Read tshiluba Yeshaya 37 Bible Online

Yeshaya 37 - tshiluba bible

Yeshaya 37

¹Hakunvua mukelenge Hezikiya mei â, wakahanda bilulu biandi, wakadiluatshisha bilulu bikayabala, wakabuela mu nsubu wa Yehowa.

²Wakatuma Eleyakima, wakadi ha mutu ha bena mudimu ba mu nsubu wa mukelenge, ne Shebena secrétaire, ne bakulu ba munkatshi mua bakuidi, baluate bilulu bikayabala, kudi muprofete Yeshaya, muana wa Amoza.

³Bakamuambila ne, Hezikiya udi wamba ne, Edi ndituku dia makenga ne dia kutubela ne dia kutufuisha bundu; bualu bua diba dia kulela bana diakufika, ne kakuenaku hukole bua kubalela.

⁴Bumue Yehowa Nzambi webe neunvue mei a Labashake, udi mukelenge wa Ashû, mukelenge wandi, mutume bua kufunyineye Nzambi udi ne muoyo bulobo, ne neasamine mei adi Yehowa Nzambi webe munvue; nunku ubishe mei ebe bua kulombela bantu badi bashala Nzambi.

⁵Nunku bantu ba mukelenge Hezikiya bakafika kudi Yeshaya.

⁶Yeshaya wakabambila ne, Nuambile mukelenge wenu ne, Yehowa udi wamba ne, Kutshinyi mei awakunvua, adi bantu ba mukelenge wa Ashû bampende nʼau.

⁷Tangila, nenteke nyuma munda muandi, ne yeye neunvue lumu, neahingane ku buloba buandi; meme nemmushiheshe ku muele wa nvita mu buloba buandi.

⁸Labashake wakahingana, wakasangana mukelenge wa Ashû uluangana ne Bena Libena; bualu bua wakamana kunvua ne, Yeye wakumuka ku Lakisha.

⁹Hakunvueye lumu ne, Tihaka, nfumu wa Atiopa, ulualua bua kuluangana nʼebe, wakatuma ba-messager kudi Hezikiya kabidi ne,

¹⁰Nuambile Hezikiya, mukelenge wa Yuda, ne, Nzambi webe ûdi weyemena kakudingi nansha, hambeye ne, Kabena bafila Yelushalema mu bianza bia mukelenge wa Ashû.

¹¹Tangila, wewe wakumana kunvua bu muakenzela bakelenge ba Ashû ba mu bisamba bionso hakababutulabo kashidi; wewe neuhanduke, anyi?

¹²Nzambi ya bisamba bia bantu biakubutula batatu banyi, Bena Gozana ne Bena Halana ne Bena Lesefe ne Bena Edene bakadi mu Telasâ, yakabasungila, anyi?

¹³Mukelenge wa Hamata ne mukelenge wa Âpada, ne mukelenge wa musoko wa Sefâwayima, ne mukelenge wa Hena, ne mukelenge wa Iwa badi kudi kunyi?

¹⁴Hezikiya wakangata mukanda mu bianza bia ba-messager, wakaubala. Hashishe, Hezikiya wakabuela mu nsubu wa Yehowa, wakauvungulula ku mpala kua Yehowa.

¹⁵Hezikiya wakatendelela Yehowa, wamba ne,

¹⁶Yehowa, Nzambi wa Isalele, udi mushikame mu nkuasa wa butumbi udi ha mutu ha bakeluba, wewe udi Nzambi, anu wewe nkayebe, wa makelenge onso a ha buloba; wewe wakufuka diulu ne buloba.

¹⁷Yehowa, teleja matshu ebe, unvue biebe; Yehowa, ubulule mesu ebe, utangile; unvue mei onso a Saneheliba, akatumeye bua kufunyineye Nzambi udi ne muoyo bulobo.

¹⁸Bulelela, Yehowa, bakelenge ba Ashû bakabutula ba mu bisamba bionso bia bantu ne maloba abo;

¹⁹bakela nzambi yabo mu kahia, bualu bua kayakadi nzambi mene, kadi yakadi bintu bienza ku bianza bia bantu mene, bia mitshi ne bia mabue; nunku bakayibutula.

²⁰Nunku, ndi nkusengelela, Yehowa Nzambi wetu, utusungile mu tshianza tshiandi, bua ba mu makelenge onso a ha buloba bamanye ne wewe Yehowa udi Nzambi nkayebe.

