Read tshiluba Nsumuinu 23 Bible Online

Nsumuinu 23 - tshiluba bible

Nsumuinu 23

¹Hawashikama bua kudia bidia ne mukokeshi, welangane meji bimpe bua muntu udi ku mpala kuebe;

²uteke kele ku mununu webe, biwikala muena mudi.

³Kusaminyi muoyo ku bidia biandi bishemakane, bualu bua bidi bikudinga.

⁴Kudihangishi ne mudimu mukole bua kudivuisha mubanji, lekela kulonda meji au.

⁵Neutshike mesu ebe ku biuma, biobi bimane kujimina, anyi? Bua biuma bidi bidiasa mahuahua, bitua mulelu bu nyunyu bua kuya mulu.

⁶Kudi bidia bia muena tshitu; kusaminyi muoyo ku bidia biandi bishemakane.

⁷Bualu bua bu mudiye welangana meji munda muandi, ke mudiye. Yeye udi ukuambila ne, Udie biebe, unue biebe; kadi mutshima wandi kawena kûdi.

⁸Neuluke biebe bihesa bia bidia biwakudia; mei ebe mimpe neajimine.

⁹Kuambi dî mu matshu a muhote, bualu bua neahetule meji a mei ebe.

¹⁰Kumushi mukalu wa kale; kubuedi mu madimi a bana ba nshiya.

¹¹Bualu bua Musungidi wabo udi mukole; yeye neabakuile tshilumbu tshiabo ku mesu kuebe.

¹²Teka mutshima webe ku diyisha, uteleshe matshu ebe ku mei a lungenyi.

¹³Kubengi bua kubela muana; biwamututa ne lukodi, kena ufua nansha.

¹⁴Umutute ne lukodi bua kusungila muoyo wandi mu Muaba wa Bafue.

¹⁵Muanʼanyi, bikala mutshima webe ne meji, mutshima wanyi mene newikale ne disanka.

¹⁶Bulelela, mutshima wanyi neusanke hamba mishiku yebe mei makane.

¹⁷Mutshima webe kaukuatshidi bantu babi mukau, kadi wikale biau ne ditshina dia Yehowa dinda tô ne ku dilolo.

¹⁸Bua bulelela, malu makuabo nealue kûdi, ne ditekemena diebe kadiena dijimina.

¹⁹Unvua biebe, muanʼanyi, wikale ne meji; lombola mutshima webe mu nshila mululame.

²⁰Kuikadi munkatshi mua hanu ba maluvu, anyi munkatshi mua bena lumpukusu.

²¹Bualu bua mukuatshiki wa maluvu ne muena lumpukusi nebabuele mu buhele; tulu netuluatshishe muntu bi lulu bisunsuke.

²²Unvua mei a tatu webe waka kulela; kuhetudi mamu webe halueye muntu mununu.

²³Sumba bushuwa, kubuhanyi nansha; sumba meji, diyisha ne dijingu tula dia mianda.

²⁴Tatu wa muntu muakane neatambe kusanka; udi ulela muana wa meji neasanke bualu buandi.

²⁵Tatuʼebe ne mamuʼebe bikale ne disanka, mamu wakakuela ikale ne disanka.

²⁶Muanʼanyi, Umpe mutshima webe, mesu ebe atangile nshila yanyi.

²⁷Bualu bua mukashi wa ndumba udi tshina tshile, ne mukashi wa bende udi dijimba dibumbakane.

²⁸Yeye udi walamina muntu bu munyengi; udi uvudisha bahambuki munkatshi mua bantu.

²⁹Udi udila ne, Ndi ne mulau nganyi? Udi ne kanyinganyinga nganyi? Udi ne matandu nganyi? Udi utontolola nganyi? Udi ne mputa hamʼbidi kayi wenza bualu nganyi? Udi ne mesu makunze-kunzû nganyi?

³⁰Mbadi bashikama ku maluvu musangu mule; mbadi baya kuteta maluvu masambakashe.

³¹Kutangidi maluvu a nvinyo hatshidiu makunze, hadiu engelela munda mua luhanza, hadiu ahueka bitekete ha muminu.

³²Kunshikidilu adi asuma bu nyoka, adi asuma bu nyoka wa mbanvu.

³³Mesu ebe neamone bintu bidi bikukemesha, mutshima webe neuhatule mei a buhote.

³⁴Bulelela, wewe newikale bu muntu udi ulala munkatshi mua mai manene, newikale bu muntu udi ulala ha mutu ha mutshi udibo basuikila tshilulu tshia buatu.

³⁵Newambe ne, Bakunkuma, kadi tshiakunvua dikenga; bakukuta, kadi tshiakumanya bualu. Nenubale diba kai? Nempingane bua kuakeba kabidi.