi ku mpala kua mukelenge udi ukuatshisha buowa.

¹⁵Mu ntenta wandi nemuikale bintu bidi kabiyi biandi, nebamuangalashe soufre mu muaba wakadiye ushikama.

¹⁶Miji yandi neyume muinshi, nebahempe matamba andi kulu.

¹⁷Tshivulukidi tshia bualu buandi netshijimine ha buloba, dina diandi kadiena dimanyibue mu ditunga.

¹⁸Nebamuihate mu munya bua kuyeye mu mîdima, nebamuihate ha buloba.

¹⁹Yeye kena ne muana anyi kankanunuina munkatshi mua bantu bandi, kakuena muntu washala ne muoyo mu miaba yakadiye ushikama.

²⁰Badi[18] bamulonda nebakeme bua dituku diandi dia lufu, bakadianjila ku mpala kuandi nebakuatshike buowa bukole.

²¹Bulelela, ebu mbualu budi bukuata nsubu ya bantu babi, eu mmuaba wa muntu udi kayi mumanye Nzambi.