²¹Hashishe Yeshaya, muana wa Amoza, wakatumina Hezikiya dî ne, Yehowa, Nzambi wa Isalele, udi wamba ne, Bualu bua wewe wakundombela bua Saneheliba, mukelenge wa Ashû,

²²edi ndi didi Yehowa muambe bua bualu buandi ne, Muana mukashi wa Siona utshidi kamama udi kulengulula, udi ukubuidia; muana mukashi wa Yelushalema udi ukuha mutu wandi ku nyima kuebe.

²³Wewe wakufunyina nganyi bulobo, wakuhenda nganyi? Wakubishila nganyi dî diebe? Wakubandishila nganyi mesu ebe ne diambu? Wakuenzela Wa Tshijila wa Isalele nunku!

²⁴Wewe wakufunyina Mukelenge bulobo mukana mua bahika bebe, wakuamba ne, Meme nakubanda tô ne ku mutu kua mikuna ne tshisumbu tshinene tshia makalu anyi a mitu, tô ne ku nseke ya mu Lebanona idi misokome ku mesu; nenshimbule mitshi mile ya cèdre idimu, ne mitshi ya cyprès ya mushinga mukole idimu; nembuele tô ne mu nsubu wandi udi muhite kuikala mulu, mu ditu dia mamuma andi.

²⁵Meme nakumbula mena, nakunua mai au, nenkumishe misulu yonso ya mu Ejipitu ne kudiata kua makasa anyi.

²⁶Kuena muanze kunvua bu munakenza bualu ebu kale, ne bu m unaka dia njila kudihangidishilabu mu matuku a kale, anyi? Mpindiu nakuvuisha muanda eu, bua wewe Umanye mua kubutula misoko ya ngumbu bua kuluayi mishiki ya bintu bia tshianana.

²⁷Nunku bena misoko ei bakadi ne bukole bukese, bakatshina, bakabondakana; bakadi bu mashinde a mu budimi, bu mashinde a lutende, bu masele mabishi adi amena ha misaka ya nsubu, ne bu budimi bua maminu adi anyanguka kâyi manji kumena bimpe.

²⁸Ndi mumanye kûdi mushikame, kûdi uluhuka ne kûdi ubuela, ne bu mûdi unfunyina bulobo.

²⁹Bualu bua wakanfunyina bulobo ne bua diambu diebe diakufika ku matshu anyi, nunku nenteke ndobo wanyi ku diulu diebe, ne lukanu luanyi mukana muebe bua kukuendesha nʼalu, nenkutshingulule bua kukuhingashasha mu nshila kuwakufuma.

³⁰Etshi netshikale tshimanyinu kûdi: tshidimu etshi nenudie bia kudia bidi bidimenena, ne mu tshidimu tshibidi nenudie bintu bidi bidimenena ku bintu abi; mu tshidimu tshisatu nukune bintu, nubihuole; nutentule mitshi ya tumuma tukese mu madimi, nudie tumuma tuai.

³¹Bantu ba mu tshiota tshia Bena Yuda batshidi bashala ne muoyo nebele miji muinshi, nebakuame mamuma kulu.

³²Bualu bua difuka dia bantu nediluhuke mu Yelushalema, ne ba mu mukuna wa Siona badi bahanduka nebaluhukemu. Lukunukunu lua Yehowa wa misumba neluenze muanda eu.

³³Nunku Yehowa udi wamba bualu bua mukelenge wa Ashû ne, Kena ufika ha buihi ne musoko eu, kena welaku mukete, kena ulua ku mpala kuau ne ngabu, kena unguishaku mushiki wa buloba ku musoko eu.

³⁴Yehowa udi wamba ne, Yeye neahingane mu nshila muakafumeye; yeye kena ufika ha buihi ne musoko eu.

³⁵Bualu bua nenduile bena musoko eu nvita bua kubasungila, bua bualu buanyi ne bua bualu bua muntu wanyi Davidi.

³⁶Muanjelo wa Yehowa wakaluhuka, wakashiha ba mu tshitudilu tshia Bena Ashû binunu lukama ne makumi muanda mukulu ne bitanu. Hakabika bantu ne dinda dionso, monai, bakasangana bantu aba bonso anu bitalu.

³⁷Nunku Saneheliba, mukelenge wa Ashû, wakumukaku, wakaya kuabo, wakashikama mu Ninewe.

³⁸Hakadiye utendelela mu nsubu wa Niseloka, nzambi wandi, Adalameleke ne Shalese, bana bandi balume, bakamushiha ne muele wa nvita, bakanyema mu buloba bua Alalata. Esâ-hadona muanʼandi wakakokesha mu muaba wandi.