Read tshiluba Yeshaya 21 Bible Online

Yeshaya 21 - tshiluba bible

Yeshaya 21

¹Dî dia tshijila[31] bualu bua tshihela tshia ku luseke lua mai manene. Bu mudi nvunde ya mu Sude ihitshilamu bikole, lumu ludi lufuma ku tshihela, ku buloba budi bukuatshisha bantu buowa.

²Bakummanyisha tshikena kumona tshikole; muena lukinu udi wenza malu a lukinu, muhaudi udi uhaula. Bandaku, Elama; tshintshimika, Madai! Nempuwishe kuhumuna kuonso kuakuvuisheye ku luseke alu.

³Nunku tshimono tshianyi tshiakûla tente ne kanyinganyinga, didinyenga diakunkuata, bu dia mukashi udi ne didinyenga dia ha kuleleye. Nakulua mukobame, ne bua muanda eu tshiena mua kunvua; nakukuatshika buowa, ne bua muanda eu tshiena mua kutangila.

⁴Mutshima wanyi udi uhampakana, buowa buhite bukole buakuntshinyisha. Kafuanshimba kanakasua kakukudimuka kuzakala kundi.

⁵Badi balongolola mesa, badi bâdisha biata, badi badia, badi banua. Jukai, nuenu bana ba mukelenge, labai manyi ha ngabu!

⁶Bualu bua Mukelenge wakungambila ne, Ya, utekeku nsentedi, yeye atuambile malu adiye umona.

⁷Ne biatangileye bisumbu bia makalu a nvita, babandi ba ha nyima ha tubalu benda ku babidi ku babidi, tshisumbu tshia nyama ya mpunda, tshisumbu tshia nyama ya tumelo, ateleje matshu andi, ikale ne mbabi.

⁸Ka yeye au wakadila bu nyama wa ntambue ne, Mukelenge, ndi ngimana nusangu yonso ha mutu ha tshibumba tshia nsentedi mu diba dia munya, ne badi banteka mu muaba wanyi wa butentekedi bufuku, ku dituku ku dituku.

⁹Ne mona, tshisumbu tshia bena tubalu tshidi tshilua, babandi ha nyima ha tubalu benda ku babidi ku babidi! Yeye wakampingishila dî ne, Babulona wakûhuka, wakûhuka; mpingu yonso ya nzambi yabo yakutshibuka bituha bituha, yakuhona hanshi ha buloba.

¹⁰Ke, wewe muntu wanyi mushihudibue, ne muana wanyi wa tshishihuidi! Mei anakunvua kudi Yehowa wa misumba, Nzambi wa Isalele, au mmei anakukuambila.

¹¹Dî dia tshijila[32] bualu bua Duma. Muntu wa mu Seî udi ungela dî ne, Mutentekedi, udi wamba tshinyi bua butuku? Mutentekedi, udi wamba tshinyi bua butuku?

¹²Mutentekedi udi witaba ne, Butuku bukadi butshia, kadi nebuile kabidi. Binuasua kunkonka kabidi, nunkonke bienu. Alukilai kabidi, luai bienu.

¹³Dî dia tshijila bualu bua Alaba. Bunudi nʼabu mbua kuasa tshitudilu tshienu mu bihuka bia mu Alaba, nuenu batuadi ba bintu ba Bena Dedana.

¹⁴Luai ne mai kudi muntu udi ne nyota, nuenu badi bashikame mu buloba bua Tema, sankidilai bihatshibue ne bia kudia.

¹⁵Bualu bua bakanyema miele ya nvita, bakanyema muele muhatula mu luhaha, ne buta bimana, ne dikenga dikole dia nvita.

¹⁶Bualu bua Mukelenge wakungambila dî edi ne, Hahita tshidimu tshimue, bu mudi muena mudimu wa ditutu ubala bidimu biandi, butumbi buonso bua Kedâ nebuhange.

¹⁷Badi bashala ba ku bungi bua bena mata ba diambedi, bena bukitu ba munkatshi mua bana ba Kedâ, nebikale anu banya-banya. Bualu bua Yehowa, Nzambi wa Isalele, wakuamba di edi.