Read tshiluba Misambu 107 Bible Online

Misambu 107 - tshiluba bible

Misambu 107

¹Sakidilai bienu Yehowa, bualu bua yeye udi muimpe; bua luse luandi ludi lujalame tshiendelele.

²Bantu badi Yehowa muhikule bambe biabo nunku, bobo mene badiye muhikule mu bianza bia muena lukuna,

³hakumusheye mu maloba onso bua kubasangisha hamue, a ku luseke lua esete ne ku wesete, a ku luseke lua nôde ne ku sude.

⁴Bakendakana mu tshihela, mu tshihela tshia lusenga muakadi kamuyi nshila; kabakasangana musoko bua kushikamamu.

⁵Bakadi ne nzala ne nyota, mitshima[106] yabo yakahanga munda muabo.

⁶Nunku bakadila kudi Yehowa mu ntatu yabo, ne yeye wakabahandisha mu makenga abo.

⁷Yeye wakabalombola mu nshila mululame, bua bamanye mua kufika mu musoko wa kushikamabo.

⁸Basakidile biabo Yehowa bua luse luandi lujalame ne bua bienzedi biandi bia kukema bidiye wenzela bana ba bantu!

⁹Bualu bua yeye udi uha muntu tshidiye ujinga, ne udi ukutshisha muena nzala ne bintu bimpe.

¹⁰Banga bantu aba bakashikama mu mîdima ne mu mufitu muhite bukole, bakadi basuikibua mu makenga ne mu nkanu ya tshiamu tshifike,

¹¹bualu bua bakatombokela mei a Nzambi, bakalengulula lungenyi luakadi Mutambe Bunene wa mu diulu mubaleshe.

¹²Bua malu â yeye wakahuekesha mitshima yabo ne mudimu mukole; bakadishinda hanshi, kakuakadi wa kubakuatshisha.

¹³Nunku bakadila kudi Yehowa mu ntatu yabo, ne yeye wakabahandisha mu makenga abo.

¹⁴Wakabaluhula mu midima ne mu mufitu mukole, wakatshibula nkanu yabo bituha.

¹⁵Basakidile Yehowa bua luse luandi lujalame ne bua bienzedi biandi bia kukema bidiye wenzela bana ba bantu!

¹⁶Bualu bua wakutshibula bibi bia tshiamu tshia mitaku, wakukosa milonda ya tshiamu tshifike yakabikuata.

¹⁷Bantu bahote badi badivuishila dikenga bua diya diabo mu nshila wa ditombokela diabo, ne bua malu abo a tshishiku.

¹⁸Mitshima yabo idi ikenuka mishindu ya bia kudia yonso; badi basemena ha buihi ne bibi bia ku lufu.

¹⁹Nunku bakadila kudi Yehowa mu ntatu yabo, ne yeye wakabahandisha mu makenga abo.

²⁰Wakabatumina dî diandi, wakashikisha masama abo, wakabahandisha mu dibutuka diabo.

²¹Basakidile Yehowa bua luse luandi lujalame ne bua bienzedi biandi bia kukema bidiye wenzela bana ba bantu!

²²Bafile milambu kudiye ya kumusakidila nʼai, bambile bantu bienzedi biandi ne misambu ya disanka!

²³Bakahueka ku mai manene mu matu, bendulula mushinga ha mai manene,

²⁴bakamona biabo bienzedi bia Yehowa, ne malu andi a kukema mu mai a ndondo.

²⁵Bualu bua wakela mukenji, wakahehesha tshihehele tshiakadi bu tshihuhu, tshiakabandisha mavuala a mu mai manene.

²⁶Bakabanda mulu, bakahueka kabidi muinshi mu mai a ndondo, mitshima yabo yakandamuka bu mai bualu bua lutatu.

²⁷Bakatenkakana eku ne eku, bakadi balendukalenduka bu muntu mukuatshike maluvu, meji abo onso akabuelakana.

²⁸Nunku bakadila kudi Yehowa mu ntatu yabo, ne yeye wakabahandisha mu makenga abo.

²⁹Wakaholesha tshihuhu bua tshituye biatshi, mavuala a mai manene akabatama.

³⁰Ka bobo bakasanka bualu bua mavuala au akabatama, ne yeye wakabafikisha mu dilobo diakasuabo kufikamu.

³¹Basakidile biabo Yehowa bua luse luandi lujalame ne bua bienzedi biandi bia kukema bidiye wenzela bana ba bantu!

³²Bamunemeshe mu disangisha dia bantu, bamutumbishe mu tshishikaminu tshia bakulu.

³³Udi ukudimuna misulu bua kuluayi tshihela tshia lusenga, ne mishimi ya mai bua kuluayi buloba budi kabuyi ne mai.

³⁴Udi ukudimuna buloba bufuke bua kuluabu tshihela tshia luehu, bua malu mabi a bantu badi bashikamemu.

³⁵Udi ukudimuna tshihela tshia lusenga bua kuluatshi dishiba dia mai, ne buloba bûme bua kuluabu mishimi ya mai.

³⁶Mu miaba yaya udi ushikamisha badi ne nzala, bua baseku musoko wa kushikamamu.

³⁷Badi bakuna maminu mu madimi, badi batentula mionshi ya tumuma mu manga madimi, badi bahuola mamuma mavulangane.

³⁸Udi ubavudishila disanka, badi bavulangana ba bungi; kena witabusha bua bungi bua bimuna biabo bukehe.

³⁹Hadi bungi buabo bukeheshibua, ne hadibo bahuekeshibua hanshi bua dikengeshibua diabo ne ntatu ne kanyinganyinga,

⁴⁰yeye udi uhongolola kulengulula kuandi ha baminyampala, udi ubendakasha mu muaba wa hatuhu mudi kamuyi nshila.

⁴¹Kadi udi ushikika bahele mu muaba wa mulu bumushibue biabo mu dikenga, udi ukumbasha bena meku babo bu tshisumbu tshia mikoko.

⁴²Bantu bakane badi batangila bualu ebu, badi basanka; benji ba malu mabi badi bahuwa biabo.[107]

⁴³Udi ne meji adimuke biandi bua malu â; bantu belangane meji a luse lujalame lua Yehowa.