Read tshiluba Muambi 5 Bible Online

Muambi 5 - tshiluba bible

Muambi 5

¹Ulame makasa ebe hawabuela mu nsubu wa Nzambi; kusemena ha buihi bua kunvua kudi kuhita milambu ya bahote buakane, bualu bua bobo kabena bamanye ne, Tudi tuenza bualu bubi.

²Mei kâluhuki mukana muebe lukasa; mutshima webe kauhatudi bualu ku mpala kua Nzambi lubilu; bualu bua Nzambi udi mu diulu, wewe udi ha buloba; nunku mei ebe ikale makehele.

³Tshilota tshidi tshilua ne malu a bungi; diakula dia muhote didi dihatula mei a bungi.

⁴Hawaditshiha kudi Nzambi, kujanguluki bua kumana mulayi; bualu bua yeye kena ne bahote disanka; ufute tshiwakalaya.

⁵Kubenga mua kuditshiha kudi kuhita kudinga buakane.

⁶Kuitabushi bua mukana muebe kukulenduisha; kuambidi messager ne, Nakadi mutuhakane; udi musue Nzambi ikale ne tshiji bua mei ebe, ashihe mudimu wa bianza biebe bua tshinyi?

⁷Bualu bua mu bilota bia bungi mudi mei a bungi ahatuka, kadi utshine Nzambi.

⁸Biwatangila bahele bakengeshibue ne kunyanga kua bilumbuluidi ne kushiha kua mikenji mu province wenu, kukemi bua malu au; bualu bua banfumu bonso badi ne banga badi babatangila, ne udi mubatambe bonso udi ha mutu habo.

⁹Dikuatshisha dia buloba didi kudi bantu bonso; mukelenge muine udi ukuatshishibua ne bintu bia mu madimi.

¹⁰Wananga biuma kena usankishibua ku biuma; wananga bubanji kena ukuta bubanji; ebu mbualu bua hatuhu kabidi.

¹¹Bualu bua hakumbana bintu, badi babidia badi bakumbana kahidi; ne nfumuʼabi udi ne difutu kai dikuabo, anu bua kuntangila ku mesu?

¹²Tulu tua muena mudimu tudi tuimpe biadieye bintu bikese anyi bia bungi; kadi kukuta kua muntu mubanji kakuena kumuladika tulu.

¹³Nakatangila bualu bubi muinshi mua diba bua muntu mudilamine luhetu tô ne hakamukengeshalu;

¹⁴luhetu elu ludi lujimina mu malu mabi; kadi bialeleye muana wa balume, kena ne tshia kumushila.

¹⁵Bu muakahatukeye munda mua mamu wandi butaka, yeye neahingane kabidi; kena uya ne tshintu tshimue mu bianza biandi tshia mu midimu yonso yakenzeye.

¹⁶Ebu mbualu bubi kabidi bua muntu udi uhingana anu bu muakalueye. Udi ne difutu kai? Wakenzela luhehele mudimu;

¹⁷matuku andi onso akadi mu midima, mu kanyinganyinga, ntatu, masama ne mu tshiji tshikole.

¹⁸Monai, bualu bundi mmona buimpe ne bukumbanyine muntu: adie biandi, anue biandi ne asanke mu midimu yandi yonso idiye wenza muinshi mua diba, matuku onso a muoyo wandi adi Nzambi mumuhe; edi ndifutu diandi.

¹⁹Muntu yonso udi Nzambi muhe bintu ne bubanji ne bukole bua kubidia, bua kuangateye difutu diandi ne kusankeye mu midimu yandi amanye ne, Edi ndiha dia Nzambi.

²⁰Yeye kena mua kutamba kuvuluka matuku a muoyo wandi; bualu bua Nzambi udi umuvuishisha disanka mu mutshima wandi.