Read tshiluba Yobo 38 Bible Online

Yobo 38 - tshiluba bible

Yobo 38

¹Hashishe, Yehowa wakandamuna Yobo dî dihatuka mu nvunde ne,

²Eu nganyi udi usokoka meji mu mîdima ku mei adi kâyi ne lungenyi?

³Suika mukaba webe mu tshimono bu muntu mulume; bualu bua nenkukonke ma makuabo, ne wewe ummanyisheu.

⁴Wewe wakadi kudi kunyi hanakujadika bishimikidi bia buloba? Amba biebe, biwikala ne lungenyi lua kujingulula bua ebu.

⁵Wakasungula bidikishilu biabu nganyi, biwamanya mua kungambila? Anyi wakolola muonshi wa luidi ha mutu habu nganyi?

⁶Bakajadika bitekelu bia makunshi abu ha binganyi, ne wakaladika dibue dia ku ditumba diabu mu muaba wadi nganyi,

⁷bakimba mitoto ya nkesha misambu diatshimue, ne hakela bana balume bonso ba Nzambi mbila yabo bua disanka diabo?

⁸Nganyi wakinshidila mai manene bibi, hakahatukau, mûmuke munda mua buloba bu mudi muana umuka mu difu dia mamu wandi;

⁹hanakavuisha matutu bu tshivualu tshiau, ne mîdima mikole bu mukaba wa kuajingila;

¹⁰hanakâjadikila mukulu wanyi unakausunguila diambedi, ne hanakautekela nkanu a kuakanyika ne bibi kabidi;

¹¹ne hanakamba bianyi ne, Nuemanye mua kufika aku, kadi kuhitshi nansha; ne kunu mene nebalekeshe kudibandisha kua mavuala ebe?

¹²Katshia wabanga matuku ebe wewe wakuelela lunkelu mukenji, anyi? Wakalesha kabundubundu muaba waku uwakakasunguila,

¹³bua koko kakuate matengu a buloba, ne bua koko kitshikishilemu bantu babi, anyi?

¹⁴Buloba budi buandamuka bu mudi dima diandamuka muinshi mua tshiamu tshidi tshifundahu tshimanyinu, bintu biabu bionso bidi bimueneka bu tshivualu tshilengele.

¹⁵Munya wabu udi umushibua kudi benji ba malu mabi, ne diboko didi didibandisha didi ditshibuka.

¹⁶Wewe wakuya tô ne ku mishimi ya muinshi mua mai manene, anyi? Wakuendakana mu mikele ya mu ndondo wa mai manene, anyi?

¹⁷Bakusokoluela bibi bia ku lufu, anyi? Wewe wakumona bibi bia ku mundidimbi wa lufu, anyi?

¹⁸Wakajingulula butshiama bua buloba, anyi? Ungambileku, biwamanya malu au onso.

¹⁹Nshila wa ku muaba udi munya mushikame udi hanyi? Midima kabidi idi ne muaba wai kudi kunyi

²⁰bua wewe Umanye mua kuyifila tô ne ku butshika buai, ne bua wewe umanye nshila ya ku nsubu wai?

²¹Wewe udi mumanye muanda eu, bualu bua bakakulela mu diba adi, ne bungi bua matuku ebe budi bukumbane be!

²²Wakufika ku nsubu idibo babutshilamu neige, anyi wakumona nsubu idibo babutshilamu mabue a mashika,

²³bindi inulame tô ne hafika tshikondo tshia dikenga, hafika dituku dia nvita ne dia kubishangana, anyi?

²⁴Nshila kai udi uya ku muaba udi munya muabanyibua ha buloba? Luhehele lua ku esete ludi ludimuangalasha ha buloba mu muaba kai?

²⁵Nganyi wakabandila mai a nvula nshila yau, ne nshila ya makubakuba kuyialamu,

²⁶bua kulokesheye nvula ha buloba budi kabuyi ne bantu, ne mu tshihela mudi kamuyi muntu;

²⁷bua kukutshisha buloba budi binyanguke ne buatuke, ne bua kutolosha mashinde a lutende?

²⁸Nvula udi ne tatu wandi, anyi? Wakalela mamata a mume nganyi?

²⁹Mabue a mai makuatakasha kudi mashika[40] akahatuka mu difu dia nganyi? Wakalela dibungi[41] dia mu diulu udi mukuatakasha kudi mashika nganyi?

³⁰Mai adi akuatakana bikole bu mabue, ha mutu ha mai hadi hakuatakana bu dibue.

³¹Wewe udi mumanye mua kusuika nkanu ya ku mitoto ya Tshidiminanzashi,[42] anyi kusulula mukaba wa mitoto[43] ya nyama ne mbua ne muntu?

³²Udi mua kulombela mitoto ya mu Mazalota[44] mu tshikondo tshiai, anyi? Udi mua kulombela mutoto wa Ourse Munene[45] ne bana bandi, anyi?

³³Wewe udi mumanye mikenji idi Nzambi welela bintu bia mu diulu, anyi? Udi mua kubilongoluela bukokeshi buabi ha buloba, anyi?

³⁴Udi mua kuhandisha dî diebe tô ne ku matutu, bua mai a nvula a bungi akubuikile, anyi?

³⁵Udi mua kutuma miele ya nvula bua yoyo iye, ne bua ikuambile kabidi ne, Ka tuetu aba?

³⁶Wakuteka meji munda mua mu ntu nganyi? Wakuha mutshima wandi dijingulula dia malu nganyi?

³⁷Udi mua kubala bungi bua matutu ku meji andi nganyi? Udi uhumuna mai a nvula mafume mu diulu

³⁸halua lusenga kudiungusha mu mishiki, ne halua mabuwa kulamatangana nganyi?

³⁹Wewe udi mua kukebela mukashi wa nyama wa ntambue bintu bia kudieye, anyi udi mua kumana nzala ya bana ba ntambue

⁴⁰habutamabo mu mikele yabo, ne halaminabo bia kudia mu tshihuka, anyi?

⁴¹Udi uhesha nyunyu wa tshikololo tshia kudia tshiandi, hadila bana hatshi kudi Nzambi, ne hendakanabo kabayi ne bia kudia nganyi?