Read tshiluba Yobo 21 Bible Online

Yobo 21 - tshiluba bible

Yobo 21

¹Hashishe, Yobo wakakudimuna Sofâ ne,

²Telejai matshu enu ku dî dianyi bimpe, ne bua kuteleja kuenu kuikale bu busambi kundi.

³Itabusha ngakule, hanamana kuakula, wewe udi mua kunseka.

⁴Meme hanyi, ndi utontolola muntu, anyi? Tshiena mua kuzuka ne muoyo bua tshinyi?

⁵Nuntangile, nukeme, tekai bianza ku mishiku.

⁶Hanavuluka muanda eu, ndi ne dishina, buowa budi bunkuata.

⁷Bualu kai bantu babi badi bashala ne muoyo, balua banunu ne bikala ne bukole bua bungi?

⁸Bana bakalelabo ne tunkanunuma tuabo badi bajadikibua ku mesu kuabo ne badi ha buihi nʼabo, maminu abo adi enjibua nunku: ku mesu kuabo.

⁹Mu nsubu yabo mudi ditalala, kamuyi buowa, mulangala wa Nzambi kawena uyikuma.[21]

¹⁰Mulume wabo wa ngombe udi wimitshisha mafu, kena uhanga; mukashi wabo wa ngombe udi ulela bana, kena utula difu.

¹¹Badi balekela bana babo bakese bua bendakane bu tshisumbu tshia mikoko, ne bana bakalelabo badi baja maja.

¹²Badi bimba misambu ne mazele ne lunzenze, badi basanka helabo nshiba.

¹³Matuku abo onso adi ahita anu ne diakalengele, mu katuha kihi badi bahueka mu Muaba wa Bafue.

¹⁴Kadi badi bambila Nzambi ne, Umuka kutudi; katuena basue kumanya nshila yebe.

¹⁵Wa Bukole Buonso udi tshinyi, bua tuetu kumukuatshila mudimu? Bidi bitukuatshisha munyi bua tuetu kumutendelela?

¹⁶Tangilai, diakalengele diabo kadiena dilua kudibo ku bukole buabo, meji a bantu babi adi kule nʼanyi.

¹⁷Misangu bungi munyi idibo bajima muinda wa bantu babi,[22] anyi makenga adi afika kudibo anyi Nzambi udi ubatahuluila ntatu[23] mu tshiji tshiandi?

¹⁸Misangu ya bungi idibo bu bisonsa ku luhehele, ne bu bisote bidi nvunde uhehula?

¹⁹Nudi nuamba ne, Nzambi udi ukengesha bana ba muntu mubi bua bubi bua tatu wabo; mbimpe akengeshe muntu eu nkayandi, bua yeye amanye mua kunvua dikenga bu mudidi.

²⁰Mesu andi mene amone kubutuka kuandi, yeye mene anue tshiji tshikole tshia Wa Bukole Buonso.

²¹Bua yeye udi ne disanka kai kudi ba mu nsubu muandi badi bashala ku nyima kuandi hashika ngondo yandi ha buloba?

²²Muntu neamanye mua kuyisha Nzambi lungenyi, anyi, yeye ngudi ulumbuluisha ba mu diulu?

²³Muntu udi ufua hashika bukole buandi, kayi ne lutatu, muikale ne ditalala.

²⁴Mpanza yandi idi miule tente ne mabele, ne buongo bua mu mifuba yandi butshidi buhishi.

²⁵Mukuabo udi ufua ne mutshima unyingalala bikole, kayi muanze kuheta tshintu tshimpe nansha musangu umue.

²⁶Bubidi buabo badi balala mu buloba muomumue, ne bikusu bidi bibadia.

²⁷Bushuwa, ndi mumanye meji enu, ne meji a budimu anudi nʼau munda muenu bua kungenzela bibi.

²⁸Bualu bua nudi nuamba ne. Nsubu wa mukokeshi udi kudi kunyi? Ntenta wakadi bantu babi bashikame udi kudi kunyi?

²⁹Kanuakukonka bahitshi ba mu nshila, anyi? Kanuena bamanye bifuanyikishi bidibo banulesha bua bualu ebu ne,

³⁰Badi basungila muntu mubi dituku dia dikenga, ne badi bahehula dituku dia tshiji tshikole, anyi?

³¹Muntu kai wamubela ku mesu kuandi bua bienzedi biandi? Muntu kai wamufuta bua malu akenzeye?

³²Badi baya nʼandi ku lukita, ne banga bantu badi balama majambu andi.

³³Mabuwa a mu tshibanda adi amusankisha, ne bantu bonso badi bamulonda, bu muakenzabo kudi bakuabo ku mpala kuandi badi kabayi mua kubadibua.

³⁴Nunku nudi nukeba kunsamba ne mei a hatuhu munyi? Bualu bua mei anudi nunkudimuna adi anu mei a kundinga.