Read tshiluba Nsumuinu 13 Bible Online

Nsumuinu 13 - tshiluba bible

Nsumuinu 13

¹Muana mulume udi ne meji udi unvua diyisha dia tatuʼandi, kadi mubuidi kena uteleja mibelu.

²Muntu muimpe udi udia mamuma makane, kadi mitshima ya be dî ba bitungu idi misue tshimbambila.

³Udi ulama mukana muandi udi ulama muoyo wandi, kadi udi ubulula mukana muandi bitongatonga neabutuke.

⁴Mufuba udi usamina muoyo, kena ubiheta, kadi muoyo wa muena disuminyina udi ûshibua tente ne diakalengele.

⁵Muntu muakane udi ukina mei a mashimi, kadi muntu mubi udi wenza malu a bundu ne adi avuisha bihendu.

⁶Buakane budi bulama muntu udi ne mutshima mutoke, kadi bubi budi bubutula muenji wa malu mabi.

⁷Munga muntu udi udivuisha bu mubanji, kadi kena ne tshintu; munga udi udivuisha bu muhele, kadi udi ne biuma bia bungi.

⁸Biuma bia muntu bidi difutu dia kuhikula nʼadi muoyo wandi, kadi muhele kena unvua mei a badi bamufunyina.

⁹Munya wa bantu bakane udi utema ne disanka, kadi muinda wa bantu babi udi ujima.

¹⁰Kudisua kudi kuhatula anu matandu, kadi badi bitabusha mei a lungenyi badi ne meji.

¹¹Biuma bidibo bangata ku malu a hatuhu bidi bikeha, kadi udi ubisangisha ku tshituha ku tshituha udi ubivudisha.

¹²Ditekemena didibo balayidila didi disamisha mutshima, kadi kukumbasha kua dijinga kudi bu mutshi wa muoyo.

¹³Udi ulengulula dî dia Nzambi udi udivuisha muena dibanza kudidi, kadi udi unemeka mukenji neahete disanka.

¹⁴Diyisha dia muena meji didi mushimi wa mai a muoyo, bua kuehuka mateyi a lufu.

¹⁵Dijingulula dimpe dia mianda didi dihetesha diakalengele, kadi nshila wa bahidi ba Nzambi udi bizakala-bizakala.

¹⁶Muntu mudimuke yonso udi wenza malu andi ne lungenyi, kadi muhote udi ulesha bantu buhote buandi.

¹⁷Messager mubi udi uhona mu dikenga, kadi muloho udi mua kueyemenyibua udi usangasha bantu.

¹⁸Buhele ne bundu bidi bilua kudi muntu udi ubenga diyisha, kadi udi udimuka hadibo bamubela udi mutumbishibue.

¹⁹Kukumbasha kua dijinga kudi kusankisha mutshima, kadi bahote badi bakina bua kumuka ku malu mabi.

²⁰Udi wenda ne bena meji udi ulua muena meji, kadi udi ubuelakana ne bahote neakenge bua bualu ebu.

²¹Diakabi didi dilonda benji ba malu mabi, kadi diakalengele didi difutu dia bantu bakane.

²²Muntu muimpe udi ushila bana ba bana bandi buhianyi, kadi biuma bia muenji wa malu mabimbitekela bantu bakane.

²³Budimi budi muhele udima budi bukuama bia kudia bia bungi, kadi budi bujimina bua dikosa dibi dia nsambu.

²⁴Udi kayi ukanda ne lukodi udi ne muanʼandi lukuna, kadi udi unanga muanʼandi udi unanukila kumukanda.

²⁵Muntu muakane udi udia, udi ushikisha nzala yandi, kadi difu dia muntu mubi didi diunvua nzala.