Read tshiluba Misambu 92 Bible Online

Misambu 92 - tshiluba bible

Misambu 92

¹Bidi bimpe bua kusakidila Yehowa, ne bua kuimba misambu ya kutumbisha nʼai dina diebe, Nzambi Mutambe Bunene wa mulu.

²Bidi bimpe bua kuambila bantu bua luse luebe lujalame ne dinda, ne bua kubamanyisha dilolo bu mûdi wewe mua kueyemenyibua,

³hatudi tukuimbila misambu ne lunzenze ludi ne nshinga dikumi ne ku tshisanji mene; hatudi tuimba ne tshiona tshimpe tshia lunkombe.

⁴Bualu bua wewe, Yehowa, wakunsankisha bua bienzedi biebe; bua midimu ya ku bianza biebe nengimbe misambu ya disanka.

⁵Mona mudi bienzedi biebe binene, Yehowa! Meji ebe adi atamba bule!

⁶Muntu udi kayi ne meji kena mumanye bualu ebu, ne muntu mujibale kena ubujingulula:

⁷ne, Biadiunda bantu babi bu mudi mashinde atoloka, ne bikala benji ba malu mabi bonso ne diakalengele, budi bua bobo kujimishibua tshiendelele.

⁸Kadi wewe, Yehowa, udi mushikame mu muaba udi kulu kashidi.

⁹Bua mona, hadi nʼebe lukuna, Yehowa; bua mona, badi nʼebe lukuna nebajimine; benji ba malu mabi bonso nebamuangalashibue.

¹⁰Kadi wewe wakubandisha lusengu luanyi bu lua mbowa, wakungela manyi mahia-mahia ha mutu hanyi.

¹¹Mesu anyi akumona mulau wakukuata badi hanyi lukuna; matshu anyi akunvua bua dibutuka dia bakumbunda nvita.

¹²Bantu bakane badi bakola bu dibue dia ngashi, badi baleha bu mutshi wa cèdre wa mu Lebanona.

¹³Badi bakunyibua mu nsubu wa Yehowa, badi bakola mu biendedi bia tshitendelelu tshia Nzambi wetu.

¹⁴Nebakuame mamuma tô ne mu bununu buabo, nebikale mitshi miule tente ne mai ne idi mibishi tshiendelele,

¹⁵bua kuleshabo bantu ne, Yehowa udi muakane. Yeye udi dibue dianyi dia mutunda, kakuena bualu bubi munda muandi.