Read tshiluba Musambu wa Solomo 5 Bible Online

Musambu wa Solomo 5 - tshiluba bible

Musambu wa Solomo 5

¹Muanʼetu mukashi, mukashi wanyi mubangile, nakabuela mu tshibunda tshianyi. Nakasangisha myrrhe[4] wanyi ne bintu bia muhuya muimpe; nakadia buitshi buanyi busangishe ne dikatshi; nakanua nvinyo yanyi misangisha ne mabele. Balunda banyi, diai, nuai bienu; bananga banyi, nuai bintu bia bungi.

²Nakadi mulale tulu, kadi mutshima wanyi wakadi mutabale; edi ndi dia wanyi munanga udi ukokola ku tshibi, wamba ne, Muanʼetu, wanyi munanga, nyunyu wanyi wa nkutshi, wanyi mulengele tshishiki, ungunzuluile tshibi; bualu bua dibungi didi ku mutu wanyi, dibungi dia butuku didi dimatshila ku nsuki yanyi.

³Nakavula bilulu bianyi, nembiluate munyi? Nakowa ku makasa anyi, ndi mua kuanyanga kabidi, anyi?

⁴Wanyi munanga wakabuesha tshianza tshiandi ku dididishi, mutshima wanyi wakatabuluka bualu buandi.

⁵Nakajuka bua kunzulula wanyi munanga tshibi; manananshi a myrrhe akadi amata ku bianza bianyi, akadi ku minu yanyi akumatshila ku tshikuatshidi tshia tshibi.

⁶Nakunzuluila wanyi munanga tshibi, kadi wanyi munanga wakadi mumane kuya. Mutshima wanji wakabungama hakadiye wakula; nakamukeba, kadi tshiakamuheta; nakamubikila, kadi yeye kakuitaba.

⁷Bansentedi badi bendakana ku musoko, bakasangakena nʼanyi; bakankina, bakantaha mputa; balami bakadi bashikame ha mutu ha ngumbu bakanyenga tshilulu tshianyi.

⁸Nuenu bana ba bakashi ba mu Yelushalema, ndi nnusengelela ne, Binuasangakena ne wanyi munanga, numuambile ne, Dinanga didi dinkengesha.

⁹Webe munanga udi uhita bakuabo munyi, wewe mukashi udi mutambe bulengele? Webe munanga udi uhita bakuabo munyi, bua wewe udi utusengelela nunku?

¹⁰Wanyi munanga udi mutoke ne mpala wandi udi lunkunjilakunjila; yeye udi muneme munkatshi mua bantu binunu dikumi.

¹¹Mutu wandi udi bu or wa mushinga mukole be; nsuki yandi idi mifike fitutû bu nsala ya tshikololo, idi mijinga bikata.

¹²Mesu andi adi bu a nyunyu ya nkutshi ibidi mishikame kukala kua mai, masukula ne mabele, majalame bimpe mu bihoko.

¹³Matama andi adi bu bibunda bia bintu bia dihembu dimpe ne bu midioko ya muhuya muimpe; mishiku yandi idi bu nsungubidi, manananshi a myrrhe[5] adi amataku.

¹⁴Bianza biandi bidi bu tukanu tua or tulengesha ne mabue a chrysolithes; mubidi wandi udi bu mubanga muhela mulengesha ne mabue a saphirs.

¹⁵Mikolo yandi idi bu makunshi a mabue masonga mujadike mu or; tshinfuanyi tshiandi tshidi bu Lebanona tshilengele bu mitshi ya cèdres.

¹⁶Mei a mukana muandi adi mashema; bulelela, yeye udi mutambe bulengele. Nuenu, bana ba bakashi ba mu Yelushalema, mulunda wanyi ne wanyi munanga udi nunku.