Read tshiluba Misambu 45 Bible Online

Misambu 45 - tshiluba bible

Misambu 45

¹Mutshima wanyi udi uhumuna mei adi mimpe. Ndi ngamba ne, Musambu[35] wanyi udi bualu bua mukelenge. Ludimi luanyi ludi bu mutshi wa mai wa mufundi udi ufunda lubilu.

²Wewe udi uhita bana balume ba bantu bonso bulengele; badi bateka kalolo mukana muebe; nunku Nzambi wakukuvudishila disanka tshiendelele.

³Luata muele webe wa nvita ha lubese luebe, wewe muena bukitu; luata butumbi buebe ne buneme buebe.

⁴Mu butumbi buebe wende biebe utamba bukole mu nvita bua malu a bushuwa, a kalolo ne a buakane. Tshianza tshiebe tshia balume tshikuyishe bienzedi bidi bikuatshisha bantu buowa.

⁵Mikete yebe idi mitue — bantu badi bahona ku mpala kuebe — idi ibuela mu mitshima ya bena lukuna ba mukelenge.

⁶Nzambi,[36] nkuasa webe wa bukelenge udiku tô ne tshiendelele; dikombo dia buakane ndikombo dia bukelenge buebe.

⁷Udi unanga malu makane ne udi ne malu mabi lukuna. Bua bualu ebu Nzambi, Nzambi webe mene, wakukuna manyi a disanka ha mutu hebe ne diela dia manyi ditamba diakeleye bakuebe.

⁸Bivualu biebe bionso bidi binunka muhuya wa myrrhe,[37] wa aloes ne wa casse. Tshiona tshia bisanji tshidi tshifuma mu mbalasa ya mibanga tshidi tshikusankisha.

⁹Bana bakashi ba bakelenge badi bashikama munkatshi mua bakashi bebe badi ne butumbi. Mukelenge mukashi webe udi wimana ku tshianza tshiebe tshia balume muluate or wa ku Ofî.

¹⁰Wewe, muanʼanyi mukashi, ungunvuile, welangane meji, ne uteleje matshu ebe. Uhue bantu bebe ne nsubu wa tatu webe muoyo;

¹¹nunku mukelenge neasue bulengele buebe. Bualu bua yeye udi mukelenge webe, umukukuile.

¹²Ba[38] mu Tulo nebalue kûdi ne diha, badi bahita bubanji munkatshi mua bantu nebakebe diakalengele kûdi.

¹³Muana mukashi wa mukelenge udi ne butumbi buonso mu nsubu wa munda mua mbalasa wa mukelenge. Bilulu biandi bidi bitedibue ne buanda bua or.

¹⁴Badi baya nʼandi kudi mukelenge muluate bilulu bitedibue ne malenda. Bansongakashi batshidi tumama, balunda bandi, badi bamulonda, badi bafidibua kûdi.

¹⁵Badi babafila ne disanka ne musangelu, badi babuela mu mbalasa wa mukelenge.

¹⁶Bana bebe ba balume ba wakalela nebahingane mu muaba wa batatuʼebe; neubavuishe bakokeshi mu miaba yonso ya ha buloba.

¹⁷Nenvuishe dina diebe bu dina didibo bavuluka mu bikondo bionso; nunku bantu nebakutumbishe tô ne kashidi.