Read tshiluba Yobo 5 Bible Online

Yobo 5 - tshiluba bible

Yobo 5

¹Ela di diebe mpindiu; mukuabo udiku udi mua kuitaba kûdi, anyi? Neuye kudi muntu kai wa munkatshi mua ba tshijila?

²Bulelela, kanyinganyinga kadi kashiha muhote, ne tshiji tshidi tshishika mujibale.

³Nakumona muhote hakadiye ubanga kuela miji yandi mu buloba; kadi nakela nsubu wandi mulau lukasa.

⁴Bana bandi badi kule ne luhandu, badi babutudibua mu tshilumbuluidi tshia ku tshibi, kabayi ne muntu wa kubahandisha.

⁵Udi ne nzala udi udia bintu biakahuolabo, udi ubinyenga munkatshi mua meba mene; ne banyenga badi bubulula mukana bua kumina bintu biabo.[4]

⁶Bualu bua makenga kaena atoloka mu dinfuenkenya, lutatu kaluena lumena mu buloba;

⁷Kadi muntu udi uledibua bua kukengeye, bu mudi nsase iya mulu.

⁸Kadi meme hanyi nakadi kukeba Nzambi, nakadi kufila tshilumbu tshianyi mu bianza bia Nzambi,

⁹udi wenza malu manene ne malu adi bantu kabayi mua kujingulula, ne malu a kukema adi kâyi mua kubadibua:

¹⁰udi Ulokesha nvula ha buloba, udi utuma mai mu madimi;

¹¹udi ubandisha bantu bahuekele mulu, udi ujula badi badila bua bobo bikale ne luhandu;

¹²udi uhumbisha malu adi bena budimu bahangidisha, nunku bianza biabo kabiena bimanye mua kubalubuluila bualu buakuhangabo;

¹³udi ukuata bena meji mu budimu buabo;[5] ne meji adi bena budimu bahangidisha adi malekedibue.

¹⁴Badi basangakana ne mîdima mu munya, badi benda babubuta munda munya bu mudibo benza mundankulu.

¹⁵Kadi Nzambi udi Usungila bahele ku muele wa nvita wa mukana muabo, udi ubasungila mu bianza bia bantu bakole.

¹⁶Nunku bahele badi ne diteke mena, ne bubi budi bubuikila mukana muabu.[6]

¹⁷Mona, muntu udi Nzambi ubela udi ne disanka;[7] nunku kubengi dikengesha didi Wa Bukole Buonso ukuyisha nʼadi.[8]

¹⁸Bualu bua yeye udi utaha mputa, kadi udi umujingila kabidi; udi ukuma, kadi bianza biandi bidi bishikisha disama.

¹⁹Neakuhandishe ku makenga asa mbombo, e, nansha mu makenga muanda mutekete bualu bubi kabuena bukulenga.

²⁰Halua tshiole, yeye neakuhandishe ku lufu; halua nvita, neakuhandishe ku bukole bua muele wa nvita.

²¹Neakusokoke halua bena bunsonge, kuena utshina kabutu haluaku.

²²Neuseke kabutu ne tshiole, kuena utshina nyama ya ha buloba.

²³Bualu bua neuhunge tshihungidi ne mabue bua kânyangi madimi ebe, ne nyama ya mu mpata neyikale nʼebe ditalala.

²⁴Neumanye ne, Ntenta wanyi udi ne diakalengele, ne hawaya kutangila luhangu luebe lua bimuna, kuena usangana tshintu tshimue tshijimine.

²⁵Neumanye kabidi ne, Tunkanu nuina tuanyi tudi tuvulangana, ne bana banyi baledibue badi bu mashinde a ha buloba.

²⁶Neubuele mu lukita luebe hawalua muntu mukole, bu tshisumbu tshia blé tshidibo babanda nʼatshi ku tshishihuidi mu tshikondo tshiabobeye.

²⁷Ke muanda eu: tuakumana kukeba kûjingulula, ne udi wa bushuwa; Wewe ûnvue, ûmanye kabidi bua wowo wikale bu diakalengele diebe.