Read tshiluba Nsumuinu 6 Bible Online

Nsumuinu 6 - tshiluba bible

Nsumuinu 6

¹Muanʼanyi, biweyeka tshieya kudi muena mutumba nʼebe; biwoluela muntu wa bende tshianza;

²biwikala mudijingile mu kahamba bua mei a mukana muebe, mukuatshibue mu buteyi bua mei a mukana muebe;

³enza nunku, muanʼanyi, bua kudi handisha, bualu bua wakubuela mu tshianza tshia muena mutumba nʼebe: ya, udihuekeshe, wenzeshe muena mutumba nʼebe ne mei a dinanukila.

⁴Kuitabushi bua tulu tukukuate ku mesu ebe, anyi bua tulu tukole tubuikile bilafinyi biebe.

⁵Udihandishe bu mudi kabuluku kadisungila mu bianza bia tshilembi, bu mudi nyunyu udihandisha mu bianza bia tshilembi tshia nyunyu.

⁶Wewe, muntu mufuba, ya kudi kankenene; welangane meji mudiku kaya mu nshila yaku, wikale ne meji.

⁷Koko, kakayi ne mukelenge, mutangidi, anyi mukokeshi,

⁸katu kadilongoluela bidia biaku mu tshikondo tshia munya mukole; katu kaditekela bia kudia biaku mu tshikondo tshia kunowa.

⁹Wewe, mufuba, neulale hanshi musangu bule munyi? Neujuke bua kutabala ku tulu tuebe diba kai?

¹⁰Anu tulu tukese, anu kulala tulu tshituha; anu kudikuata ne bianza bua kuhunga tulu kakese.

¹¹Hashishe buhele buebe nebukukuate bu munyengi, ne tshiole netshikukuate bu muena nvita.

¹²Muntu wa tshidingidingi, muena tshinyangu, udi wendakana ne mei a kuhambuisha nʼau bantu.

¹³Udi uhodia ne mesu andi, udi usheta makasa andi, udi uloba muntu ne bianza.

¹⁴Udi ne mutshima wa tshishiku, utu wahangidisha malu mabi matuku onso, udi uvudisha matandu.

¹⁵Bua malu â neabuluke lubilu; mu katuha ka diba neatshibuke bituha, kayi uheta tshia kumusangasha.

¹⁶Mianda isambombo idiku idi Yehowa ukina; e, mianda muanda mutekete idi imunyingalasha:

¹⁷mesu adi ne dihetu, ludimi ludi lushima, ne bianza bidi bimatshiha mashi a badi kabayi ne tshilumbu hanshi,

¹⁸mutshima udi uhangidisha mianda ya meji mabi, makasa adi aya lubilu kudibo benza malu mabi,

¹⁹mumanyi wa malu udi wamba mei a kudinga, ne muntu udi utudisha matandu munkatshi mua bena muntu.

²⁰Muanʼanyi, lama mukenji wa tatuʼebe, kulekedi diyisha dia mamuʼebe.

²¹Ubilame matuku onso mu mu tshima webe, ubijingile mu nshingu muebe.

²²Hawenda, lungenyi alu nelukulombole; hawalala hanshi, neluikale mulami webe; bawatabala, neluakule nʼebe.

²³Bualu bua mukenji udi muinda, diyisha diau didi munya, kubela kudi ne diyisha kudi nshila wa muoyo.

²⁴Biobi nebikulame ku buteyi bua mukashi munyanguke, ku ludimi lua mukashi wa bende ludi luamba mei a lubombo.

²⁵Kusaminyi muoyo ku bulengele buandi nansha, yeye kakukuatshi mu buteyi ne kuvinya kua mesu andi.

²⁶Bua bualu[11] bua mukashi wa ndumba muntu neashale anu ne tshihesa tshia nshima; ne mukashi mubaka udi wenda masandi udi ulemba muoyo wa mushinga mukole wa muntu.

²⁷Muntu udi mua kuteka kahia mu tshiadi tshiandi, bivualu biandi kabiyi bihia, anyi?

²⁸Muntu udi mua kudiata ha makala a kahia adi atema, makasa andi kâyi ashila, anyi?

²⁹Bidi muomumue kudi muntu udi ubuela kudi mukashi wa muena mutumba nʼandi; muntu yonso wamulenga bianza neakengeshibue.

³⁰Bantu kabena bahetula muibi, bibeye tshia kudia hunvueye nzala.

³¹Kadi biamukuatabo, neahingishe bintu bivudisha misangu muanda mutekete; neafile biuma bionso bidi mu nsubu muandi.

³²Udi wenda masandi ne mukashi kena ne lungenyi, udi wenza muanda au udi udibutula.

³³Neahete mikumu ne dilengulula; bundu buandi kabuena bujimishibua.

³⁴Bualu bua mukau udi ubandisha tshiji tshia mulume, kena unvua luse dituku dia kudisombuela.

³⁵Kena witabusha bintu bia kubuikidila nʼabi bubi buandi, kena ushala ne mutshima muhole, nansha biwamuha mbueshilu ya bungi.