Read tshiluba Misambu 88 Bible Online

Misambu 88 - tshiluba bible

Misambu 88

¹Yehowa, Nzambi wa luhandu luanyi, nakudila ku mpala kuebe munya ne butuku.

²Mutendelelu wanyi ufike ku mpala kuebe, uteleje matshu ebe ku muadi wanyi.

³Bualu bua mutshima[84] wanyi udi mûle tente ne ntatu, ne muoyo wanyi udi usemena hehi ne Muaba wa Bafue.

⁴Badi bambala ne bayaya mu Dijimba dia Bafue; ndi bu muntu udi kayi ne bukole.

⁵Udibo bashiya hatuhu munkatshi mua bafue, bu bantu bashihibue badi balala mu nkita, baudi kuyi uvuluka kabidi, kadi badi bumushibue ku tshianza tshiebe.

⁶Wewe wakundadika mu ndondo wa Dijimba, mu miaba ya mu midima, idi munda mua buloba mene.

⁷Tshiji tshiebe tshidi tshinnemeshila bujitu hamʼbidi hanyi, wewe wakukengesha ne mavuala ebe onso.

⁸Wakumusha balunda banyi kundi, wakubateka kule; wakunvuisha tshintu tshia bobo kukenuka. Ndi mukomena, tshiena mua kuluhukamu.

⁹Mesu anyi adi alua bitayitayi bualu bua makenga. Yehowa, nakukubikila ku dituku ku dituku, nakuolola bianza bianyi kûdi.

¹⁰Udi wenzela bantu bafue malu a kukema, anyi? Bantu[85] bakumana kufua badi mua kujuka bua kukubingisha, anyi?

¹¹Luse luebe lujalame ludi mua kuambibua mu lukita, anyi? Lulamatu luebe lua bushuwa ludi mua kuambibua mu Kabutu,[86] anyi?

¹²Malu ebe a kukema adi mua kumanyibua mu midima, anyi? Buakane buebe budi mua kumanyibua mu buloba budi bantu ne tshihua muoyo, anyi?

¹³Kadi meme hanyi, Yehowa, nakudila kûdi; hatshia butuku, kutendelela kuanyi nekufike kûdi.

¹⁴Yehowa, udi umusha muoyo wanyi ku mpala kuebe bua tshinyi? Udi usokoka mpala webe kundi hua tshinyi?

¹⁵Ndi mukengeshibue ne nakadi hehi ne lufu ku matuku a buana buanyi tô ne mpindiu. Nakumana kukenga ne malu ebe adi ankuatshisha buowa tô ne handi ngamba kuhanga.

¹⁶Tshiji tshiebe tshikole tshiakuhita ha mutu hanyi; bienzedi biebe bidi bintshinyisha bikole biakumbutula.

¹⁷Biakunyunguluka bu mai mavulangane dinda tô ne ku dilolo, biakunyengela nseke yonso, buonso buabi diatshimue.

¹⁸Wewe wakumusha muntu udi unnanga ne mulunda wanyi kundi, wakubateka kule, bandi ntamba kumanya bimpe badi ba mu mîdima.