Read tshiluba Nsumuinu 24 Bible Online

Nsumuinu 24 - tshiluba bible

Nsumuinu 24

¹Kuikadi ne bantu babi mukau, kujingi bua kubuelakana nʼabo.

²Bualu bua mitshima yabo idi yelangana meji a kuenzela bantu bibi, mishiku yabo idi yakula bua kuenza malu mabi.

³Badi bibaka nsubu ne meji, dijingulula dia mianda didi dimujadika.

⁴Lungenyi ludi lûshisha nsubu idi munda muandi tente ne biuma bionso bia mushinga mukole ne bia disanka.

⁵Muena meji udi mukole; muntu udi ne lungenyi udi uvudisha bukole buandi.

⁶Bua, hakuhabo lungenyi lua kuenza, neumanye mua kuluangana nvita; mu tshisumbu tshinene tshia bafidi ba meji mudi luhandu.

⁷Meji adi atamba muhote bule; kena ubululula mukana muandi ku tshibuelelu tshia musoko.

⁸Udi uhangidisha bua kuenza malu mabi, nebamubikile ne, Muena tshinvundu.

⁹Kuhangidisha buhote kudi bualu bubi; mubuidi udi utondesha bantu.

¹⁰Biwateketa halua dituku dia dikenga, bukole buebe budi bukeha.

¹¹Handisha badibo baya nʼabo ku lufu; usungile badi bamba kushihibua.

¹²Biwamba ne, Kabiakadi bamanye muanda eu, yeye udi uteta mitshima kena ûmona, anyi? Udi ulama muoyo webe kena mûmanye, anyi? Kena ufuta muntu bu mudi mudimu wandi, anyi?

¹³Muanʼanyi, udie buitshi, bualu bua budi buimpe, mamata a buitshi adi mashemakane mukana muebe.

¹⁴Wamanya ne meji adi muomumue ku muoyo webe: Biwâheta, malu mimpe makuabo nealue kûdi, ne ditekemena diebe kadiena dijimina.

¹⁵Wewe muntu mubi, kualaminyi ku muaba udi muntu muakane mushikame; kunyangi muaba udiye uladila.

¹⁶Bualu bua muntu muakane udi uhona misangu muanda mutekete, udi ubika kabidi; kadi bantu babi badi balenduka mu dikenga.

¹⁷Kusanki hahona muena lukuna webe, mutshima webe kawikadi ne disanka halendukeye;

¹⁸bua Yehowa kamonyi mudiye wenza, kikadi biandi ne disanka; bua yeye kumushi tshiji tshiandi kudiye bua kutshituma kûdi.

¹⁹Kudinyengabashi bua benji ba malu mabi, kuikadi ne bantu babi mukau.

²⁰Bualu bua muntu mubi kena ne nshikidilu muimpe; nebajime muinda wa bantu babi.

²¹Muanʼanyi, tshina Yehowa ne mukelenge kabidi; kubuelakana ne babueshakanyi ba malu.

²²Bualu bua dibutuka diabo dilualua lukasa; udi mumanye kabutu[42] kadi kabakuata bubidi buabo nganyi?

²³Mei â kabidi adi mei akamba bena meji. Kambimpe kulesha kansungusungu mu kulumbulula kua bilumbu.

²⁴Udi wambila muntu mubi ne, Wewe udi mubinga, bantu nebanuibe mulau ne bisamba ha bantu nebimulengulule.

²⁵Kadi badi bamubela nebikale ne diakalengele, nebasankishibue bikole.

²⁶Udi ukudimuna dî diakane udi bu muntu udi uluangana mishiku.

²⁷Longolola mudimu webe ha mbelu, udilongolueleu mu budimi; hashishe wase nsubu webe.

²⁸Kuikadi mumonyi udi ubanda muenu mutumba nʼebe hatuhu, kudingi ne mishiku yebe.

²⁹Kuambi ne, Nemmuenzele bu muakungenzeleye; nempingishile muntu eu difutu diakanangane ne bienzedi biandi.

³⁰Nakahita ha buihi ne budimi bua muntu mufuba, ha buihi ne budimi bua tumuma tua nvinyo bua muntu wakadi kayi ne lungenyi.

³¹Monai! Buakadi ne mingonge mitoloka kuonso, buakadi tente ne mpesa, ne luhangu luabu lua mabue luakadi lushimbuke.

³²Hashishe nakamona, nakelangana meji bimpe bua muanda eu; nakautangila, nakabela diyisha ne,

³³Anu tulu tukese, anu kulala tulu tshituha; anu kudikuata ne bianza bua kubunga tulu kakese.

³⁴Hashishe buhele buebe nebukukuate bu munyengi, ne tshiole netshikukuate bu muena nvita.