Read tshiluba Nsumuinu 19 Bible Online

Nsumuinu 19 - tshiluba bible

Nsumuinu 19

¹Muntu muhele udi ne mutshima mutoke udi uhita udi ne tshishiku ne buhote buimpe.

²Kembimpe bua mundi kuhanga lungenyi; udi wenda lukasa lukasa udi uhambuka mu nshila.

³Buhote bua muntu budi bunyanga nshila wandi; mutshima wandi udi ukuatshila Yehowa tshiji.

⁴Biuma bidi bivudishila muntu balunda ba bungi, kadi mulunda wa muhele udi uhanduluka kudiye.

⁵Mumonyi udi ne mashimi kena uhanga kukengeshibua; udi uhatula mei a mashimi mukana muandi kena uhanduka.

⁶Ba bungi badi bakeba diakalengele kudi muntu udi tshihahai; muntu yonso udi mulunda wa muntu udi uhangana.

⁷Bana babo ne muhele bonso badi nʼandi lukuna; mona mudi balunda bandi batamba bana babo kumuka kudiye! Udi ubasengelela ne mei andi, kadi bakumana kuya.

⁸Udi uheta meji udi unanga muoyo wandi; udi ulama dijingulula dia mianda neahete diakalengele.

⁹Mumonyi udi ne mashimi kena uhanga kukengeshibua; udi uhatula mei a mashimi mukana muandi neajimine.

¹⁰Kuikala ne bintu bimpe bia bungi kakuena kukumbanyina muhote; bidi bitamba bubi bua muhika kukokesha bakokeshi.

¹¹Lungenyi luimpe lua muntu ludi lukanda tshiji, ne butumbi buandi nkulekela muntu bubi.

¹²Tshiji tshia mukelenge tshidi bu muadi wa nyama wa ntambue, kadi diakalengele diandi didi bu mume ha mashinde.

¹³Muana muhote udi ubutuisha tatuʼandi; matandu a mukashi mubake adi bu mai adi kâyi alekela kumata.

¹⁴Nsubu ne biuma bidi buhianyi budi bufuma kudi batatu, kadi mukashi mubake wa meji udi diha didi difuma kudi Yehowa.

¹⁵Bufuba budi buladika muntu tulu tukole, ne muena bukata neikale ne nzala.

¹⁶Udi utumikila mukenji udi ulama muoyo wandi; udi uhetula nshila idiye wendela neafue biandi.

¹⁷Udi ufuila muhele luse udi usombesha Yehowa bintu; yeye neamuenzele bimpe ku buimpe buakamuenzeleye.

¹⁸Kengesha muanʼebe bua kumuyisha, bualu bua ditekemena ditshidiku; kumuleshi luse bua kalulu dibutuka diandi.

¹⁹Muena tshiji tshikole neatule tshibau; bualu bua biwamuhandisha ku mpala, neumuenzele nunku tshiakabidi.

²⁰Unvua meji adibo bakuha, witabusha diyisha, bua wewe wikale ne meji mu matuku alualua.

²¹Mutshima wa muntu udi ne malu a bungi adiye uhangidisha, kadi malu adi Yehowa Usungula neajadikibue.

²²Tshidi tshivuisha muntu dinanga kudi bakuabo nduse luandi; muntu muhele udi uhita muena mashimi buimpe.

²³Ditshina dia Yehowa didi dilombola muntu ku muoyo; udi nʼadi neashikame talalâ, dikenga kadiena dimukuata.

²⁴Mufuba udi ubuesha tshianza tshiandi munda mua dilonga, kadi kena ne bukole bua kutshihingisha mukana muandi kabidi.

²⁵Kuma mubuidi, nunku mutshimbakanyi neadimuke; ubele mujinguludi wa mianda, yeye neahete lungenyi.

²⁶Muntu udi unyanga biuma bia tatuʼandi, udi wihata mamuʼandi, udi muana mulume udi ubafuisha bundu ne udi ubavuishisha bihendu.

²⁷Muanʼanyi, lekela kunvua diyisha didi dikuhambuisha ku mei a lungenyi.

²⁸Mumonyi wa hatuhu udi uhetula kulumbulula kuakane; mukana mua bantu babi mudi mumina malu a tshishiku.

²⁹Bakulongoluela babuidi makengesha, bakulongoluela nyima ya bahote mitutu.