Read tshiluba Misambu 38 Bible Online

Misambu 38 - tshiluba bible

Misambu 38

¹Yehowa, kumbedi mu tshiji tshiebe, kunkengesha mu kufika kuebe kua munda.

²Bualu bua mikete yebe yakubuela munda muanyi; tshianza tshiebe tshiakuhueka hamʼbidi hanyi bikole.

³Kakuena bukole mu misunyi yanyi bualu bua tshiji tshiebe; kakuena bukole kabidi mu mifuba yanyi bualu bua bubi buanyi.

⁴Bualu bua malu mabi anyi akûla, akuhita ha mutu hanyi. Bu bujitu bunene, adi atamba kunnemena bujitu.

⁵Mputa yanyi idi inunka muhuya mubi idi ihatula tufina, bualu bua buhote buanyi.

⁶Ndi ne nyima mukobame ne dikenga, ndi muhuekeshibue bikole; ndi ngendakana ndila dinda tô ne ku dilolo.

⁷Bualu bua mulemba wanyi udi mûle tente ne disama didi dingosha, kakuena bukole mu misunyi yanyi.

⁸Nakubanga ne ndi mutshibuke bikole; ndi ntua mikemu bualu bua dihampakana dia mu mutshima wanyi.

⁹Mukelenge, malu onso andi musue adi ku mpala kuebe; kuhumuna kuanyi kakuena kusokokibua kûdi.

¹⁰Mutshima wanyi udi ukuma, bukole buanyi budi bumuka kundi; munya wa mu mesu anyi kawenaku — wowo kabidi wakumuka kundi.

¹¹Banangi banyi ne balunda banyi badi bashilangana nʼanyi bualu bua disama dindi nʼadi, ne bana betu badi bimana ha bule.

¹²Bantu badi bakeba kumana muoyo wanyi badi banteyela ndende yabo, badi bakeba kungenzela bibi badi bamba mei bualu bua kabutu, ne badi belangana meji a kudinga nʼau dinda tô ne ku dilolo.

¹³Kadi meme hanyi ndi bu muena bitshi, tshiena ngunvua; ndi bu kamama kadi kakayi kabulula mukana muaku.

¹⁴Bulelela, ndi bu muntu udi kayi unvua, ne udi kayi ne mei mukana muandi a kukudimuna nʼau badi bamubanda.

¹⁵Bualu bua kûdi wewe, Yehowa, kundi ntekemena; wewe neubakudimune dî, Mukelenge Nzambi wanyi.

¹⁶Bualu bua nakamba ne, Kabasanki bua bualu buanyi, badi badibandisha ku mpala kuanyi, haselemuka dikasa dianyi.

¹⁷Bualu bua ndi ngamba kudishinda, ne kanyinganyinga kanyi kadi ku mpala kuanyi matuku onso.

¹⁸Bualu hua ndi ntonda dihambuka dianyi ku buakane, ndi nyingalala bualu bua bubi buanyi.

¹⁹Kadi bena lukuna banyi badi batantamena, badi bakole; badi bankina hatuhu badi bavulangana.

²⁰Badi bampingashila malu mabi ku malu mimpe badi nʼanyi lukuna, bualu bua ndi ndonda muanda udi muimpe.

²¹Yehowa, kundekedi nansha! Nzambi wanyi, kuikadi nʼanyi kule!

²²Udiendeshe lubilu bua kunkuatshisha, Mukelenge, luhandu luanyi!