Read tshiluba Yeshaya 23 Bible Online

Yeshaya 23 - tshiluba bible

Yeshaya 23

¹Dî dia tshijila[35] bualu bua Tulo. Asai miadi, nuenu matu a Tâshishi, bualu bua bakubutula musoko wenu udi ne ngumbu ya nvita, ne kakuenamu nsubu kabidi, kakuena dilobo dia kutudilamu! Mu luendu luau lua ku buloba bua Kitima bualu ebu buakubuluibua kudiu.

²Nuikale bu tumama, nuenu badi bashikame ku muelelu wa mai manene, nuenu bangendʼa mushinga ba ku Sidona, bakahita ha mutu ha mai manene, bakendulukila mushinga ha mutu ha mai a bungi;

³maminu a ku Shihô akadi luhetu luabo, bia kudia biakahuolabo ku luseke lua musulu wa Nile; musoko au wakadi tshisalu tshia bisamba bia bantu.

⁴Nuenu ba mu Sidona, nukuatshike bundu, bualu bua mai manene akuamba dî, musoko wa ngumbu ya nvita wa ha mai manene wakuamba ne, Tshiena muanze kutantamena, tshiena muanze kulela, tshiena muanze kukolesha bansongalume anyi kudiundisha mishikankunde itshidi tumama.

⁵Hafika lumu elu ku Ejipitu, nebikale ne kanyinganyinga bualu bua lumu lua ku Tulo.

⁶Hitshilai mu mai manene tô ne ku Tâshishi; asai miadi, nuenu badi bashikame ku muelelu wa mai manene.

⁷Eu mmusoko wenu wakadi ne disanka, wakadi tshibangidilu tshiau mu bidimu biakahita kale, nguakadi makasa au aya nʼau kule bua kushikamaku, anyi?

⁸Tulo nguakadi muheshi wa bifulu bia bukelenge kudi banfumu; nguakadi bangendʼa mushinga bandi bikale bakokeshi; nguakadi bahanyishanganyi bandi ba bintu bikale bantu ba butumbi ha buloba! Wakadihangidishila bua kumuenzela nunku nganyi?

⁹Yehowa wa misumba wakadihangidishila bualu ebu bua kubihisheye butumbi buonso, ne bua bonso badi ne butumbi ha buloba bahetudibue.

¹⁰Hongolokai biebe ha buloba buebe buonso, wewe muana mukashi wa Tâshishi, bu mudi musulu wa, Nile uhasalala mibungiji yau; kakuena tshintu tshia kukukanda kabidi.

¹¹Wakuolola tshianza tshiandi ha mutu ha mai manene, wakuzakasha makelenge. Yehowa wakuela mukenji bualu bua buloba bua Kanâna, bua kubutulabo misoko yabu idi ne ngumbu ya nvita.

¹²Wakamba ne, Kuena usanka kabidi, wewe muana mukashi wa Sidona udi mukengeshibue. Juka biebe, uhitshile mu mai manene tô ne ku Kitima; nansha wewe muikale kuakua kuine kuena uheta dikisha.

¹³Mona buloba bua Bena Kasada! Bantu aba kabenaku kabidi; Bena Ashû bakabusungula bua kubufila kudi nyama ya mu tshihela. Bakasa bibumba biabo bua kutshintshimika nʼabi musoko, bakashimbula mbalasa ya banfumu bau, bakauvuisha dikolo.

¹⁴Asai miadi, nuenu matu a Tâshishi; bua musoko wenu udi ne ngumbu ya nvita wakubutudibua.

¹⁵Mu dituku adi nebahue Tulo muoyo bidimu makumi muanda mutekete, bu mudi bantu babala matuku a mukelenge umue. Hashika bidimu makumi muanda mutekete, nebenzele Tulo bu mudi mei a musambu wa mukashi wa ndumba amba ne,

¹⁶Angata lunzenze, endakana mu musoko, wewe mukashi wa ndumba udibo bahue muoyo. Imba lunzenze luebe bimpe, imba misambu ya bungi, bua bantu bakuvuluke kabidi!

¹⁷Hashika bidimu makumi muanda mutekete, Yehowa nealue kabidi bua kumona musoko wa Tulo, ne wowo neuhingane kabidi ku difutu diau dia bundumba, newende masandi ne makelenge onso a ba ha buloba adi hanshi ha buloba.

¹⁸Kadi luhetu luau ne ditutu diau bua bundumba nebijidibue kudi Yehowa; kabiena bibutshidibua ne kabiena bitekedibua. Bualu bua luhetu luau lua ku kuendulula kua mushinga neluikale bintu bia kukuatshisha nʼabi bantu badi bashikame ku mpala kua Yehowa, bua bobo bikale ne bia kudia bikumbane ne bivualu bimpe.