Read tshiluba Misambu 84 Bible Online

Misambu 84 - tshiluba bible

Misambu 84

¹Yehowa wa misumba, ke mudi muaba webe ûdi mushikame mulengele nunku!

²Mutshima[78] wanyi udi ujinga, e, ndi muhange ne dijinga dia biendedi bia mu tshitendelelu tshia Yehowa. Mutshima wanyi ne mubidi[79] wanyi bidi biela mbila bua Nzambi wa muoyo.

³E, mushamusha wakudisanganyina nsubu, ne kandindi kakadisanganyina disua dia kutekamu bana baku; bidi hehi ne bioshelu biebe, Yehowa wa misumba, Mukelenge wanyi ne Nzambi wanyi.

⁴Disanka didi kudi bantu badi bashikame mu nsubu muebe! Batshidi bakutumbisha.

⁵Disanka didi kudi bantu badi ne bukole buabo kûdi, badi ne nshila ya ku Siona mifunda mu mitshima yabo!

⁶Hahitshiabo mu tshibanda tshia Baka,[80] badi batshivuisha muaba wa mishimi ya mai; e, nvulʼa mbedi udi utshibuikila ne bintu bivuishila bantu disanka.

⁷Badi baya ku bukole ne bukole; muntu yonso wa munkatshi muabo udi umueneka ku mpala kua Nzambi mu Siona.

⁸Wewe Yehowa Nzambi wa misumba, unvua kutendelela kuanyi; wewe Nzambi wa Yakoba, uteleje matshu ebe kundi.

⁹Mona, wewe Nzambi, ngabu wetu, utangile mpala wa muntu webe udi muedibue manyi ha mutu!

¹⁰Bualu bua dituku dimue mu biendedi bia mu tshitendelelu tshiebe didi dihita matuku tshinunu a kukuabo buimpe. Nakadi kusungula bua kuimana ku mbelu kua nsubu wa Nzambi wanyi ku mpala kua kushikama mu ntenta ya malu mabi.

¹¹Bualu bua Yehowa Nzambi udi diba ne ngabu; Yehowa udi uha bantu luse ne butumbi. Kena uhala badi benda mu buakane tshintu tshimpe tshimue.

¹²Yehowa wa misumba, disanka didi kudi muntu udi ukueyemena!