Read tshiluba Misambu 86 Bible Online

Misambu 86 - tshiluba bible

Misambu 86

¹Yehowa, uteleje matshu ebe, witabe kundi, bualu bua ndi muhele, ndi nkengela bintu.

²Ulame muoyo wanyi, bualu bua ndi muntu udi munange Nzambi; wewe Nzambi wanyi, usungile muntu webe udi ukueyemena.

³Unfuile luse, Mukelenge, bualu bua ndi ndila kûdi dinda tô ne ku dilolo.

⁴Usankishe muoyo[81] wa muntu webe, Mukelenge, bualu bua ndi ngambula mutshima wanyi kûdi.

⁵Bualu bua wewe, Mukelenge, udi muimpe, ne mutshima webe udi musue kubuikidila bantu mihi yabo; udi mûle tente ne luse lujalame kudi bonso badi bakubikila,

⁶Yehowa, uteleje matshu ebe ku kutendelela kuanyi, unvue dî dia mitendekenu yanyi.

⁷Mu dituku dia dikenga dianyi nenkubikile; bualu bua wewe newitabe kundi.

⁸Mukelenge, kakuena umue bu wewe munkatshi mua nzambi ya hatuhu; kakuenaku minga midimu bu midimu yebe.

⁹Ba mu bisamba bionso bia bantu biwakufuka nebalue kukukuila ku mesu kuebe, Mukelenge, nebatumbishe dina diebe.

¹⁰Bualu bua wewe udi munene, ne udi wenza malu a kukema; anu wewe nkayebe udi Nzambi.

¹¹Unyishe nshila webe, Yehowa, bua ngende mu bushuwa buebe; uvuishe mutshima wanyi mutshima[82] umue udi utshina dina diebe.

¹²Mukelenge Nzambi wanyi, nenkuele tuasakidila ne mutshima wanyi wonso, nentumbishe dina diebe tshiendelele.

¹³Bua luse luebe lujalame lûdi undesha ludi lunene; bualu bua wakuhandisha muoyo wanyi ku ndondo wa mu Muaba wa Bafue.

¹⁴Nzambi, badi badisue bakujuka bua kuntantamena, tshisumbu tshia bena tshimbambila tshiakukeba muoyo wanyi, kabakukuteka wewe ku mpala kuabo.

¹⁵Kadi wewe, Mukelenge, udi Nzambi udi ufuila bantu luse ne diakalengele; udi ne lutulu ludi lukanda tshiji tshiebe, udi mûle tente ne luse lujalame ne lulamatu lua bushuwa.

¹⁶Uhingane kundi, unfuile luse; uhe muntu webe bukole buebe, usungile muana wa balume wa muntu webe mukashi.

¹⁷Undeshe tshimanyinu tshia disanka diebe kundi, bua badi nʼanyi lukuna bamanye mua kutshimona, bafuishibua bundu; bualu bua wewe, Yehowa, wakunkuatshisha, wakunsamba.