Read tshiluba Nsumuinu 30 Bible Online

Nsumuinu 30 - tshiluba bible

Nsumuinu 30

¹Mei a Agû, muana wa Yake: di dia tshijila:[51] Muntu au udi wambila Itiele, udi wambila Itiele ne Ukala,[52] ne,

²Bulelela, tshiena ne meji bu a muntu; tshiena njingulula mianda bu muntu.

³Tshiena muanze kuyila meji, tshiena ne lungenyi lua malu a Wa Tshijila.

⁴Wakubanda mu diulu, wakahueka hanshi kabidi nganyi? Wakusangisha luhehele mu bianza biandi bitunya nganyi? Wakukuta mai mu tshivualu tshiandi nganyi? Wakujadika matshika onso a kunfudilu kua buloba nganyi? Dina diandi nganyi, ne dina dia muanʼandi nganyi? Bulelela, wewe udi mumanye!

⁵Di dionso dia Nzambi diakutetshibua ne, Didi dia bushuwa; yeye udi ngabu kudi badi banyemena kudiye.[53]

⁶Kutentekashi dî ku mei andi, bua yeye kakubedi, kukusanganyi muena mashimi.

⁷Ndi nkulomba malu abidi; kubengi kuampa tshiyi muanze kufua:

⁸Ungumushile kudinga ne kuamba kua mashimi kundi; kumpi buhele anyi bubanji nansha, undishe bia kudia bidi binkumbanyina,

⁹bua meme tshiukutshi, tshikubengi, tshiandi ne, Yehowa nganyi? Anyi bua tshikadi muhele ne tshibi bianyi, bua tshinyangi dina dia Nzambi wanyi.

¹⁰Kusonguedi muena mudimu kudi nfumu wandi, bua yeye kakuedi mulau, bua wewe kuhishibu.

¹¹Bantu badiku badi bela batatu babo mulau, kabayi bavudishila bamamu babo disanka.

¹²Bantu badiku badi bamba ne, Tudi balengele, kadi kabena balengeshibue ku bukoya buabo.

¹³Bantu badiku,—mona mudi mesu abo ne dihetu, ne mudibo bahanda mesu mulu!

¹⁴Bantu badiku badi ne menu bu miele ya nvita, badi ne menu a ku binyanganyanga bu tuele bua kudiabo bahele, kubajimisha ha buloba, bua kudiabo bakengi, kubumusha munkatshi mua bantu.

¹⁵Musundu udi ne bana bakashi babidi badi badila ne, Utuhe, Utuhe. Bintu bisatu bidiku bidi kabiyi biukuta kashidi; bintu binai mene bidiku bidi kabiyi biamba kashidi ne, Tuakukuta:

¹⁶Muaba wa Bafue, mukashi wa nkumba, buloba budi kabuyi mua kumana nyota yabu kashidi, ne kahia kadi kakayi kamba kashidi ne, Nakukuta.

¹⁷Disu dia muntu udi useka tatu, ne udi uhetula ditumikila dia mamu,— nyunyu ya bikololo bia mu tshibanda nebiditue minu, nebiditule, ne bana ba nyunyu itu yadia bintu bibole nebadidie.

¹⁸Bintu bisatu bidi bitamba kunkemesha bua kubimanya; e, kudi bintu binai bindi tshiyi mujingulule:

¹⁹nshila wa nyunyu wa mukanku mu luhehele, nshila wa nyoka udi wenda ujongoloka ha dibue, nshila wa buatu munkatshi mua mai manene, ne nshila wa muntu mulume udi wenda ne mushikankunde.

²⁰Nshila wa mukashi wa masandi udi nunku: udi udia, udi ukuhula ku mishiku, udi wamba ne, Tshiena muenze bualu bubi.

²¹Buloba budi bikanka bua malu asatu; kabuena mua kutuala bujitu bua malu anai:

²²muhika habueleye mu bukelenge, muhote hukuteye bia kudia;

²³mukashi, udibo bakina, hayeye ku dibaka; ne mukashi muenji wa mudimu udi uhiana bintu bia nfumu wandi mukashi.

²⁴Kudi bintu binai bitamba bukese hanshi ha buloba, kadi bidi ne meji male:

²⁵Tunkenene tudi bu bantu badi kabayi ne bukole, kadi tudi tubuta bia kudia biatu mu tshikondo tshia munya.

²⁶Nyama ya nsenji[54] idi bu bantu batekete, kadi idi yasa nsubu yai munkatshi mua mabue.

²⁷Mikumbi kayena ne mukelenge, kadi buonso buai idi yenda bu mialu ya nvita.

²⁸Udi mua kukuata musodi ne bianza, kadi wowo udi mu mbalasa ya bakelenge.

²⁹Bintu bisatu bidiku bidi bienda mananga; e, bintu binai bidi ne butumbi hadibi bienda.

³⁰Nyama wa ntambue udi uhita nyama yonso bukole, kena wahuka bua kushila mukuabo nshila.

³¹Kabalu ka nvita, mpumbu wa mbushi, ne mukelenge udi wenda ku mpala kua masalayi andi.

³²Biwikala muenze buhote bua kudibandisha kuebe, anyi biwikala muhangidishe bualu bubi, uteke tshianza tshiebe ku mishiku yebe.

³³Bualu bua kukuma mabele kudi kuvuisha manteka, kubela diulu kudi kuhatuisha mashi, ne kukolesha tshiji kudi kuvuisha nvita.