Read tshiluba Musambu wa Solomo 4 Bible Online

Musambu wa Solomo 4 - tshiluba bible

Musambu wa Solomo 4

¹Mona, wanyi munanga, wewe udi mulengele, mona, udi mulengele be! Mesu ebe adi bu a nyunyu wa nkutshi; nsuki yebe idi bu tshisumbu tshia mbushi idi ilala ku mukuna wa Gilada.

²Menu ebe adi bu tshisumbu tshia mikoko yakakosabo miosa, yakufuma ku tshiowelu tshia mai; buonso buai yakulela bana ba mahasa, kakuena umue mujimine.

³Mishiku yebe idi bu buanda bukunze-kunzû; mukana muebe mudi mulengele. Matama ebe adi bu bihesa bia dimuma dia grenade, ku nyima kua tshilulu tshiebe tshibuikilu ha mutu hebe.

⁴Nshingu webe udi bu tshibunda tshia Davidi, tshiakaseye bua bintu biandi bia nvita, tshidibo balembeleshe bintu bia nvita bia bantu tshinunu ne ngabu ya bena bukitu.

⁵Mabele ebe abidi adi bu bana ba ngulungu, bu bana ba mahasa ba ngulungu, badi badia munkatshi mua nsungubidi.

⁶Hatalala munya ne haleha mi ndidimbi, nembande ku mukuna munene udi ne mitshi ya myrrhe ne ku mukuna mukese udi ne mitshi ya manananshi.

⁷Wanyi munanga, wewe udi mulengele be; kuena ne ditoba, nansha dikese.

⁸Mukashi wanyi muhungile, umuke nʼanyi ku Lebanona; umuke nʼanyi ku Lebanona. Umuke ku mukuna wa Amana, ne ku wa Senî ne wa Hêmona, ku miaba idi mena a nyama ya ntambue, ne ku mikuna idi ne nkashama.

⁹Wewe, muanʼetu mukashi, mukashi wanyi muhungile, wakakoka mutshima wanyi, wakakoka mutshima wanyi ne disu diebe dimue, ne dibue dimue dia ku mabue a mu nshingu muebe.

¹⁰Muanʼetu mukashi, mukashi wanyi mubangile, dinanga diebe didi dimpe be! Dinanga diebe didi ditamba nvinyo buakane, muhuya wa manyi ebe udi uhita wa manananshi onso bulengele!

¹¹Mukashi wanyi mubangile, mishiku yebe idi bu dikatshi dia buitshi; buitshi ne mabele bidi muinshi mua ludimi luebe; muhuya wa bilulu biebe udi bu wa Lebanona.

¹²Muanʼetu mukashi, mukashi wanyi mubangile, udi bu tshibunda tshidi ne tshibi tshinshila; udi bu mpokolo wa mai mubuikile, udi bu mushimi wa mai udi ne tshibuikilu.

¹³Wewe udi bu mitoloko mimene mu tshibunda tshia mamuma a grenade a mushinga mukole, ne mitshi ya bilongo ne ya nard,

¹⁴nard ne safran, cannelle ne cinnamone,[3] ne mitshi yonso ya musenga wa manananshi, ne myrrhe ne aloès, ne bintu bionso bia muhuya muimpe—

¹⁵Wewe udi bu mushimi wa mai mu tshibunda tshia bilongo, bu dina dia mai a muoyo, ne bu misulu ya mai idi ihatuka ku Lebanona.

¹⁶Luhehele lua ku nôde, tabala, wewe, luhehele lua ku sude, heha! Nuhehe mu tshibunda tshianyi bua muhuya wa manananshi anyi uhatuke. Wanyi munanga abuele mu tshibunda tshiandi, adie biandi mamuma andi mimpe.