Read tshiluba Yobo 42 Bible Online

Yobo 42 - tshiluba bible

Yobo 42

¹Hashishe, Yobo wakakudimuna Yehowa dî ne,

²Ndi mumanye ne, Wewe udi ne bukole bua kuenza malu onso, ne kakuena muntu udi mua kukanda bualu buwakuhangidisha.

³Nganyi udi usokoka meji hadiye kayi ne lungenyi? Nunku nakuamba malu andi tshiyi mujingulule bimpe, malu adi atamba kunkemesha anakadi tshiyi mumanye.

⁴Ndi nkusengelela ne, Unvue, nenkuambile bualu; nenkukonke, ne wewe ummanyishe.

⁵Nakunvua lumu luebe diambedi anu ku matshu, kadi mpindiu mesu anyi akukumona.

⁶Bua muanda eu ndi mudihishe, ndi ukudimuna mutshima wanyi, ndi nsomba mu luhuishi ne mu butue.

⁷Kakambila Yehowa Yobo mei â, Yehowa wakambila Elifaza, Muena Temana, ne, Tshiji tshianyi tshidi tshitema kudi ne kudi balunda bebe babidi. Bualu bua kanuakuamba mei malelela bua bualu buanyi, bu mudi muntu wanyi Yobo wamba.

⁸Nunku nudiangatshile balume ba ngombe muanda mutekete ne bimpanga muanda mutekete, nuye nʼabi kudi muntu wanyi Yobo. Nubifile bu milambu ya kuosha bua bualu buenu; ne muntu wanyi Yobo nennulombele Nzambi. Bualu bua ne-ngunvue disengelela diandi bua bualu buenu, bua tshinuenzedi bibi bua buhote buenu. Bua kanuakuamba mei malelela bua bualu buanyi, bu muakuamba muntu wanyi Yobo.

⁹Hashishe, Elifaza, Muena Temana, Biledada, Muena Shuhi, ne Sofa, Muena Namata, bakaya kuenza bu muakabambila Yehowa; ne Yehowa wakitabusha disengelela dia Yobo.

¹⁰Yehowa wakakudimuna dikenga dia Yobo, wakamu hingishila diakalengele, hakalombeleye balunda bandi Nzambi. Yehowa wakavudisha bintu bia Yobo bihite bia diambedi misangu ibidi.

¹¹Hashishe, bana babo ba balume bonso ne bana babo ba bakashi bonso ne bonso bakadi balunda bandi diambedi bakalua kumumona, bakadia nʼandi bia kudia mu nsubu muandi. Bakamulesha luse luabo, bakamusamba bua makenga onso akadi Yehowa mumutumine. Muntu yonso wakamuha tshituha tshimue tshia tshiamu tshia or ne kakanu ka or ka ku munu.

¹²Yehowa wakasankisha Yobo mu matuku andi a kunshikidilu ne disanka dihite diakadiye nʼadi mu matuku a ku tshibangidilu. Yeye wakadi ne mikoko binunu dikumi ne binai, tumelo binunu bisambombo, ne ngombe ibidi ibidi ku tshikokedi tshimue bu bikokedi tshinunu ne bakashi ba nyama ya mpunda tshinunu.

¹³Yobo wakaheta bana ba balume muanda mutekete ne bana ba bakashi basatu.

¹⁴Wakidika muanʼa bute wa bakashi dina ne, Yemima; muibidi ne, Kesia; ne muanʼa mukala ne, Kelene-hapuka.

¹⁵Mu buloba abu buonso kabakâsangana bakashi bakuabo ne mpala milengele bu muakadi bana ba bakashi ba Yobo. Tatu wabo wakabaha buhianyi munkatshi mua bana babo ba balume.

¹⁶Ku nyima kua malu au Yobo wakashala ne muoyo bidimu lukama ne makumi anai; ne bua muanda eu wakamona bana bandi ba balume ne bana ba bana bandi ba balume, tô ne ku milongo inai.

¹⁷Nunku Yobo wakafua, muntu mununu, matuku andi mule tente ne disanka.