Read tshiluba Misambu 148 Bible Online

Misambu 148 - tshiluba bible

Misambu 148

¹Tumbishai Yehowa! Tumbishai Yehowa, nuenu ba mu diulu; numutumbishe mu miaba ya mulu!

²Numutumbishe, nuenu banjelo bandi bonso; numutumbishe, nuenu misumba yandi yonso!

³Numutumbishe, nuenu diba ne ngondo; numutumbishe, nuenu mitoto yonso idi itema!

⁴Umutumbisha, wewe diulu dia ha mutu ha diulu; nuenu, mai adi ha mutu ha diulu, numutumbishe!

⁵Bionso bitumbishe dina dia Yehowa; bua yeye wakela dî diandi, biakafukibua.

⁶Wakabidika kabidi bua kuikalabi tô ne kashidi. Wakabelela mukenji udibi kabiyi bisambuka.

⁷Tumbishai Yehowa, nuenu bia ha buloba, nuenu nyama minene ya mu mai manene, ne ndondo yonso;

⁸kahia ne mabue a nvula, neige ne dibungi, tshihehele tshikole tshidi tshitumikila mukenji wandi!

⁹Mikuna mile ne mikuna mihi yonso, mitshi idi ikuama mamuma ne mitshi ya cèdre yonso, himutumbishe!

¹⁰Nyama ya mu tshisuku ne bimuna bionso, bintu bidi bidikoka hanshi ne nyunyu yonso idi ihahala, bimutumbishe!

¹¹Bakelenge ba ha buloba ne bukua bantu bonso, baminyampala ne balumbuluishi bonso ba ha buloba, bamutumbishe!

¹²Bansongalume ne bansongakashi kabidi, bantu banunu ne bana, bamutumbishe!

¹³Batumbishe dina dia Yehowa, bualu bua dina diandi nkayadi didi ditumbishibua; butumbi buandi budi ha mutu ha buloba ne diulu.

¹⁴Yeye wakuambuila bantu bandi lusengu, wakudivuisha[143] wa kutumbishibua kudi bansanto bandi bonso, kudi bantu ba mu Isalele badi ha buihi nʼandi. Tumbishai Yehowa!