Read tshiluba Nsumuinu 1 Bible Online

Nsumuinu 1 - tshiluba bible

Nsumuinu 1

¹Nsumuinu ya Solomo, muana wa Davidi, mukelenge wa Isalele:

²Bua bantu bamanye lungenyi ne diyisha, bua bajingulule mei a meji.

³Bua bahete diyisha dia mua kuenza bienzedi bia meji, dia mu buakane, dia mu dikosa diakane dia nsambu, ne dia mu kulumbulula kuakane.

⁴Bua kuha muntu udi kayi mutantamane mu lungenyi budimu, bua kulesha nsongalume meji ne bukole bua kuhangidisha malu makane.

⁵Muena meji unvue biandi, adiunde mu malu adibo bamuyisha; muena dijingulula dia malu ahete meji adi amukuatshisha bua kuenza bimpe:

⁶bua kujingululeye lusumuinu ne tshifuanyikishi, mei a bena meji ne majimba abo.

⁷Ditshina dia Yehowa ntshibangidilu tshia lungenyi; bahote badi bahetula meji ne diyisha.

⁸Muanʼanyi, unvue diyisha dia tatu webe, kuhidi diyisha dia mamu webe.

⁹Bualu bua biobi nebikale tshitotolo tshilengele tshia ku mutu webe, ne nkanu ya mu nshingu muebe.

¹⁰Muanʼanyi, biakuteya bantu babi, kuitabushi nansha.

¹¹Biambabo ne, Lua kutudi, tualamine muntu bua kumatshisha mashi andi hanshi, tulale bu bena lusoko bua kukuata bantu badi kabayi ne bualu,

¹²tubamine hatshidibo ne muoyo bu mudi Muaba wa Bafue wenza, hatshidibo ne bukole buonso bua mubidi; bu mudi bantu bahueka mu Dijimba dia Bafue.

¹³Netusangane biuma bionso bia mushinga mukole, netûshe nsubu yetu tente ne bintu bitudi tunyenga.

¹⁴Biwaya nʼetu, netusangishe bintu bietu bionso mu tshibutshilu tshimue.

¹⁵Muanʼanyi, kuendi nʼabo mu nshila umue nansha, ukande dikasa diebe bua kadidiatshi mu nshila yabo.

¹⁶Bua makasa abo adi aya lubilu ku malu mabi, badi baya lukasa bua kumatshisha mashi hanshi.

¹⁷Kuanda bukuondo ku mesu kua nyunyu kudi hatuhu;

¹⁸ne bantu aba badi balamina mashi abo nkayabo, badi balala bu bena lusoko bua mioyo yabo mene.

¹⁹Nshila ya bonso badi ne lukuka lua kunyenga bintu ku bukole idi nunku; ludi lujimisha mioyo ya badi nʼalu.

²⁰Meji adi ela dî dikole mu musesu, adi abandisha dî diau mu bisalu.

²¹Adi ela dî ku masangu a nshila ya mitoyi. Ku tshibuelelu tshia mu bibi bia mu musoko adi amba mei â ne

²²Nuenu batshimbakanyi, nenunange butshimbakane musangu bule munyi? Badi babuidia nebasanke mu kubuidia kuabo, bahote nebakine lungenyi musangu bule munyi?

²³Andamukai bua kunvua kubela kuanyi. Monai! Nennuitshikishile nyuma wanyi hamʼbidi henu, nennumanyishe mei anyi.

²⁴Bualu bua nakunubikila, ne nuenu nuakuhidia kunvua. Nakuolola tshianza tshianyi, kakuakadi muntu wakuitaba.

²⁵Nuakulengulula lungenyi luonso lunakunulesha kabidi, kanuakadi basue kunyua kubela kuanyi.

²⁶Meme kabidi nenseke halua dikenga dienu; nennubingile hanukuata buowa;

²⁷hanukuata buowa bu mudi tshihuhu tshibika, halua dikenga dienu bu mudi tshinvunde tshilua, hanukuata ntatu ne kanyinganyinga.

²⁸Hashishe nebambikile, kadi tshiena ngitaba; nebankebe ne lukunukunu, kadi kabena bansangana.

²⁹Bualu bua bakakula lungenyi, kabakasungula ditshina dia Yehowa.

³⁰Kabakasua kuitabusha lungenyi lunakabalesha, bakahetula kubela kuanyi kuonso.

³¹Bua malu â nebadie mamuma adi bienzedi biabo bikuama, nebukute ne malu adibo bahangidisha.

³²Bualu hua dihingana tshianyima dia batshimbakanyi nedibashihe, ne kalengu ka bahote nekababutule.

³³Kadi muntu yonso udi ungunvuila neashikame talalâ, neikale holâ kayi ne ditshina dia dikenga dibi.