Read tshiluba Nsumuinu 14 Bible Online

Nsumuinu 14 - tshiluba bible

Nsumuinu 14

¹Meji[23] adi asa nsubu wau, kadi buhote budi bumusasula ne bianza biabu mene.

²Udi wenda mu buakane buandi udi utshina Yehowa, kadi udi ukonyangasha nshila yandi udi umuhetula.

³Mukana mua muhote mudi mulangala wa diambu, kadi mishiku ya bena meji idi ibalama.

⁴Kudi kakuyi ngombe, tshidilu tshiai tshidi munda mutuhu, kadi bukole bua ngombe budi buhetesha bia kudia bivule.

⁵Mumonyi udi mua kueyemenyibua kena udinga nansha, kadi mumonyi udi udinga udi uhatula mei a mashimi.

⁶Mubuidi udi ukeba meji, kena waheta, kadi diheta dia lungenyi didi bualu butekete kudi mujinguludi wa mianda.

⁷Umuke biebe ku mesu kua muntu muhote; kuena uhetaku mei a lungenyi.

⁸Meji a muena budimu adi a kujingulula nshila wandi, kadi buhote bua bahote budi bubahambuisha.

⁹Bahote[24] badi baseka bua malu mabi, kadi munkatshi mua bantu bakane mudi dinangangana.

¹⁰Mutshima wa muntu udi mumanye kanyinganyinga kau, ne kakuena muntu wa bende udi mua kujingulula disanka diau.

¹¹Nebashimbule nsubu wa bantu babi, kadi ntenta wa bantu bakane neajalame.

¹²Nshila udiku udi mululame ku mesu kua muntu, kadi nshikidilu wandi udi lufu.

¹³Mu tuseku mene mutshima udi ne kanyinganyinga, ne nshikidilu wa disanka udi majia.

¹⁴Muntu udi usesuka neukute bintu bidiye uhuola mu nshila yandi, ne muntu muimpe neukute bintu bidi bienzedi biandi bimutuadila.

¹⁵Mutshimbakane udi witabusha dî dionso, kadi muena budimu udi utangila kudiye uya.

¹⁶Muena meji udi udimuka, udi wehuka ku bubi, kadi muhote udi ne dikamakama, udi udieyemena.

¹⁷Udi ukuata tshiji lubilu udi wenza malu mahote, kadi muena[25] lungenyi udi ne lutulu.

¹⁸Batshimbakanyi badi bahiana buhote, kadi badi ne budimu badi ne lungenyi bu tshifulu tshiabo tshia butumbi.

¹⁹Bantu babi badi binamina bantu bimpe, ne benji ba malu mabi badi binama ku bibi bia bantu bakane.

²⁰Muhele udi mukinyibue kudi muena mutumba nʼandi mene, kadi balunda ba muntu mubanji badi ba bungi.

²¹Udi uhetula muena mutumba nʼandi udi wenza bualu bubi, kadi udi ufuila bena dikenga luse udi ne disanka.

²²Badi bahangidisha malu mabi kabena bahambuka mu nshila, anyi? Kadi badi bahangidisha malu mimpe badi basangana luse lujalame ne bulelela.

²³Mudimu wonso udi uvudisha muntu bintu, kadi tshiakulakula tshia ku mishiku tshidi tshivuisha muntu muhele.

²⁴Tshifulu tshia butumbi tshia bena meji tshidi biuma biabo, kadi tshifulu[26] tshia bahote tshidi buhote buabo.

²⁵Mumonyi udi wamba mei a bushuwa udi ubandisha mioyo, kadi wahatula mei a mashimi mukana udi udinga bena tshilumbu.

²⁶Udi utshina Yehowa udi ne tshieyemenu tshikole, ne bana bandi nebikale ne tshinyemenu.

²⁷Ditshina dia Yehowa didi mushimi wa mai a muoyo, bua kuehuka ku mateyi a lufu.

²⁸Bantu bavule mbutumbi bua mukelenge, kadi dikeha dia bantu ndibutuka dia mukokeshi.

²⁹Udi kayi ukuata tshiji lubilu udi ne lungenyi lule, kadi udi ne mutshima wa lukuluku udi ubandisha buhote.

³⁰Mutshima muhole udi muoyo wa mubidi, kadi mutshiaudi udi ubolesha mifuba.

³¹Udi ukengesha muhele udi uhenda Mufuki wandi, kadi udi ulesha mukengedi wa bintu luse udi umutumbisha.

³²Muntu mubi udi wedibua hanshi bua malu mabi andi, kadi muntu muakane udi ne tshinyemenu mu lufu luandi.

³³Meji adi ashikama talalâ mu mutshima wa mujinguludi wa mianda, kadi kaena[27] mumanyibue mu mitshima ya bahote.

³⁴Buakane budi butuma tshisamba tshia bantu ku mpala, kadi malu mabi adi afuisha bantu bonso bundu.

³⁵Muena mudimu udi ne meji udi uheta diakalengele kudi mukelenge wandi, kadi tshiji tshia mukelenge tshidi kudi muntu udi umufuisha bundu.