Read tshiluba Misambu 55 Bible Online

Misambu 55 - tshiluba bible

Misambu 55

¹Nzambi, teleja matshu ku kulomba kuanyi, kusokomi bua kunvu biebe kutendekena kuanyi.

²Teleja matshu ebe, witabe kundi. Ndi nsasakata ne meji adi antatshisha, ndi ne bualu bua kutua mikemu bikole,

³bualu bua dî dia muena lukuna, bualu bua dinkengesha dia bantu babi. Bualu bua badi bavuisha malu mabi bua kukulukau hamʼbidi hanyi, ne mu tshiji tshiabo badi bangenzela bibi.

⁴Mutshima wanyi udi unyingalala munda muanyi, buowa bua lufu budi bunkuate.

⁵Kutshina ne kuzakala kudi kufika kundi, kuvuayila kudi kukuata mubidi wanyi wonso.

⁶Ndi ngamba ne, Nakadi kusua kuikala ne mahuahua a nyunyu bu mudi nyunyu wa nkutshi nʼau! Nunku nakadi kutua mulelu bua kuya kule, nakadi kushikamaku mu ditalala,

⁷eyo, nakadi kunyema kule, nakadi kushikama mu tshihela.

⁸Nakadi kudiendesha lubilu bua kuheta bianyi tshinyemenu bua kunyema tshihehele tshikole ne tshihuhu.

⁹Mukelenge, ubutule malu adibo bahangidisha, uhandulule ndimi yabo, bualu bua ndi mmona tshimbambila ne ditandangana mu musoko.

¹⁰Munya ne butuku badi banyunguluka musoko, benda ha mutu ha ngumbu yau. Kunyanguka ne mukodi bidi munkatshi muau,

¹¹kubutuka kudi munkatshi muau. Kunyenga kua bintu ku bukole ne mashimi kabiena biumuka mu muaba wau wa tshisalu.

¹²Keni muena lukuna udi umpenda — nakadi kumanya mua kuitabusha muanda wawa; kem muntu udi unkina udi udibandisha ne diambu ku mpala kuanyi — ka nakadi kumanya mua kusokoma bua tshikadi ku mesu kuandi.

¹³Kadi nguewe mene, muntu unakadi mbala ne, Udi muomumue nʼanyi, muntu unakeyemena ne wakadi mulunda wanyi unakamanya bimpe.

¹⁴Tuakadi tuyikilangana hohamue ne diyiki dimpe; tuakadi tuenda nʼebe diatshimue ne tshisumbu tshia batendeledi bua kubuela mu nsubu wa Nzambi.

¹⁵Dibutuka dikuluke hamʼbidi habo, bahueke biabo ne muoyo tô ne ku Muaba wa Bafue, bualu bua malu mabi adi mu nsubu yabo ne munkatshi muabo.

¹⁶Kadi meme hanyi nendibikidile Nzambi; Yehowa neansungile.

¹⁷Dilolo ne dinda ne ha diba dia munda munya ndi musue kumuambila meji adi antatshisha, ndi ntua mikemu, ne yeye neunvue dî dianyi.

¹⁸Yeye neuhikule muoyo[45] wanyi talalâ munkatshi mua nvita indi nduangana, bualu bua badi baluangana nʼanyi badi ba bungi.

¹⁹Nzambi neunvue dî diabo, yeye mene udi mushikame mu nkuasa wa bukelenge hu muakadiye ku tshibangidilu neabakengeshe, bualu bua kabena ne dikudimuka dia malu abo, ne kabena batshina Nzambi.

²⁰Eu wakolola bianza biandi bua kulenga bakadi nʼandi talalâ, wakanyanga tshihungidi tshiandi tshiakahungeye nʼabo.

²¹Mukana muandi muakatamba manteke kuikala ne busenu, kadi nvita yakadi mu mutshima wandi. Mei andi akahita manyi kusenunuka, kadi akadi miele ya nvita mihatula mu luhaha.

²²Teka bujitu buebe hamʼbidi ha Yehowa, ne yeye neakukoleshe; kena witabusha tshiendelele bua bantu bakane banyungishibue.

²³Kadi wewe Nzambi, neutulule bantu aba hanshi tô ne ku ndondo wa dijimba dia kabutu; bantu badi bamatshisha mashi ne badi badinga kabena bashala ne muoyo tshituha tshia hankatshi tshia matuku abo. Kadi meme nenkueyemene wewe.