Read tshiluba Misambu 44 Bible Online

Misambu 44 - tshiluba bible

Misambu 44

¹Nzambi, tuakunvua ku matshu etu, batatu betu bakuambila, bua malu awakenza mu matuku abo, mu matuku akahita kale.

²Wewe wakihata bisamba bia bantu ne tshianza tshiebe; kadi wakashilaku batatu mu buloba. Wakakengesha bantu bakuabo, kadi wakavudisha batatu mu miaba yonso.

³Bualu bua kabakadinyengela buloba abu ku muele wabo wa nvita, ne diboko diabo kadiakabasungila mu nvita; kadi tshianza tshiebe tshia balume ne diboko diebe ne munya wa ha mpala hebe biakabasungila. Bualu bua wewe wakadi nʼabo luse.

⁴Nzambi, wewe udi Mukelenge wanyi; wele dî diebe bua Yakoba ahite bukole mu nvita.

⁵Ku dikuatshisha diebe tudi mua kushindika badi nʼetu lukuna hanshi. Mu dina diebe tudi mua kudiata badi babika kutuluisha muinshi mua makasa etu.

⁶Bualu bua tshiena ngeyemena buta buanyi, ne muele wanyi wa nvita kawena mua kunsungila.

⁷Kadi wewe wakusungila mu bianza bia badi nʼetu lukuna, wakufuisha badi batulama bundu.

⁸Tuakuditumbisha bualu bua Nzambi dinda tô ne ku dilolo, netuele dina diebe tuasakidila tshiendelele.

⁹Kadi mpindiu wewe wakutûmusha, wakutukehesha; kuena uluhuka bua kulombela bisumbu bietu bia bena nvita.

¹⁰Udi utuhingasha tshianyima bua kunyema badi nʼetu lukuna. Badi nʼetu lukinu badi badinyengela bintu bietu.

¹¹Wakutuvuisha bu mikoko misungula bua kudia, wakutumuangalasha munkatshi mua bisamba bia bantu.

¹²Udi uhana bantu bebe ku mushinga wa hatuhu, kuakuheta[32] luhetu lua bungi ku mushinga wabo.

¹³Udi utuvuisha bu tshintu tshia kulondabo kudi bena mutumba nʼetu, bu tshintu tshia kuhetulabo ne kusekabo kudi bantu badi batunyunguluka.

¹⁴Udi utuyisha bu lusumuinu ludibo bela munkatshi mua bisamba bia bantu, bu tshintu tshia kukuhilabo mitu munkatshi mua bantu.

¹⁵Dinda tô ne ku dilolo kukeheshibua kuanyi kudi ku mpala kuanyi, ne bundu budi bunkuata ku mesu kuanyi,

¹⁶bualu bua dî dia muntu udi unseka ne umpenda ne mei mabi, bualu bua mpala wa muena lukuna ne musombuedi udi umueneka kundi.

¹⁷Malu â onso akufika kutudi, kadi katuakukuhua muoyo, katuakushiha mei a tshihungidi tshiebe ne mashimi etu.

¹⁸Mitshima yetu kayakuhinguluka, biendedi bietu kabiena bisesuka bua kumukabi mu nshila webe,

¹⁹bua wewe wakuntshibula bituha bituha bua muanda eu mu muaba wa mizeu, ne bua wewe wakutubuikila mu mîdima mikole.

²⁰Bituahua dina dia Nzambi wetu muoyo, anyi bituolola bianza bietu kudi nzambi wa bende,

²¹Nzambi kena ukeba bualu ebu bua kubusokolola, anyi? Bualu bua yeye udi mumanye meji adi masokoka mu mutshima.

²²E, bua[33] bualu buebe tudi tushihibua dinda tô ne ku dilolo; tudi lubadibue bu mikoko ya kushihabo.

²³Mukelenge, utabale! Udi ulala tulu bua tshinyi? Bika; kumbengi tshiendelele!

²⁴Udi usokoka mpala webe bua tshinyi? Udi uhua dikenga dietu ne dikengeshibua dietu muoyo bua tshinyi?

²⁵Bualu bua muoyo[34] wetu udi muiname hanshi mu dinfuenkenya, mibidi yetu idi milamike ku buloba.

²⁶Juka biebe bua kutukuatshisha, utuhikule bua luse luebe lujalame.