Read tshiluba Musambu wa Solomo 2 Bible Online

Musambu wa Solomo 2 - tshiluba bible

Musambu wa Solomo 2

¹Meme ndi bu tshilongo tshia mu Shalona ne bu tshilongo tshia nsungubidi tshia mu tshibanda.

²Bu mudi tshilongo tshia nsungubidi munkatshi mua meba, wanyi munanga udi nunku munkatshi mua bana ba bakashi.

³Bu mudi mutshi wa mamuma a pommes munkatshi mua mitshi ya ditu, wanyi munanga udi nunku munkatshi mua bana ba balume. Nakashikama hanshi mu mundidimbi wandi ne disanka dinene, mamuma andi akadi mashemakane mukana muanyi.

⁴Yeye wakalua nʼanyi mu nsubu wa dibanji, dibendela diandi diakadi diheha mu mutu wanyi diakadi dinanga.

⁵Unkoleshe ne tumuma tukese tûme, unsangashe ne mamuma a pommes, bualu bua dinanga diakunkengesha.

⁶Tshianza tshiandi tshia bakashi tshidi bu musamu ku mutu wanyi; wakungela tshituha ne tshianza tshiandi tshia balume.

⁷Nuenu, bana ba bakashi ba mu Yelushalema, ndi nnusengelela ne, Bu mudibo bahita bitekete hadi ngulungu ne ntole milale mu mpata, kanunyangishi, kanubishi wanyi munanga anu hasueye.

⁸Dî dia wanyi munanga! Tangilai, yeye ulualua, udi wenda utuhika ha mikuna minene, udi wenda wela bidi ha mikuna mikese.

⁹Wanyi munanga udi bu ngulungu anyi bu lukungulu lua ntole. Monai, yeye udi muimane ku nyima kua tshimanu tshietu, udi utangidila ha madidishi a nsubu, udi ukenzakana ha masoso a madidishi.

¹⁰Wanyi munanga wakungambila ne, Juka biebe, wanyi munanga, wanyi mulengele, tuye bietu.

¹¹Bualu bua tshikondo tshia mashika tshiakuhita; nvula yakushika.

¹²Bilongo bidi bimena mu buloba; tshikondo tshia kuimba misambu tshiakulua; dî dia nyunyu wa nkutshi didi diunvuika mu buloba buetu.

¹³Mamuma a mitshi ya nfigi akuboba; mionshi ya tumuma tua nvinyo yakuela bilongo, bidi binunka muhuya muimpe. Juka, wanyi munanga, wanyi mulengele, tuye bietu.

¹⁴Wewe, nyunyu wanyi wa nkutshi, udi usokoma mu mabue a mu mbuebue, mu miaba misokoka ya mu mbuwa; witabushe bua meme kumona mpala webe ne kunyua dî diebe; bualu bua dî diebe didi dimpe ne mpala webe udi mulengele.

¹⁵Utukuatshile tunyama, tunyama tua mikenga, tudi lunyanga mionshi ya tumuma tua nvinyo, bualu bua mionshi yetu idi ne bilongo bitekete.

¹⁶Wanyi munanga nguanyi, meme ndi wandi kabidi; yeye udi udishila mikoko yandi mu bilongo bia nsungubidi,

¹⁷tô ne hatalala munya ne haleha mindidimbi, wanyi munanga walukile, wikale bu ngulungu anyi ntole ha mikuna ya Bete.