Read tshiluba Misambu 33 Bible Online

Misambu 33 - tshiluba bible

Misambu 33

¹Nuenu bantu bakane, nusanke mu Yehowa. Kutumbisha Nzambi kudi kuakanangana ne bantu bakane.

²Nusakidile Yehowa ne tshisanji, numuimbile misambu ya kumutumbisha nʼai ne lunzenze ludi ne nshinga dikumi.

³Numuimbile musambu muhia-muhia, numuimbile ne tshimbilu tshimpe ne kuela kua mbila ya disanka.

⁴Bualu bua dî dia Yehowa didi diakane, udi wenza mudimu wandi wonso ne lulamatu lua bushuwa.

⁵Yeye udi unanga buakane ne kulumbulula kuakane, buloba budi bûle tente ne luse lujalame lua Yehowa.

⁶Ku dî dia Yehowa bintu bia mu diulu bia kufukibua, tshisumbu tshiabi tshionso tshiakafukibua ku muhuya wa mukana muandi.

⁷Udi ukungisha mai a mu mai manene mimane dibula; udi ubutshila ndondo ya mai manene mu bibutshilu.

⁸Ba ha buloba bonso batshine Yehowa; bonso badi bashikame ha buloba bikale ne buowa ku mpala kuandi.

⁹Bualu bua yeye wakamba dî diandi, ne buloba buakadiku; wakela mukenji, buakajalama.

¹⁰Yehowa udi uvuisha meji adi ba mu bisamba bia bantu bahangidisha malu a hatuhu; udi uhumbisha malu adi bantu bahangidisha bua kuenzabo.

¹¹Lungenyi ludi Yehowa usungula ludi lujalama tshiendelele, meji adiye uhangidisha mu mutshima wandi adi ajalama tô ne ku bikondo bionso.

¹²Disanka didi kudi tshisamba tshidi ne Yehowa bu Nzambi watshi, mbantu bakusunguleye bua kuikalabo buhianyi buandi mene!

¹³Yehowa udi utangila hanshi, hadiye mu muaba wandi wa mu diulu, udi umona bana bonso ba bantu.

¹⁴Ku muaba udiye mushikame udi ujosha talalâ bonso badi bashikame ha buloba,

¹⁵yeye udi ufuka mitshima ya buonso buabo, udi umona bienzedi biabo bionso.

¹⁶Mukelenge kena usungidibua ku tshisumbu tshinene tshia masalayi, muena bukitu kena uheta luhandu ku bukole buandi bunene.

¹⁷Kabalu ka nvita kadi tshintu tshia hatuhu kudi badi batekemena luhandu kudiku; kakena mua kusungila bantu ku bukole buaku bunene.

¹⁸Monai, mesu a Yehowa adi kudi badi bamutshina, adi kudi badi ne ditekemena diabo mu luse luandi lujalame,

¹⁹bua yeye asungile mioyo yabo ku lufu, ne bua kubalama bua bikale ne muoyo halua tshiole.

²⁰Muoyo wetu udi windila Yehowa; yeye udi dikuatshisha dietu ne ngabu wetu.

²¹Bua mitshima yetu idi isanka kudiye, bualu bua tudi tueyemena dina diandi dia tshijila.

²²Yehowa, luse luebe lujalame luikale kutudi, bu mutudi tutekemena kudi.