Read tshiluba Misambu 42 Bible Online

Misambu 42 - tshiluba bible

Misambu 42

¹Bu mudi ngulungu uhuyakana, ujinga mai adi a musulu udi uhueka, nunku muoyo[25] wanyi udi uhuyakana, ukujinga, wewe, Nzambi.

²Muoyo wanyi udi ne nyota ya kumona Nzambi, ya kumona Nzambi udi ne muoyo. Nenye kumueneka ku mesu kua Nzambi tshikondo kai?

³Binsonshi bianyi biakulua bia kudia bianyi munya ne butuku, hatshidi bantu bankonka dinda tô ne ku dilolo ne, Nzambi webe udi hanyi?

⁴Ndi nvuluka malu â handi mpumuna muoyo munda muanyi: bu munakaya ne tshisumbu tshia bantu, bu munakabalombola benda mu mulongo bua kuyabo ku nsuhu wa Nzambi, bela biabo mbila ya disanka ne bimba misambu ya kumutumbisha nʼai. Bakadi tshisumbu tshinene tshia bantu bavuluka biabo dituku dia tshijila.

⁵Mutshima[26] wanyi, wewe udi muitshikile bua tshinyi? Udi ulubakana munda muanyi bua tshinyi? Wikale ne ditekemena diebe mu Nzambi; bualu bua nemmutumbishe kabidi, bualu bua yeye udi luhandu luanyi ne Nzambi[27] wanyi.

⁶Mutshima wanyi udi muitshikile munda muanyi, bua bualu ebu ndi nkuvuluka wewe, Nzambi, mubange ku buloba bua Yadene ne bua mu mikuna ya Hêmona, ne ku mukuna wa Misâ.

⁷Ndondo wa mai udi Ubikila ndondo mukuabo hunvueye tshiona tshia bibila biebe. Mavuala ebe ne mambuanka ebe onso akuhita ha mutu hanyi.

⁸Mu munya Yehowa neantumine luse luandi lujalame ku dî diandi, ne butuku musambu undi mmuimbila nengikale nʼau, mutendelelu mene undi utendelela nʼau Nzambi wa muoyo wanyi.

⁹Nengambile Nzambi, dibue dianyi, ne, Wakuhua bualu buanyi muoyo bualu kai? Ndi ngenda ndila bua dinkengesha kudi muena lukuna bua tshinyi

¹⁰Bu mudibo batshibula mifuba yanyi, bena lukuna banyi badi bampenda, hatshidibo bankonka dinda tô ne ku dilolo ne, Nzambi webe udi hanyi?

¹¹Mutshima wanyi, wewe udi muitshikile bua tshinyi? Udi ulubakana munda muanyi bua tshinyi? Wikale ne ditekemena diebe mu Nzambi; bualu bua nemmutumbishe kabidi bualu bua yeye udi luhandu[28] luanyi ne Nzambi wanyi.