Read tshiluba Yeshaya 45 Bible Online

Yeshaya 45 - tshiluba bible

Yeshaya 45

¹Yehowa udi wamhila muntu wandi udiye muele manyi ha mutu dî, Kolesha mene, unakukuata ku tshianza tshiandi tshia bukole, bua kutulula bisamba bia bantu ku mpala kuandi, ne bua kusulula mikaba ya ku bimono bia bakelenge; bua kunzulula bibi ku mpala kuandi, ne bua bibi kabinshidi kabidi.

²Udi umuambila ne, Nenye ku mpala kuebe, nendandakashe mikuna idi bizakalabizakala; nentshibule bibi bia tshiamu tshia mitaku bituha bituha, nenkose nkanu ya biamu hankatshi.

³Nenkuhe luhetu ludibo basokoka mu midima, ne biuma bidibo babutshila mu busokoko; bua wewe Umanye ne, Yeye udi Yehowa udi umbikila ku dina dianyi. Nzambi wa Isalele mene.

⁴Bua bualu bua Yakoba muntu wanyi, ne Isalele unakusungula, nakukubikila ku dina diebe, nakukuinyika dina diebe dibidi, wewe kuyi muanze kumanya.

⁵Meme ndi Yehowa, kakuena mukuabo nansha; kakuena nzambi mukuabo muomumue nʼanyi nansha; nenkusuike mukaba, wewe kuyi muanze kummanya nansha;

⁶bua bantu ba kudi kuhatuka diba, ne ba kudi kubuela diba bamanye ne kakuena mukuabo muomumue nʼanyi. Meme ndi Yehowa, ne kakuena mukuabo nansha.

⁷Ndi ngenza munya, ndi nfuka midima kabidi; ndi nvuisha ditalala, ndi nvuisha makenga; meme ndi Yehowa udi wenza malu â onso.

⁸Diulu, witshikishe biebe buakane hanshi ha buloba, ne matutu alokeshe buakane, buloba bunzuluke bua buhatulemu luhandu, bumeneshe nʼalu buakane diatshimue; meme Yehowa nakubufuka.

⁹Mulau wikale kudi muntu udi ufuilangana ne Mufuki wandi! Ntshiyoyo munkatshi mua biyoyo bia ha buloba! Dima nedikonke mufumbi udi udifumba ne, Udi wenza tshinyi, anyi? Anyi mudimu webe udi mua kukuambila ne, Wewe kuena ne bianza, anyi?

¹⁰Mulau wikale kudi muntu udi ukonka tatu ne, Udi ulela tshinyi? Anyi udi webesha mukashi ne, Udi ne didinyenga bua kulela tshinyi?

¹¹Yehowa, Wa Tshijila wa Isalele, ne Mufuki wandi, udi wamba ne, Nenungebeshe bua malu adi kâyi manji kulua, anyi? Nenungelele mukenji bua bana banyi balume, anyi bua mudimu wa bianza bianyi, anyi?

¹²Nakafuka buloha, nakafuka bantu badimu. Bianza bianyi nkayabi biakabaha diulu, ne nakelela bintu biadi bionso mukenji.

¹³Nakubisha muntu mu buakane buanyi, nemmululamishile nshila yandi yonso; yeye nease musoko wanyi, nealekele bantu banyi bakuatshibue mu maloba a bende, kayi ulomba mushinga anyi mbueshilu; Yehowa wa misumba udi wamba nunku.

¹⁴Yehowa udi wamba ne, Luhetu lua ku Ejipitu ne biuma bia buendaluki bua mushinga mu Atiopa, ne Bena Seba bine, bantu bale, nebibuele ku luseke luebe, nebikale bintu biebe. Nebakulonde, nebalue ku luseke luebe ne nkanu mibasuike. Nebahone hanshi ku mpala kuebe bua kukukuila; nebakutendekene ne, Munkatshi muenu mudi Nzambi bulelela; kakuena mukuabo, kakuena Nzambi mukuabo muomumue nʼandi.

¹⁵Bulelela, wewe udi Nzambi udi usokoma, wewe Nzambi wa Isalele, Musungidi.

¹⁶Benji ba mpingu badi bafuishibue bundu ne badi babuandakana, buonso buabo diatshimue, badi babuela mukubuelakana hohamue.

¹⁷Kadi Bena Isalele nebasungidibue kudi Yehowa ne luhandu lua tshiendelele; kanuena nufuishibua bundu, kanuena nubuandakana tô ne tshiendelele.

¹⁸Bua edi ndî didi Yehowa wakafuka diulu wamba, Nzambi mene wakafuka buloba ne wakabuenza, wakabujadika, kakabufuka bu tshintu tshia hatuhu, wakabufuka bua bantu bashikamehu; yeye mene udi wamba ne, Meme ndi Yehowa, ne kakuena mukuabo nansha.

¹⁹Tshiakuamba dî mu musokoko, mu muaba wa mu buloba bua mîdima: tshiakuambila tunkanunuma tua Yakoba ne, Nunkebe mu muaba udi mutuhu. Meme Yehowa ndi ngamba mei a bushuwa, ndi ngamba mei adi majalame.

²⁰Nudisangishe hohamue, nulue; nusemene ha buihi hohamue, nuenu badi bahanduke munkatshi mua bisamba bia bantu! Badi benda batuala mutshi wa luhingu luakusongabo, badi batendelela nzambi udi kayi mumanye mua kubasungila, kabena ne lungenyi.

²¹Nuambe bienu, nuleshe malu anudi basue kutumbila: bulelela, bele tshifufu, batuleshe ne, Wakunuambila bualu ebu mu bidimu bia diambedi nganyi? Wakadianjila kuamba bualu ebu kale nganyi? Meme Yehowa tshiakuenza bualu ebu, anyi? Kakuena nzambi mukuabo muomumue nʼanyi, muakane ne Musungidi; kakuena mukuabo muomumue nʼanyi.

²²Hinganai kundi, nusungidibue, nuenu ba kunfudilu kua buloba; bualu bua meme ndi Nzambi, ne kakuena mukuabo muomumue nʼanyi.

²³Nakuditshiha mu dina dianyi nkayanyi, dî diakane diakuhatuka mukana muanyi, kadiena dihingana: Diamba ne, Tshinu tshionso netshintuile hanshi, ludimi luonso neluditshihe,

²⁴bamba ne, Anu mu Yehowa mmudi buakane ne bukole. Bantu nebalue kudiye, bonso bakadi bakuata tshiji bualu buandi nebafuishibue bundu.

²⁵Tunkanunuma tuonso tua Isalele netubingishibue mu Yehowa, neutumbile kudiye.