Read tshiluba Yeshaya 41 Bible Online

Yeshaya 41 - tshiluba bible

Yeshaya 41

¹Nuenu, maloba a ku muelelu wa mai manene, huwai bua kuteleja; bantu badimu basangashe bukole buabo; balue ha buihi nʼanyi, hashishe bambe dî diabo; tulue bietu hohamue bua kulumbuluishangana.

²Wakubisha muntu ku luseke lua esete, udi buakane buakidila mu muaba wonso uyayeye nganyi? Yeye udi umuhesha bisamba bia bantu bidi ku mpala kuandi; udi umuhesha bukokeshi bua kukokesha nʼabu bakelenge; muele wandi wa nvita udi ubavuisha bu dinfuenkenya, buta buandi budi bubavuisha bu bisote bihehuka kudi luhehele.

³Udi ubihata, udi uhita ku mpala kuabo kayi ne bualu bumukuata, wenda mu nshila mene wakadiye kayi muanze kutekamu makasa andi diambedi.

⁴Wakuenza bualu ebu wakubushikisha udi ubikila milongo ya bantu ku tshibangidilu nganyi? Meme Yehowa, ndi wa kumudilu, ndi kabidi muomumue ne wa kunshikidilu; mmeme mene.

⁵Maloba a ku muelelu wa mai manene akumona, akutshina; mikalu ya buloba idi izakala; idi isemena ha buihi, idi ilua.

⁶Badi bakuatshishangana, muntu yonso udi ukuatshisha muena mutumba nʼandi; muntu yonso udi wambila muan abo ne, Kolesha mutshima webe.

⁷Nunku muena mabaya udi ukolesha mutshima wa mutudi wa tshiamu tshia or, udi usenesha or ne marteau udi ukolesha mutshima wa muntu udi ututa nyindu, umuambila bua kulamika kuandi kua or ne, Kudi kuimpe; udi ukukolesha ne misonso bua or kalamuki.

⁸Kadi wewe, Isalele muntu wanyi. Yakoba unakusungula, kankanunuina ka Abalahama mulunda wanyi,

⁹Wewe unakukuata bua kulua nʼebe kunfudilu kua buloba, unakubikila ku matengu abu, unakuambila ne, Wewe udi mukuatshishi wanyi wa mudimu, nakukusungula ne tshiena mukuhidie.

¹⁰Kutshinyi, bualu bua ndi nʼebe; kukenzakanyi bua buowa nansha, bualu bua ndi Nzambi webe; nenkukoleshe, bulelela, nenkukuatshishe; bulelela, netujadike ne tshianza tshianyi tshia balume tshia buakane buanyi.

¹¹Monai, bonso badi bakukuatshile tshiji nebafuishibue bundu, nebabuelakane; badi bafuilangana nʼebe nebikale ba hatuhu, nebajimine.

¹²Neukebe bantu aba badi batandangana nʼebe, kadi kuena ubaheta; badi baluangana nʼebe nebikale ba hatuhu, bu tshintu tshia tshianana.

¹³Bualu bua meme, Yehowa Nzambi webe, nenkukuate ku tshianza tshiebe tshia balume, nkuambila ne, Kutshinyi, nenkukuatshishe.

¹⁴Kutshinyi, wewe Yakoba, tshishishi, ne nuenu Bena Isalele! Nenkukuatshishe, ndi dia Yehowa, Muhikudi webe, Wa Tshijila wa Isalele.

¹⁵Mona, nakukuvuisha bu tshiamu tshihia-tshihia tshitue tshidi ne menu tshia kubundulula nʼatshi; wewe neubundulule mikuna mile, neuyiboteshe bu luhuishi, neuvuishe mikuna mihi bu bisote.

¹⁶Neuyibehuishe, ne luhehele neluyihehule, ne nvunde neayimuangalashe; ne wewe neusanke mu Yehowa, neutumbile mu Wa Tshijila wa Isalele.

¹⁷Bahele ne badi bakenga badi bakeba mai, ne kaenaku, ne ha ndimi yabo hadi hatumba kûma bualu bua nyota. Meme Yehowa nengitabe kudibo; meme Nzambi wa Isalele tshiena mbalekela.

¹⁸Nempatule misulu ya mai mu mikuna idi kayiyi ne mai, ne mishimi ya mai munkatshi mua bibanda; nenvuishe tshihela bu kashiba ka mai, ne buloba bûme bu mishimi ya mai.

¹⁹Nententule mitshi ya cèdre, ya acacia, ya myrtes ne ya olive mu tshihela; nententule mitshi ya cyprès, ya orme ne ya buis hohamue mu tshihela tshia lusenga;

²⁰bua bantu batangile, bamanye, bele meji ne bajingulule diatshimue ne, Tshianza tshia Yehowa tshiakuenza bualu ebu, Wa Tshijila wa Isalele wakubufuka.

²¹Yehowa udi Wamba ne, Nulue ne tshilumbu tshienu; Mukelenge wa Yakoba udi wamba ne, Ambai mei enu makole anudi nudibingisha nʼau.

²²Balue nʼau ku mpala kuetu, batuambile malu alualua kumueneka; ambai bienu malu akadiku diambedi ne, Akadi nunku; bua tuetu kuelangana meji a malu â ne bua kumanya bietu nshikidilu wau; anyi neuleshe malu adi kayi manji kulua.

²³Nutuambile malu adi alua mu bidimu bitshidi ku mpala, bua tuetu tumanye ne nudi nzambi; bulelela, nuenze bualu budi buimpe anyi bualu budi bubi, bua tuetu tujoshangane, tutue bikemu ne tubumone nʼenu diatshimue.

²⁴Monai, nudi bintu bia hatuhu, ne mudimu wenu udi wa hatuhu; wanusungula udi muena tshinyangu.

²⁵Nakubisha muntu wa ku nôde, ne yeye wakumana kulua; nakubisha muntu ku muaba wa kudi kuhatuka diba udi ubikila dina dianyi. Yeye nealue kudiata bakokeshi bu tshimama, bu mudi mufumbi udiata dima.

²⁶Nganyi wakadianjila kutuambila bualu ebu ku tshibangidilu, bua tuetu tubumanye, ne wakutuambilabu diambedi kabuyi buanze kumueneka, bua tuetu tuambe bietu ne, Wakuamba bulelela? Bulelela, kakuena muntu udi unuambila, kakuena muntu udi unulesha, kakuena muntu udi unvua mei enu.

²⁷Meme ndi wa kumudilu wakudianjila kuambila Siona ne, Tangila, ubatangile! Nentume kudi Yelushalema udi uya ne lumu luimpe kudiye.

²⁸Hanatangila, kakuenaku muntu; munkatshi mua nzambi ei kakuenaku mufidi umue wa meji, bua, hanamukonka bualu, udi mumanye mua kumpingishila dî.

²⁹Monai, buonso buabo badi ba hatuhu; midimu yabo idi ya tshianana, ne mpingu yakutulabo idi luhehele ne bintu bibuelakane.