Read tshiluba Misambu 89 Bible Online

Misambu 89 - tshiluba bible

Misambu 89

¹Nengimbe bua luse lujalame lua Yehowa kashidi; mukana muanyi nemumanyishe bantu tô ne ku bikondo bionso mudi lulamatu luebe lua bushuwa.

²Bualu bua nakuamba ne, Luse luebe lujalame neluibakibue tshiendelele; nenjadike lulamatu luebe lua bushuwa mu diulu mene.

³Nakuhunga tshihungidi ne muntu unakusungula, nakuditshiha kudi Davidi muntu wanyi ne,

⁴Nenjadike tunkanunuma tuebe tshiendelele, nengase nkuasa webe wa bukelenge tô ne ku bikondo bionso.

⁵Yehowa, bia mu diulu nebitumbishe malu ebe a kukema; nentumbishe lulamatu luebe lua bushuwa mu disangisha dia ba tshijila.

⁶Nganyi udi mu diulu udi mua kuelekeshibua ne Yehowa? Nganyi munkatshi mua bana halume ba bakole ba mu diulu udi mua kufuanangana ne Yehowa,

⁷nNzambi udibo batshina bikole mu disangisha dia ba tshijila, Udi utamba bonso badi bamunyunguluka kutshinyishibua?

⁸Yehowa Nzambi wa misumba, udi ne bukole bu mûdi wewe, Yehowa, nʼabu nganyi? Lulamatu luebe lua bushuwa ludi lukunyunguluka.

⁹Udi ukokesha kutuntumuka kua mai manene; habanda mavuala au, wewe udi wabutamisha.

¹⁰Wewe wakabetekasha Lahaba,[87] wakamuvuisha bu tshitalu tshia muntu mushihibue, wakamuangalasha badi nʼebe lukuna ne diboko diebe dikole.

¹¹Diulu ndiebe, buloba mbuebe kabidi; wewe muine wakasa buloba ne bintu bionso bidimu.

¹²Wewe wakafuka luseke lua ku nôde ne lua ku sude; mukuna wa Tabô ne wa Hêmona idi isanka bua dina diebe.

¹³Wewe udi ne diboko didi ne bukole; tshianza tshiebe tshidi tshikole, tshianza tshiebe tshia balume tshidi tshibandishibue kulu.

¹⁴Buakane ne kulumbulula kuakane bidi bishimikidi bia nkuasa webe wa butumbi; luse lujalame ne lulamatu lua bushuwa bidi bienda ku mpala kuebe.

¹⁵Disanka didi kudi bantu badi bamanye tshiona[88] tshia badi basanka. Yehowa, badi benda biabo mu munya wa ha mpala hebe.

¹⁶Badi basanka mu dina diebe dinda tô ne ku dilolo, ne bua buakane buebe badi batumbishibue.

¹⁷Bualu bua wewe muine udi butumbi bua bukole buabo; ne bua dianyisha diebe kutudi wewe udi ubandisha lusengu luetu mulu.

¹⁸Bualu bua ngabu wetu ngua Yehowa; mukelenge wetu ngua Wa Tshijila wa Isalele.

¹⁹Mu dituku adi wewe wakambila muntu webe uwakananga[89] dî mu tshikena kumona ne, Nakuteka dikuatshisha[90] dianyi hamʼbidi ha muena bukitu, nakubandisha muntu unakusungula munkatshi mua bantu.

²⁰Nakusangana Davidi, muntu wanyi; nakumuela manyi anyi a tshijila ha mutu handi;

²¹tshianza tshianyi netshimujadike, diboko dianyi kabidi nedimukoleshe.

²²Muena lukuna kena umubunda yeye kayi muanze kudimuka, muena malu mabi kena umukengesha.

²³Nembetekashe bena lukuna bandi ku mpala kuandi, nenkume badi nʼandi lukuna ne lufu.

²⁴Lulamatu luanyi ne luse luanyi lujalame nebikale nʼandi; ne mu dina dianyi nebabandile lusengu luandi mulu.

²⁵Nenteke tshianza tshiandi ha mai manene, ne tshianza tshiandi tshia balume ha misulu ya mai.

²⁶Yeye neangele dî ne, Wewe udi Tatu wanyi, Nzambi wanyi, ne Dibue dia luhandu luanyi.

