Read tshiluba Musambu wa Solomo 3 Bible Online

Musambu wa Solomo 3 - tshiluba bible

Musambu wa Solomo 3

¹Butuku hanakadi ndala ha bulalu buanyi nakakeba udi mutshima wanyi munange; nakamukeba, kadi tshiakamuheta.

²Nakamba ne, Nenjuke, nengendakane mu musoko; nenkebe udi mutshima wanyi munange mu misesu ne mu miaba minene; nakamukeba, kadi tshiakamuheta.

³Bansentedi badi bendakana mu musoko bakasangakena nʼanyi; nakabebesha ne, Nuakutangila udi mutshima wanyi munange, anyi?

⁴Hanakumuka kudibo, nakaya anu tshituha, nakasangana udi mutshima wanyi munange; nakamukuata bikole, tshiakamulekela tô ne hanakalua nʼandi mu nsubu wa mamu wanyi, mu nsubu mene wa wakandela.

⁵Nuenu, bana ba bakashi ba mu Yelushalema, ndi nnusengelela ne, Bu mudibo bahita bitekete hadi ngulungu ne ntole mu mpata, kanunyungishi, kanubishi wanyi munanga anu hasueye.

⁶Nganyi udi ufuma mu tshihela bu muishi wa kahia, mununke muhuya wa myrrhe[2] ne manananshi, ne bintu bionso bia dihembu dimpe bia muendi wa mushinga?

⁷Monai, ntshihoyi tshia Solomo! Bena bukitu makumi asambombo ba mu bakole ba mu Isalele badi batshiambula.

⁸Buonso buabo badi ne miele ya nvita, badi ne bukitu bua kuluangana; muntu yonso udi ne muele wandi musuika ku mukaba wandi, bua buowa bua butuku.

⁹Mukelenge Solomo wakadienzela tshihoyi tshia mitshi ya ku Lebanona.

¹⁰Wakenza makunshi atshi ne tshiamu tshia argent, ne tshitaku tshiatshi ne tshia or, nkuasa watshi wakadi mulengeshibue ne bilulu bikunzubile; tshiakadi tshilengeshibue munda ku dinanga dia bana ba bakashi ba mu Yelushalema.

¹¹Nuenu, bana ba bakashi ba mu Siona, hatukai bua kutangila mukelenge Solomo, ne tshifulu tshia butumbi tshiakamuasabo kudi mamu wandi dituku dia dibaka diandi, dituku mene dia disanka dia mutshima wandi.