Read tshiluba Muambi 7 Bible Online

Muambi 7 - tshiluba bible

Muambi 7

¹Dina dimpe didi dihita manyi a mushinga mukole buakane, dituku dia lufu ndihita dia kuledibua bulengele.

²Kubuela mu nsubu wa madilu kudi kuhita kubuela mu nsubu wa bidia bia dibanji buakane; bualu bua eu nshikidilu wa bantu bonso, ne badi ne muoyo nebateke bualu ebu mu mitshima yabo.

³Kanyinganyinga kadi kahita tuseku buakane; mpala wa majia udi uvuisha mutshima disanka.

⁴Mutshima wa muena meji udi mu nsubu wa madilu; kadi mitshima ya bahote idi mu nsubu ya tuseku.

⁵Kunyua mibelu ya bena meji kudi kuhita kunyua misambu ya bahote buakane.

⁶Tuseku tua bahote tudi bu kutudika kua meba muinshi mua luesu; bualu ebu mbua hatuhu kabidi.

⁷Muena meji udi wandamuka muhote ku dikengesha didiye nʼadi, mbueshilu idi inyanga mutshima.

⁸Nshikidilu wa muanda udi uhita tshibangidilu tshiau bulengele; mutshima wa buhuekela udi uhita mutshima wa dihetu buakane.

⁹Kukuatshi tshiji mu mutshima webe lukasa, bualu bua tshiji tshidi tshiala mu tshiadi tshia bahote.

¹⁰Kudikonki ne, Matuku a diambedi adi mahite a mpindiu buakane bua tshinyi? Bualu bua kuena ukonka bualu ebu ne meji mimpe.

¹¹Lungenyi ludi luakane bu buhianyi; ludi dikuatshisha kudi badi batangila diba.

¹²Bualu bua lungenyi ludi ne dikuatshisha bu dia biuma; kadi lungenyi ludi lutamba bua ludi luvuisha muoyo kudi muenʼalu.

¹³Welangane meji a mudimu wa Nzambi; tshiakamaneye kukonyangasha, watshiludika nganyi?

¹⁴Mu dituku dia diakalengele usanke biebe; ne mu dituku dia dikenga, welangane meji; bulelela, Nzambi wakavuisha dituku dimue diakanangane ne dikuabo, bua muntu kajinguludi malu atshilualua.

¹⁵Nakatangila malu onso mu matuku a ditshimbakana dianyi; muntu muakane udiku, udi ufua mu buakane buandi; muntu mubi udi uvudisha matuku andi mu bubi buandi.

¹⁶Kuhitshi kudibingisha; kudivuishi bu muena lungenyi lutambe; udi musue kudibutula bua tshinyi?

¹⁷Kuvudishi malu mabi; kuikadi muhote; udi musue kufua dituku dia lufu luebe kadiyi dianze kufika bua tshinyi?

¹⁸Mbimpe kulamata ku bualu ebu bikole; kumushiku tshianza tshiebe nansha; bualu bua watshina Nzambi neahanduke mu malu onso.

¹⁹Lungenyi ludi luvuisha bukole kudi muena meji, buhite bua bileba dikumi mu musoko.

²⁰Bulelela, kakuena muntu muakane ha buloba utu wenza malu makane, kayi wenza malu mabi.

²¹Kuteleji matshu ebe ku mei onso adibo bamba, bua wewe kunvu bihendu bia muhika webe;

²²bualu bua mutshima webe udi mumanye ne, Wewe biebe wakahenda bakuabo misangu ya bungi.

²³Nakateka malu au onso mu meji; nakamba ne, Nempete meji, kadi nakuahanga.

²⁴Malu adiku, adi kule, adi ne ndondo mule; udi mumanye mua kuajingulula nganyi?

²⁵Nakateka mutshima wanyi ku kumanya ne kujingulula lungenyi ne kusokolola kua malu onso bua meme kumanya buhote bua malu mabi, ne ditshimbakana dia malu a hatuhu.

²⁶Nakasangana ne, Mukashi udi ne mutshima mufuanangane ne mateyi ne bukuondo ne bianza bidi bu mionshi, yeye udi mutambe lufu bululu; wasankisha Nzambi neahanduke mu bianza biandi; kadi yeye neakuate muntu mubi.

²⁷Muambi udi Wamba ne, Monai munakasangana hanakateta kusangisha bualu bumue ku bukuabo bua kuheta bualu bujalame;

²⁸kadi tshiakasangana bualu buakadi mutshima wanyi ukeba tô ne mpindiu; nakasangana muntu mulume umue mujalame munkatshi mua tshinunu tshia bantu, kadi tshiakasangana muntu mukashi munkatshi muabo.

²⁹Nakasangana anu bualu ebu bumue ne, Nzambi wakafuka bantu ne mitshima mijalame, kadi bobo bakadikebela malu a ngenyi yabo.