²⁷Nemmuvuishe muanʼa bute wanyi, mukelenge udi muhite bakelenge ba ha buloba kutumba.

²⁸Nemmutekele luse luanyi lujalame kashidi; tshihungidi tshianyi netshishale tshihungidi tshidiye mua kueyemena.

²⁹Nenjadike mulongo wa tunkanuniuna tuandi bua wikaleku tshiendelele, nenjadike nkuasa wandi wa bukelenge bua ikaleku bu mudi diulu dikalaku ne matuku adi.

³⁰Biabenga bana bandi diyisha dia mikenji yanyi, bikalabo kabayi benda mu mei andi mbambila;

³¹bianyangabo mei anakabafundile bua kuenzabo, biahidiabo kutumikila mikenji yanyi;

³²hashishe, nembakengeshe bua matomboka abo ne mulangala, nembakengeshe bua mahambuka abo ne mikumu ya nsokotshi

³³Kadi tshiena ngumusha luse luanyi lujalame kudiye kashidi, tshiena mudinge ku lulamatu luanyi.

³⁴Tshiena nshiha tshihungidi tshianyi, tshiena ukudimuna dî diakahatuka mukana muanyi.

³⁵Nakaditshiha mu kudijidila kuanyi musangu umue tshiendelele ne, Tshiena ndinga Davidi nansha.

³⁶Milongo ya tunkanunuma tuandi neyilondangane kashidi, nkuasa wandi wa bukelenge neikaleku ku mpala kuanyi bu mudi diba tshiendelele.

³⁷Neajadikibue tshiendelele bu mudi bikondo bia ngondo bijadikibue, mumanyi wa mu diulu udi mujalame.

³⁸Kadi mpindiu wewe wakumubenga, wakumuhetula, wewe udi nukuatshile ne muntu webe uwakuela manyi ha mutu handi tshiji.

³⁹Wakuhidia tshihungidi tshiwakahunga ne muntu webe, wakunyenga tshifulu tshiandi tshia butumbi, wakutshiela hanshi ha buloba.

⁴⁰Wakushimbula ngumbu yandi yonso; wakubutula misoko yandi minyungulula ne ngumbu ya nvita.

⁴¹Bonso badi bahitaku mu nshila badi banyenga bintu biandi; yeye muine wakulua bu tshintu tshia bena mutumba nʼandi kuhendabo.

⁴²Wewe wakubandisha tshianza tshia bukole tshia bena lukuna bandi mulu; wakusankishe mitshima ya bonso badi nʼandi lukuna.

⁴³E, wakutshihasha ditua dia muele wandi wa nvita, kuakumujadika bua yeye kudimanyika mu nvita.

⁴⁴Wewe wakuhuwisha butumbi buandi, wakuela nkuasa wandi wa bukelenge hanshi ha buloba.

⁴⁵Wakukehesha matuku a bunsongalume buandi, wakumufuisha bundu ku mesu tente.

⁴⁶Yehowa, bualu ebu nebulehe musangu bule munyi? Neusokome kashidi, anyi? Tshiji tshiebe netshiteme, netshioshe bu kahia, musangu bule munyi?

⁴⁷Uvuluke bukese bua matuku anyi; uvuluke bu muwakafukila bana bonso ba bantu hatuhu!

⁴⁸Muntu kai wamanya mua kushala ne muoyo kayi utangila lufu? Wamanya mua kuhandisha muoyo wandi mu bukole bua Muaba wa Bafue nganyi?

⁴⁹Mukelenge, luse luebe lujalame luwakadi nʼalu diambedi, luwakaditshiha nʼalu kudi Davidi bualu bua lulamatu luebe kudiye ludi kudi kunyi?

⁵⁰Mukelenge, uvuluke bihendu bidibo bahenda nʼabi bantu bebe. Uvuluke mundi utuala bihendu bia bantu ba bungi mu tshiadi tshianyi,

⁵¹biakutuhendabo nʼabi kudi bantu badi nʼebe lukuna, Yehowa, biakusekabo nʼabi biendedi bia makasa a muntu webe muedibue manyi ha mutu.

⁵²Yehowa avudishibue disanka tshiendelele! Amen ne Amen.