Read tshiluba Nsumuinu 11 Bible Online

Nsumuinu 11 - tshiluba bible

Nsumuinu 11

¹Tshiamu tshidibo bidikisha nʼatshi bujitu tshia mashimi tshidi tshitondesha Yehowa, kadi bujitu budibo bidikisha biakane budi disanka diandi.

²Halua kudibandisha, bundu bulualua kabidi; kadi meji adi kudi bantu bahuekele.

³Butoke bua mutshima bua bantu bakane nebubalombole; kadi kuhambuka kua bedi ba tshitungu nekubabutule.

⁴Biuma kabiena bikuatshisha muntu mu dituku dia tshiji tshikole, kadi buakane budi bumuhandisha ku lufu.

⁵Buakane bua muena mutshima mutoke budi bululamisha nshila wandi, kadi muntu mubi neadishinde ku bubi buandi yeye.

⁶Buakane bua bantu bakane budi bu babandisha, kudi bedi ba tshitungu badi bakuatshibua ku lukuka luabo mene.

⁷Hafua muntu mubi, ditekemena diandi didi dijimina; ditekemena dia badi beyemena bukole didi dijimina.

⁸Badi babandisha muntu muakane mu dikenga, ne muntu mubi udi uhinganamu.

⁹Mufudi wa mei a Nzambi udi ubutula muena mutumba nʼandi ne mei andi, kadi bantu bakane nebahandishibue ku lungenyi.

¹⁰Bikala bantu bakane ne diakalengele, ba mu musoko badi basanka; hajimina bantu babi, badi bela mbila ya disanka.

¹¹Bikala bantu bakane ne disanka, musoko udi mutumbishibue, kadi udi ubutudibua mukana mua bantu babi.

¹²Udi ulengulula muena mutumba nʼandi kena ne meji, kadi udi ujingulula mianda udi uhuwa biandi.

¹³Udi wendakana bu muena mukoso udi usokolola malu masokoka, kadi udi mua kueyemenyibua udi usokoka dî didibo bamuambila.

¹⁴Bikalaku kakuyi bulombodi, bantu badi badishinda hanshi; kadi mu tshisumbu tshinene tshia bafidi ba meji mudi luhandu.

¹⁵Muntu ndi weyeka muntu wa bende tshieya neatate, kadi udi ukina kueyela kua bieya udi ushala talalâ.

¹⁶Mukashi udi ne kalolo udi uheta butumbi, bena tshimbambila badi baheta bubanji.

¹⁷Muena luse udi wenzela muoyo[19] wandi bimpe, kadi muena lukisu udi ukengesha mubidi wandi.

¹⁸Muntu mubi udi wangata difutu didi dimudinga, kadi udi ukuna buakane udi uheta difutu dia bushuwa.

¹⁹Udi mushindame mu buakane neahete muoyo, kadi ndi ulonda bubi neafue biandi.

²⁰Badi ne mitshima ya tshitshu badi batondesha Yehowa, kadi badi bakane tshishiki mu bienzedi biabo badi bamusankisha.

²¹Manya bimpe ne, Muntu mubi kena uhanga kukengeshibua, kadi tunkanunuma tua bantu bakane neluhandishibue.

²²Bu mudi lukanu lua or mu diulu dia ngulube mbu mudi mukashi wa mpala mulengele udi kayi ne lungenyi.

²³Dijinga dia bantu bakane didi dibavuishila anu diakalengele, ditekemena dia bantu babi didi dibavuishila tshiji tshikole.

²⁴Munga muntu udi wabanyina bantu bintu, kadi udi ubivudisha; mukuabo udi uhala bantu bidiye ne bua kubaha udi ukengela bintu.

²⁵Muena mutshima wa diha neavuishibue mubanji; wamiamina bakuabo mai neamiaminyibue handi mai kabidi.

²⁶Badi bela muntu udi udilaminyina manvua mulau, kadi badi basankisha udi wahana.

²⁷Udi unanukila kukebela banga bantu diakalengele udi uheta luse, kadi udi ubakebela bubi, nebulue kudiye.

²⁸Udi weyemena biuma biandi neahile hanshi, kadi bantu bakane nebadiunde bu mudi dianyi dibishi didiunda.

²⁹Udi utatshisha ba mu nsubu muandi neahiane luhehele, muntu muhote neikale muhika wa muena mutshima wa meji.

³⁰Mamuma adi muntu muakane akuama adi mutshi wa muoyo, udi ubandisha mioyo ya bakuabo udi ne meji.

³¹Tangila, nebaleshe[20] muntu muakane difutu diandi ha buloba; nebatumbe kufuta muntu mubi ne muenji wa malu mabi!