Read tshiluba Nsumuinu 4 Bible Online

Nsumuinu 4 - tshiluba bible

Nsumuinu 4

¹Bana banyi balume, unvuai diyisha dia tatu, nuikale ne mbabi bua kumanya dijingulula dia mianda.

²Bualu bua ndi nnulesha diyisha dimpe, kanulekedi kulonda diyisha dianyi.

³Bualu bua nakadi muana mulume mulela kudi tatu wanyi, nakadi muana mutekete ne bu muana umuehele munangibue ku mesu kua mamu wanyi.

⁴Tatu wakadi unyisha kabidi, wakadi ungambila ne, Mutshima webe ulamate mei anyi bikole; utumikile mikenji yanyi, wikale ne muoyo.

⁵Heta meji, uhete biebe dijingulula dia mianda; kuhu muoyo, kusesuki ku mei a mukana muanyi.

⁶Kualekedi nansha, ne wowo neakulame; wanange, neakutangidile malu adi mua kukukuata.

⁷Tshibangidilu tshia meji tshidi dî edi ne, Angata meji; e, angata dijingulula dia mianda ku mpala kua malu onso makuabo.

⁸Wabale bu tshintu tshia mushinga mukole, wowo neakubandishe; neakuvuishile butumbi, biwaela tshituha mu nshingu.

⁹Nease tshitotola tshilengele ku mutu kuebe; neakuhe tshifulu tshia butumbi.

¹⁰Unvua, muanʼanyi, witabusha mei anyi, ne bidimu bia muoyo webe nebikale bia bungi.

¹¹Nakukuyisha mua kuenda mu nshila wa meji, nakukulombola mu nshila ya malu makane.

¹²Hawenda, biendedi biebe kabiena bikandibue; biwanyema, kuena ulenduka.

¹³Kuata diyisha bikole, kudilekedi nansha; udilame, bualu bua didi muoyo webe.

¹⁴Kubuedi mu nshila wa bantu babi nansha; kuendi mu nshila wa benji ba bienzedi bibi.

¹⁵Ehuka ku nshila au, kuhitshimu nansha; umukamu, hita ku mpala.

¹⁶Bualu bua kabena balala tulu bikalabo kabayi benze bibi; tulu ludi tumuka kudibo bikalabo kabayi bahoneshe muntu.

¹⁷Bualu bua badi badia bia kudia bia bubi, badi banua nvinyo ya tshimbambila.

¹⁸Kadi nshila wa bantu bakane udi bu diba dia kabundubundu, didi ditema ne dikenkakenka tô ne hakumbana diba dia munda munya.

¹⁹Nshila wa bantu babi udi bu mîdima mikole; kabena bamanye tshidi tshibalenduisha.

²⁰Muanʼanyi, unvua mei anyi bimpe, teleja matshu ebe ku mianda indi nkuambila.

²¹Mei â kaumuki ku mesu kuebe; wâteke munda mua mutshima webe.

²²Bualu bua adi muoyo kudi badi bâheta, adi asangasha mibidi yabo yonso.

²³Ulame mutshima webe ne dilama dionso, bualu bua munda muau mudi muhatuka mishimi yonso ya muoyo.

²⁴Umusha mei a kusesuisha nʼau bakuabo mukana muebe, umusha mei a kuhambuisha nʼau bantu ku mishiku yebe.

²⁵Mesu ebe atangile ku mpala kuebe, kâkenzakanyi, bilafinyi biebe bishale bitabala bitangila ku mpala.

²⁶Ubatamishile[9] makasa ebe nshila, ne nshila yebe yonso ikale miludika bimpe.

²⁷Kusesuki ku tshianza tshia balume anyi ku tshianza tshia bakashi, umushe dikasa diebe ku malu mabi.