Read tshiluba Misambu 52 Bible Online

Misambu 52 - tshiluba bible

Misambu 52

¹Wewe, muena tshinyangu mukole, udi ufuna bulobo[44] mu malu mabi ebe bua tshinyi? Luse lujalame lua Nzambi ludiku matuku onso.

²Ludimi luebe ludi luamba malu a kabutu awakuhangidisha, ludi bu dihaya ditue, wewe muenji wa malu a lubombo.

³Wewe udi utamba kunanga malu mabi ku mpala kua malu mimpe; wewe udi utamba kunanga kuamba kua mashimi ku mpala kua kuamba kua mei a bushuwa.

⁴Wewe, ludimi ludi ludinga bantu, udi unanga mei onso adi abutula bantu.

⁵Nzambi neakubetekashe tshiendelele. Neakukuate, neakubatule mu ntenta webe; neakujomone, neakûmushe mu buloba bua badi ne muoyo.

⁶Bantu bakane nebatangile bualu ebu, nebatshine, nebamuseke ne,

⁷Mona muntu eu wakadi kayi uvuisha Nzambi tshieyemenu tshiandi, kadi wakeyemena dilengama dia biuma biandi, wakadikolesha mu malu mabi andi.

⁸Kadi meme hanyi ndi bu mutshi wa olive utshidi usampila mu nsubu wa Nzambi. Ndi ngeyemena luse lua Nzambi tô ne tshiendelele.

⁹Nenkusakidile tô ne tshiendelele, bualu bua wakuenza bualu ebu. Nentekemene dina diebe ku mpala kua bansanto bebe, bualu bua didi dimpe.