Read tshiluba Yeshaya 15 Bible Online

Yeshaya 15 - tshiluba bible

Yeshaya 15

¹Dî dia tshijila[22] bualu bua Moaba. Bualu bua mu butuku bumue bakubutula Ala wa Moaba, bakuyisha Moaba bu muaba wa hatuhu; bualu bua mu butuku bumue bakubutula Kî wa Moaba, bakuyisha Moaba bu muaba wa hatuhu.

²Muana mukashi wa Dibona wakubanda ku bitendelelu bia mu mukuna bua kudilaku; ba mu Moaba badi badila ha mukuna wa Nebo, ne ha mukuna wa Medeba. Ha mitu yabo yonso hadi mabala, muedi wonso udi mubeyibue.

³Mu misesu yabo badi badiluatshisha bilulu bikayabala; ha miaba idi ha mutu ha nsubu yabo ne mu miaba minene ya misoko yabo, bantu bonso badi basa muadi, badila ne binsonshi bivule.

⁴Ba mu Heshebona ne ba mu Eleale badi badila bikole, mei abo adi unvuika tô ne ku Yahasa; nunku bena nvita ba mu Moaba badi basa muadi bikole, ne mutshima wa Moaba udi uzakala.

⁵Mutshima wanyi udi udidila Moaba bikole; bihatshibue babo badi banyema tô ne ku Soâ, ku Egelata-shelishiya. Bualu bua badi babanda mu nshila udi uyila ku Luhita, bendela badila; ne mu nshila udi uyila ku Holonayima badi babandisha mei abo ne, Tuakubutuka;

⁶bualu bua mai a Nimelima adi kabutu, mashinde akufubidila, mashinde matekete akûma; kakuena mudioko umue utshidi mubishi.

⁷Nunku badi baya ne bintu bivule biakudiangatshilabo ne bintu biakubutshiabo, babituala dishiya dia Kasulu ka Mitshi ya Saules.

⁸Bualu bua muadi wakumana kunyunguluka matshika onso a Moaba; kudila kuau kudi kufika ku Egelayima, kuasa kuau kudi kufika tô ne ku Bê-elima.

⁹Bualu bua mai a Dibona akûla tente ne mashi, kadi nenvuishile Dibona malu makuabo ha mutu, nyama wa ntambue neadiele hamʼbidi ha ba mu Moaba badi banyema, ne hamʼbidi ha bantu bakuabo ba mu buloba batshidi bashalamu.