Read tshiluba Misambu 132 Bible Online

Misambu 132 - tshiluba bible

Misambu 132

¹Yehowa, mubike Davidi mu ntatu yandi yonso.

²Uvuluke muakaditshiheye kudi Yehowa, muakalayeye Nzambi Mukole wa Yakoba ne,

³Bulelela, tshiena mbuela mu nsubu wanyi wa ntenta, tshiena mbanda ha bulalu buanyi;

⁴tshiena ngitabusha bua tulu tunkuate ku mesu anyi, anyi bua tulu tukole tubuikile bilafinyi bianyi;

⁵tô ne hanaheta muaba wa Yehowa kuikaleyemu, nsubu wa Nzambi Mukole wa Yakoba kuikaleyemu.

⁶Monai, tuakunvua lumu lua muaba eu mu Efelata, tuakûmona mu madimi a mu Yala.[130]

⁷Tubuele mu muaba mudiye muikale, tumutendelele ku ditanda dia muinshi mua makasa andi.

⁸Juka[131] biebe, Yehowa, uye ku tshikishilu tshiebe, wewe muine ne mushete wa tshihungidi wa bukole buebe.

⁹Baluatshishe bakuidi bebe ne buakane, bansanto bebe bele mbila bua disanka diabo.

¹⁰Bualu bua muena mudimu webe Davidi, kubengi mpala wa webe ûdi muele manyi ha mutu.

¹¹Yehowa wakaditshiha kudi Davidi ne mutshima udi wa bushuwa, kena ukudimuka bua kubenga dî diandi ne, Neashikike wahatuka munda muebe mu nkuasa webe wa bukelenge.

¹²Biatumikila hana bebe tshihungidi tshianyi ne mikenji yanyi bindualua kubayisha, bana babo baledibue nebashikame mu nkuasa webe wa bukelenge tô ne tshiendelele.

¹³Bualu bua Yehowa wakusungula Siona; wakamunanga bu muaba wandi wa kuikaleye, wamba ne,

¹⁴Etshi ntshikishilu tshianyi tô ne kashidi. Nengikaleku, bualu bua ndi mutshinange.

¹⁵Nenyudishile bia kudia bia musoko eu disanka dikumbane; nengukutshishe bahele badimu ne bia kudia.

¹⁶Nenduatshishe bakuidi badimu luhandu, bansanto badimu nebele mbila bua disanka diabo.

¹⁷Mu musoko au nemmueneshile Davidi lusengu; nakulongoluelamu undi muele manyi muinda.

¹⁸Nenduatshishe bena lukuna bandi bundu, ka dî tshifulu tshiandi tshia butumbi netshikenke ku mutu wandi.