Read tshiluba Yeshaya 38 Bible Online

Yeshaya 38 - tshiluba bible

Yeshaya 38

¹Mu matuku au Hezikiya wakadi ne disama dia lufu. Yeshaya muprofete, muana wa Amoza, wakalua kudiye, wakamuambila ne, Yehowa udi wamba ne, Ulongolole malu a mu nsubu muebe; bualu bua neufue, kuena wikala ne muoyo.

²Diba adi Hezikiya wakatangisha mpala wandi ku tshimanu tshia nsubu, wakalomba Yehowa.

³Wakamba ne, Yehowa, ndi nkusengelela ne, Uvuluke munakuenda ku mpala kuebe mu bushuwa ne mu buakane bua mutshima, ne munakuenza malu akadi mimpe ku mesu kuebe. Hezikiya wakadila bikole.

⁴Hashishe, dî dia Yehowa diakalua kudi Yeshaya ne,

⁵Ya wambile Hezikiya ne, Yehowa Nzambi wa tatu webe Davidi udi wamba ne, Nakunvua kulomba kuebe, nakutangila binsonshi biebe; tangila, nententekashe bidimu dikumi ne bitanu ha mutu ha matuku a muoyo webe.

⁶Nenkusungile wewe ne musoko eu mu bianza bia mukelenge wa Ashû; nenduile bena musoko eu nvita.

⁷Etshi netshikale tshimanyinu kûdi tshifume kudi Yehowa bua kukulesha ne, Yehowa nênze bualu ebu buakuambeye:

⁸Tangila, nempingashe mundidimbi wa diba wa ha tshibandilu, wakuhueka ha tshidikishilu tshia mpolo ya diba tshia Ahaza hakuhueka diba, bua kuhinganau bidiatshilu dikumi bia tshibandilu. Nunku mundidimbi wa diba wakahingana bidiatshilu dikumi ha tshidikishilu tshia diba ku tshidiatshilu kuakabangau kuhueka diambedi.

⁹Au mmei akafunda Hezikiya, mukelenge wa Yuda, hakasameye ne hakasangaleye ku disama diandi:

¹⁰Nakuamba ne, Nembuele mu bibuelelu bia ku Muaba wa Bafue mu matuku a munda munya a bidimu bianyi; bakunyenga tshituha tshia bidimu bia muoyo wanyi tshiakadi tshishala.

¹¹Nakuamba ne, Tshiena ntangila Yehowa, tshiena ntangila Yehowa mu buloba bua badi ne muoyo; tshiena ntangila bantu kabidi munkatshi mua ba ha buloba.

¹²Bakûmusha nsubu wanyi, bakuntudileye bu mudibo batula nsubu wa ntenta wa mulami wa mikoko bua kuya nʼandi; nakuvunga muoyo wanyi bu mudi mukumi wa bilulu uvunga tshilamba tshiakukumeye; yeye neankose bua kungumusha mu mbungu; ku munya tô ne ku butuku wewe udi unfikisha ku ndekelu wa muoyo wanyi.

¹³Nakadila tô ne ku dinda. Yeye udi utshibula mifuba yanyi yonso, bu mudi nyama wa ntambue wenza; ku munya tô ne ku butuku wewe udi unfikisha ku ndekelu wa muoyo wanyi.

¹⁴Nakadila bu mudi nyunyu wa kandindi anyi nyunyu wa mudinga udila, nakadila bu nyunyu wa nkutshi. Mesu anyi adi ahanga ne kutangila kuau mulu; Mukelenge, badi bankengesha; wikale tshieya tshianyi!

¹⁵Nengambe tshinyi? Yeye wakungambila dî, ne yeye muine wakuenza muanda eu; nengende bitulu bitulu bidimu bianyi bionso bualu bua kanyinganyinga kakole ka mu mutshima wanyi.

¹⁶Mukelenge, bantu batu bikala ne muoyo bua malu â; ne bua malu â onso nyuma wanyi udi ne muoyo; nunku unsangashe ne umpingashile muoyo kabidi.

¹⁷Mona, bua meme kuheta ditalala ku nyima nakadi ne kanyinganyinga kakole diambedi; kadi dinanga diebe dia muoyo wanyi diakûmusha mu dijimba dia kabutu; bualu bua wewe wakuela mibi yanyi yonso ku nyima kuebe.

¹⁸Bualu bua Muaba wa Bafue kawena mua kukutumbisha, lufu kaluena lumanye mua kukunemeka; badi bahueka mu Dijimba dia Lufu kabena bamanye mua kutekemena kuheta lulamatu luebe lua bushuwa.

¹⁹Udi ne muoyo, muntu udi ne muoyo, neakutumbishe, bu mundi ngenza dituku edi; tatu neamanyishe bana bandi lulamatu luebe lua bushuwa.

²⁰Yehowa udi musue kunsungila; nunku netuimbe misambu yanyi ne bisanji bidi ne masela matuku onso a muoyo wetu mu nsubu wa Yehowa.

²¹Yeshaya wakamana kuamba ne, Bangate ditahi dia nfigi, baditeke ha tshiuja tshiandi, bua yeye asangale.

²²Hezikiya wakakonka kabidi ne, Tshimanyinu kai tshidi tshindesha ne nembande ku nsubu wa Yehowa?